బెంగళూరు రియల్ ఎస్టేట్.. అత్యంత తక్కువ ధరకే 5 వేల ఫ్లాట్లు.. ఈ ఏరియాల్లో KHB సూపర్ ప్లాన్..

Bengaluru Real Estate Update: భారతదేశ సిలికాన్ వ్యాలీ ఆఫ్ ఇండియా బెంగళూరు వాసులకు గుడ్ న్యూస్.. బెంగళూరులో సొంత ఇల్లు కావాలనుకునే వారికి కర్ణాటక హౌసింగ్ బోర్డు (KHB) శుభవార్తను అందించింది. అత్యంత తక్కువ ధరకే ఫ్లాట్లను అభివృద్ధి చేయాలని నిర్ణయించింది. నగరంలో సొంత ఇల్లు అన్నది కలగానే మిగిలిపోయిన వేలాది కార్మికులు, తక్కువ-మధ్యతరగతి కుటుంబాలకు కర్ణాటక హౌసింగ్ బోర్డు (KHB) ప్రతిపాదించిన కొత్త గృహనిర్మాణ ప్రాజెక్ట్ ఒక పెద్ద ఊరటగా మారే అవకాశం ఉంది.ఎన్నో ఏళ్లుగా నగరంలో పనిచేస్తూ, అద్దె ఇళ్లకే పరిమితమైన కుటుంబాలకు స్థిర నివాసం కల్పించాలనే లక్ష్యంతో ఈ ప్రాజెక్ట్ రూపుదిద్దుకుంటోంది.

బెంగళూరులో సరసమైన గృహాల కొరత తీవ్రమవుతున్న నేపథ్యంలో.. కార్మిక వర్గం, తక్కువ మధ్య ఆదాయ వర్గాల అవసరాలను దృష్టిలో పెట్టుకుని KHB ఈ భారీ ప్రణాళికను సిద్ధం చేసింది. ఈ ప్రాజెక్ట్ కింద బెంగళూరులో 5 వేల ఫ్లాట్లను నిర్మించాలనే యోచనలో ఉంది. ఇది కేవలం నగరానికే పరిమితం కాకుండా.. కర్ణాటక వ్యాప్తంగా 1 లక్ష నివాస ప్లాట్లు, 10 వేల ఇళ్ల అభివృద్ధిని లక్ష్యంగా పెట్టుకున్న విస్తృత రాష్ట్ర స్థాయి గృహ ప్రణాళికలో భాగంగా ఉంది. మొత్తం ప్రాజెక్ట్‌కు అంచనా వ్యయం రూ. 8,778.50 కోట్లుగా ఉండగా, ఇందులో బెంగళూరు భాగానికి మాత్రమే దాదాపు రూ. 1,370 కోట్లు ఖర్చవుతాయని అంచనా వేస్తున్నారు.

ఈ గృహనిర్మాణ పథకం ముఖ్యంగా పని కోసం బెంగళూరుకు వలస వచ్చిన కార్మికులు, సేవా రంగ ఉద్యోగులు, తక్కువ ఆదాయ కుటుంబాలను దృష్టిలో పెట్టుకుని రూపొందించినట్లుగా అధికారులు చెబుతున్నారు. ప్రైవేట్ రియల్ ఎస్టేట్ మార్కెట్‌లో పెరిగిపోయిన ధరల వల్ల ఇల్లు కొనలేని పరిస్థితిలో ఉన్న వారికి సొంత ఇంటి కలను నిజం చేయడమే KHB లక్ష్యంగా పెట్టుకుంది.

ఈ ప్రాజెక్ట్‌లో ప్రధాన ఆకర్షణ ఫ్లాట్ల ధరను చెప్పుకోవచ్చు. ప్రస్తుత మార్కెట్ ధరలతో పోలిస్తే దాదాపు 50 శాతం తక్కువ ధరకే ఇళ్లను అందించనున్నారు. అధిక అద్దెలు, జీవన వ్యయాల భారం మోస్తున్న కుటుంబాలకు ఇంటి యాజమాన్యం సాధ్యమయ్యేలా చేయడమే ఈ ధర విధానం వెనుక ఉద్దేశంగా ప్రభుత్వం భావిస్తోంది. లగ్జరీ సౌకర్యాల కంటే, గౌరవప్రదమైన, స్థిరమైన నివాసం కల్పించడానికే ఈ ప్రాజెక్ట్ ప్రాధాన్యం ఇస్తుందని అధికారులు స్పష్టం చేస్తున్నారు.

ఈ ప్రాజెక్ట్ అమలుకు అవసరమైన భూమి విషయానికొస్తే.. బెంగళూరులోని వివిధ ప్రాంతాల్లో దాదాపు 230 ఎకరాలను ఇప్పటికే గుర్తించి కేటాయించారు. వీటిలో సూర్యనగర్‌లో 90 ఎకరాలు అతిపెద్ద భాగంగా ఉంది. BM కావల్‌లో 80 ఎకరాలు, లింగాపురలో 25 ఎకరాలు, దొన్నేనహళ్లిలో 15 ఎకరాలు, KR పురం సమీపంలోని కౌడేనహళ్లిలో 10 ఎకరాలు, అలాగే చుంచనకుప్పేలో మరో 10 ఎకరాలు ఉన్నాయి. నగరంలోని ఒకే ప్రాంతంలో కాకుండా, పరిధి, అభివృద్ధి చెందుతున్న మండలాల్లో గృహాలను విస్తరించడమే ఈ స్థల ఎంపిక వెనుక వ్యూహంగా చెప్పుకోవచ్చు.

భూసేకరణ విషయంలో కూడా హౌసింగ్ బోర్డు వివిధ మార్గాలను అనుసరించింది. అనేక ప్రాంతాల్లో 50:50 భూమి భాగస్వామ్య నమూనా ద్వారా భూ యజమానులతో ఒప్పందాలు కుదిరాయి. మిగిలిన చోట్ల బోర్డు నేరుగా భూమిని కొనుగోలు చేసింది. ఈ ప్రాజెక్ట్‌కు సంబంధించిన పూర్తి ప్రతిపాదన రాష్ట్ర ప్రభుత్వానికి సమర్పించగా.. ప్రస్తుతం తుది ఆమోదాల దశలో ఉంది. అనుమతులు లభించిన తర్వాత నిర్మాణ పనులు దశలవారీగా ప్రారంభమయ్యే అవకాశం ఉంది.

ప్రారంభ దశలో యలహంక, సూర్యనగర్, కెంగేరి, దేవనహళ్లి వంటి ప్రాంతాల్లో 5 వేల ఫ్లాట్ల నిర్మాణంపై ప్రత్యేక దృష్టి పెట్టనున్నారు. పారిశ్రామిక కార్మికులు, సేవా రంగ ఉద్యోగులు అధికంగా నివసించే ఈ ప్రాంతాల్లో గృహ అవసరాలు ఎక్కువగా ఉండటంతో, ఈ ప్రాజెక్ట్ వారికి పెద్ద మేలు చేయనుంది. ప్రణాళిక ప్రకారం ఈ పథకం అమలైతే, బెంగళూరులో గృహ స్థోమత సమస్యను కొంతవరకు తగ్గించి, నగరాన్ని ముందుకు నడిపిస్తున్న శ్రామిక వర్గానికి సొంత ఇంటి భరోసాను అందించే కీలక అడుగుగా నిలుస్తుందని రియల్ ఎస్టేట్ నిపుణులు అభిప్రాయపడుతున్నారు