Bengaluru: ఉద్యోగం పోతే EMIలు ఎలా కట్టాలి? నిపుణులు చెబుతున్న చిట్కాలు ఇవే!

బెంగళూరులో ప్రస్తుతం ఐటీ రంగంలో నెలకొన్న ఉద్యోగ భయాలు, ఆర్టిఫిషియల్ ఇంటెలిజెన్స్ (AI) ప్రభావం వల్ల రియల్ ఎస్టేట్ మార్కెట్‌లో కొత్త ట్రెండ్ కనిపిస్తోంది. ముఖ్యంగా భారీ హోమ్ లోన్ ఈఎంఐల (EMIs) విషయంలో ఐటీ నిపుణులు పునరాలోచనలో పడ్డారు. దీని గురించిన పూర్తి వివరాలు ఇప్పుడు చూద్దాం.

భారతదేశ సిలికాన్ వ్యాలీగా పేరుగాంచిన బెంగళూరు (Bengaluru) లో సొంత ఇల్లు ఉండటం అనేది ఒక గౌరవంగా భావిస్తారు. గత ఐదారేళ్లుగా ఐటీ నిపుణుల జీతాలు భారీగా పెరగడంతో కోట్ల రూపాయల విలువ చేసే అపార్ట్‌మెంట్‌లను లోన్ పై కొనడం సర్వసాధారణమైపోయింది. అయితే తాజాగా టెక్ రంగంలో వస్తున్న మార్పులు, లేఆఫ్స్ (ఉద్యోగాల తొలగింపు) , ఏఐ (AI) ప్రభావం వల్ల పరిస్థితులు వేగంగా మారిపోతున్నాయి.

ఒక్క పోస్ట్ రేపిన సంచలనం

ఇటీవల సోషల్ మీడియా ప్లాట్‌ఫారమ్ 'X' లో ఒక టెక్కీ షేర్ చేసిన కథనం దేశవ్యాప్తంగా చర్చకు దారితీసింది. ఆ టెక్కీ రెండేళ్ల క్రితం రూ. 1.3 కోట్ల విలువైన ఫ్లాట్ కొన్నాడు. రూ. 50 లక్షలు సొంతంగా చెల్లించి, మిగిలిన మొత్తానికి నెలకు రూ. 78,000 ఈఎంఐ కట్టేలా లోన్ తీసుకున్నాడు. అయితే ఇటీవల అతను ఉద్యోగం కోల్పోవడంతో.. ఆ భారీ ఈఎంఐ కట్టడం ఇప్పుడు అతనికి పీడకలగా మారింది. "జీతం ఉన్నప్పుడు ఈఎంఐ బాగుంటుంది. కానీ, అది మాయమైతేనే అసలు నరకం కనిపిస్తుంది" అని నెటిజన్లు కామెంట్ చేస్తున్నారు.

రెంట్ వర్సెస్ బయ్ (Rent vs Buy) చర్చ

సాధారణంగా బెంగళూరులో అద్దెలు కూడా ఏటా 10-15% పెరుగుతుంటాయి. ఈ క్రమంలో అద్దె కట్టే బదులు.. అంతే మొత్తంలో ఈఎంఐ కట్టి ఇల్లు సొంతం చేసుకోవడం మంచిదని చాలా మంది భావిస్తారు. కానీ, అద్దె ఇల్లు అయితే ఉద్యోగం పోయినప్పుడు చిన్న ఇంటికి మారే అవకాశం ఉంటుంది. అదే హోమ్ లోన్ తీసుకుంటే.. మీ దగ్గర ఆదాయం ఉన్నా లేకున్నా బ్యాంకుకు కచ్చితంగా డబ్బులు కట్టాల్సిందే. లేకపోతే క్రెడిట్ స్కోర్ దెబ్బతినడమే కాకుండా ఇల్లు వేలానికి వచ్చే ప్రమాదం ఉంది.

నిపుణులు ఏమంటున్నారు?

రియల్ ఎస్టేట్ విశ్లేషకుల ప్రకారం.. ప్రస్తుతం బెంగళూరులో ఇల్లు కొనాలనుకునే వారు నిర్ణయం తీసుకోవడానికి మునుపటి కంటే ఎక్కువ సమయం తీసుకుంటున్నారు. అనరాక్ (ANAROCK) గ్రూప్ ప్రతినిధి ప్రియాంక కపూర్ ప్రకారం.. మార్కెట్‌లో డిమాండ్ ఉన్నప్పటికీ కొనుగోలుదారులు ఇప్పుడు చాలా జాగ్రత్తగా వ్యవహరిస్తున్నారు.

బయటపడడం ఎలా..

ఉద్యోగం పోయినప్పుడు అప్పుల్లో చిక్కుకోకుండా ఉండేందుకు ముందు నుంచే కొంత ప్లానింగ్ ఉండడం అవసరం అని అర్థిక నిపుణులు సూచిస్తున్నారు. దీనికి సంబంధించి ఆర్థిక నిపుణుడు సురేష్ సాదగోపన్ కొన్ని కీలక సూచనలు చేశారు..

• ఎమర్జెన్సీ ఫండ్: కనీసం 6 నుండి 12 నెలల ఈఎంఐలకు సరిపడా డబ్బును అత్యవసర నిధిగా పక్కన పెట్టాలి.
• డౌన్ పేమెంట్: కేవలం 20% కాకుండా వీలైతే 40-50% డౌన్ పేమెంట్ కట్టి లోన్ మొత్తాన్ని తగ్గించుకోవాలి.
• ఆదాయంలో వాటా: మీ ఇంటి నెలవారీ ఆదాయంలో ఈఎంఐ వాటా 30-40% మించకుండా చూసుకోవాలి.
• డిసిప్లిన్: అనవసరమైన బ్రాండెడ్ బట్టలు, ఖరీదైన రెస్టారెంట్లు , ఇతర విలాసాలకు దూరంగా ఉండి పొదుపు చేయాలి.

ముఖ్యంగా భార్యాభర్తలిద్దరూ సంపాదిస్తున్నప్పుడు.. ఇద్దరి జీతాలకు అనుగుణంగా ఖర్చులను పంచుకోవాలి. ఇది ఒకరి ఉద్యోగం పోయినా మరొకరు భారాన్ని మోయడానికి వీలు కల్పిస్తుంది.