దారుణంగా బెంగళూరు టెకీల పరిస్థితి.. ఉద్యోగం పోయి..హోమ్ లోన్ కట్టలేక..చివరకు..

బెంగళూరులో ఇల్లు కొనడం ఒకప్పుడు విజయానికి చిహ్నంగా, జీవిత మైలురాయిగా పరిగణించబడేది. కానీ ఇప్పుడు అదే కల ఆర్థిక భయంగా మారుతోంది. నగరంలోని వేలాది ఐటీ నిపుణులకు, భారీ హోమ్ లోన్‌లు, పెరుగుతున్న వడ్డీ రేట్లు, ఉద్యోగ భద్రత క్షీణత అన్నీ కలసి కొత్త ఆందోళనలకు దారి తీస్తున్నాయి. ఉద్యోగాల తొలగింపులు పెరుగుతున్నాయి. ఆర్టిఫిషియల్ ఇంటెలిజెన్స్ (AI) ప్రభావం వేగంగా పెరుగుతోంది. ఒకప్పుడు భవిష్యత్తుకు సురక్షితంగా భావించిన సాఫ్ట్‌వేర్, డిజైన్, డేటా విశ్లేషణ, మార్కెటింగ్ రంగాలు కూడా ఇప్పుడు ఆటోమేషన్ ముప్పు ఎదుర్కొంటున్నాయి.

ఈ నేపథ్యంలో, రెడ్డిట్, సోషల్ మీడియా ఫోరమ్‌లలో Bengaluru టెకీలు ఇల్లు ఎప్పుడు కొనాలి? అన్నదానిని వదిలి ఇల్లు ఎందుకు కొనాలి? అనే ప్రశ్నపై చర్చించుకుంటున్నారు.రూ. 1 కోటి హోమ్ లోన్ తీసుకుంటే నెలవారీ EMI సుమారు రూ. 1.3 లక్షలు అవుతుంది. స్థిరమైన ఉద్యోగం ఉన్నప్పుడు ఇది సాధ్యమైనదే కానీ, ఒక ఉద్యోగం కోల్పోతే అది ఆర్థిక కుదుపుకు దారితీస్తుంది.ఉద్యోగం పోయిన రోజు నుంచి EMI టార్చర్ మొదలవుతాయని ఒక రెడ్డిట్ వినియోగదారు పేర్కొన్నాడు. మరికొందరు ఇప్పుడు ఇల్లు కొనడం అంటే మనసుకు భారమైపోవడం అని నేరుగా చెబుతున్నారు.

AI స్వీకరణ పెరగడంతో అనిశ్చితి మరింతగా పెరిగింది. కొంతమంది టెకీలు వ్యంగ్యంగా ఇప్పుడు రియల్ ఎస్టేట్ బ్రోకర్ కాల్స్ కూడా AI బాట్‌ల నుంచే వస్తున్నాయి అంటున్నారు. టెకీలలో చాలామంది దీర్ఘకాల రుణబాధ్యతల కంటే..ఒక ఇల్లు లేదా రుణానికి బంధించబడకుండా, ఉద్యోగం లేదా నగరం మారితే సులభంగా కదలగలగడం, నిర్ణయాలను మార్చుకోగలగడం వంటి వాటికి ప్రాధాన్యం ఇస్తున్నారు. 15 లేదా 20 సంవత్సరాల రుణంలో బంధించుకోవడం కంటే, అద్దె ఇళ్లలో నివసిస్తూ తమ పొదుపులను ఇతర పెట్టుబడుల వైపు మళ్లిస్తున్నారు.

10 సంవత్సరాలకు పైగా అనుభవం ఉన్న ఒక సీనియర్ ఇంజనీర్ మాట్లాడుతూ.. నేను ముందుగా చెల్లించలేకపోతే, ఆ ఒత్తిడి విలువైనది కాదని అన్నారు. ఈ దృష్టిలో, ఎంట్రీ-లెవల్, మధ్యస్థాయి టెకీలు ఇప్పుడు ఇల్లు కొనడంలో వెనుకడుగేస్తున్నారు. అయితే, బిల్డర్లు మాత్రం అధిక నికర విలువ కలిగిన వ్యక్తులను లక్ష్యంగా చేసుకుంటున్నారు. ధరలు కొంత స్థిరంగా ఉన్నప్పటికీ, కొనుగోలుదారుల విశ్వాసం మాత్రం తగ్గింది. ఒక టెకీ వినియోగదారు వ్యాఖ్యానించినట్లుగా ధరలు 40 శాతం తగ్గినా కూడా మనం గుడ్డిగా దూకం. ధర కంటే నమ్మకం, భవిష్యత్తు భద్రత ముఖ్యం అని చెబుతున్నారు.

అసెట్జ్ ఎగ్జిక్యూటివ్ డైరెక్టర్ సునీల్ పరీక్ ప్రకారం.. కోవిడ్ తర్వాత కనిపిస్తున్న ఆస్తి మార్కెట్ మందగమనం అనేది సహజమైన దిద్దుబాటు మాత్రమే. బెంగుళూరులో రియల్ ఎస్టేట్ బబుల్ కాదు, మితమైన వృద్ధి కొనసాగుతుందని, వచ్చే 5 నుంచి 7 సంవత్సరాల్లో 5 నుంచి నుంచి 7 శాతం వరకు ధరల పెరుగుదల ఉండవచ్చని ఆయన తెలిపారు. అయితే, తాజా డేటా మాత్రం మార్కెట్‌లో మార్పును చూపుతోంది. వైట్‌ఫీల్డ్, సర్జాపూర్ వంటి ప్రధాన టెక్ కారిడార్‌లలో గృహ విచారణలు చివరి త్రైమాసికంలో 25 శాతం వరకు పడిపోయాయి. పెద్ద బిల్డర్లు 12-14 నెలల ఇన్వెంటరీతో ఉన్నప్పటికీ, కొత్త కొనుగోలుదారులు జాగ్రత్తగా వ్యవహరిస్తున్నారు.

రియల్ ఎస్టేట్ మార్కెట్ సరఫరా గట్టిగా ఉన్నప్పటికీ, కొనుగోలుదారుల నమ్మకం కూడా అంతే గట్టిగా తగ్గిపోవడం ఈ పరిస్థితి. దీని వలన, ఒకప్పుడు విజయానికి సూచకంగా భావించిన బెంగుళూరులో ఇల్లు ఇప్పుడు అనేక టెకీలకు ఆర్థిక ఉచ్చు లాగా మారిపోయింది.