AI: దుకాణ్ CEO సంచలన ట్వీట్.. వామ్మో, AI ఇంత పనిచేసిందా..?

AI: మీడియా రంగంలో AI టెక్నాలజీ వినియోగం వల్ల న్యూస్ ప్రజెంటర్స్ కొలువులకు ఇబ్బందులు తలెత్తనున్నట్లు చర్చ నడుస్తోంది. ఈ సమయంలో తాజాగా బెంగళూరుకు చెంది ఓ కంపెనీ తీసుకున్న నిర్ణయం.. ఈ ధోరణిపై మరిన్ని ఆందోళనలను లేవనెత్తింది. ప్రస్తుతం ఈ వ్యవహారంపై నెట్టింట విపరీతంగా చర్చ జరుగుతోంది.

దుకాణ్ వ్యవస్థాపకులు, CEO సుమిత్ షా చేసిన ట్వీట్ పై పెద్ద దుమారం చెలరేంగింది. కస్టమర్ ప్రశ్నలకు సమాధానం ఇవ్వడానికి తాము AI చాట్‌బాట్‌ను ప్రవేశపెట్టినట్లు ఆయన వెల్లడించారు. దీంతో సహాయక సిబ్బందిలో 90 శాతం మందిని ఉద్యోగం నుంచి తొలగించినట్లు చెప్పారు. ఈ నిర్ణయం కఠినమైనదే అయినా తప్పనిసరి అని తెలిపారు.

సాధారణ ఉద్యోగుల స్థానంలో AI వినియోగం వల్ల తమ సంస్థకు లభించిన బెనిఫిట్స్ ను సైతం షా స్పష్టం చేశారు. కస్టమర్ల ప్రశ్నలకు సమాధానం ఇవ్వడంలో AI చాట్‌ బాట్ అత్యంత ప్రభావవంతంగా పనిచేసిందని పేర్కొన్నారు. తద్వారా కంపెనీకి దాదాపు 85 శాతం మేర ఖర్చు ఆదా అయినట్లు చెప్పారు.

షా ట్వీట్ పై నెటిజన్లు పలు రకాలుగా స్పందించారు. కంపెనీ చాలా మంది ఉద్యోగులను తొలగించడాన్ని తప్పుపడుతూ కొందరు విమర్శలకు దిగారు. కాగా AIని వినూత్నంగా ఉపయోగించారని మరికొందరు ప్రశంసించారు. లింక్డ్ ఇన్ పోస్టులో మరిన్ని వివరాలు వెల్లడిస్తానని దుకాణ్ CEO ప్రకటించారు. ఈ విధంగా చూస్తే రానున్న రోజుల్లో ఇంకెన్ని ఉద్యోగాలు ఊడతాయోననే ఆందోళన సర్వత్రా నెలకొంది.