Bengaluru: ఇన్వెస్టర్లకు పండగే: బెంగళూరులోని ఈ ప్రాంతాల్లో ఆస్తుల విలువ భారీగా జంప్!

బెంగళూరు (Bengaluru) అంటేనే ట్రాఫిక్ కష్టాలు, ఐటీ కంపెనీలు గుర్తొస్తాయి. కానీ ఇప్పుడు సిటీ ముఖచిత్రాన్ని మార్చేస్తూ 'నమ్మ మెట్రో' బ్లూ లైన్ పనులు శరవేగంగా సాగుతున్నాయి. ఈ మెట్రో లైన్ కేవలం ప్రయాణ సౌకర్యాన్ని మాత్రమే కాదు, రియల్ ఎస్టేట్ రంగంలో కూడా పెద్ద ప్రకంపనలు సృష్టిస్తోంది. ముఖ్యంగా ఔటర్ రింగ్ రోడ్ (ORR) , ఎయిర్‌పోర్ట్ రోడ్ పరిసరాల్లో ఆస్తుల ధరలు ఏకంగా 20 శాతం నుంచి 30 శాతం వరకు పెరిగే అవకాశం ఉందని నిపుణులు అంచనా వేస్తున్నారు.

బ్లూ లైన్ అంటే ఏమిటి? దీని ప్రత్యేకతలేంటి?

బ్లూ లైన్ మెట్రో అనేది దాదాపు 58.19 కిలోమీటర్ల పొడవైన భారీ కారిడార్. ఇది నగరం యొక్క దక్షిణ ప్రాంతాన్ని ఉత్తరాన ఉన్న కెంపేగౌడ అంతర్జాతీయ విమానాశ్రయంతో నేరుగా కలుపుతుంది. ఈ ప్రాజెక్టును రెండు దశల్లో పూర్తి చేస్తున్నారు..

• ఫేజ్ 2A: సెంట్రల్ సిల్క్ బోర్డ్ నుంచి కె.ఆర్ పురం వరకు.
• ఫేజ్ 2B: కె.ఆర్ పురం నుంచి ఎయిర్‌పోర్ట్ వరకు.

సుమారు ₹15,000 కోట్ల వ్యయంతో నిర్మిస్తున్న ఈ మార్గంలో మొత్తం 29 నుంచి 32 స్టేషన్లు ఉండబోతున్నాయి.

ఐటీ హబ్‌లలో పెరగనున్న డిమాండ్

బ్లూ లైన్ ప్రధానంగా ఐటీ కంపెనీలకు నిలయమైన బెల్లందూర్ (Bellandur) మీదుగా వెళ్తుంది. 2021లో ఇక్కడ చదరపు అడుగు ధర ₹6,800 ఉండగా, ఇప్పుడు అది ₹8,000 మార్కును దాటేసింది. మెట్రో అందుబాటులోకి వస్తే ఇక్కడ గ్రేడ్-ఏ ఆఫీస్ స్పేస్‌లు, లగ్జరీ అపార్ట్‌మెంట్‌లకు విపరీతమైన డిమాండ్ పెరుగుతుంది. అలాగే హెచ్‌ఎస్‌ఆర్ లేఅవుట్, సిల్క్ బోర్డ్ వంటి ప్రాంతాల్లో కొత్తగా కట్టడాలు చేపట్టడానికి స్థలం లేకపోయినా, మెట్రో కనెక్టివిటీ వల్ల అక్కడ అద్దెలు 10-15% పెరిగే అవకాశం ఉంది.

కె.ఆర్ పురం , హెబ్బాల్: భవిష్యత్తు ఇన్వెస్ట్‌మెంట్ జోన్లు

కె.ఆర్ పురం ఇప్పుడు కేవలం ఒక ట్రాన్సిట్ స్టేషన్ మాత్రమే కాదు, ఒక మెయిన్ డెవలప్‌మెంట్ జోన్‌గా మారుతోంది. ఇక్కడ ప్రాపర్టీ ధరలు 22-30% పెరగవచ్చని మార్కెట్ వర్గాల టాక్. ఇక హెబ్బాల్ (Hebbal) విషయానికి వస్తే, ఇది ఐటీ పార్కులకు, ఎయిర్‌పోర్ట్‌కు మధ్యలో ఉండటం వల్ల ఇక్కడ విల్లా ప్రాజెక్టులు, బిజినెస్ పార్కులు పుట్టుకొస్తున్నాయి. రాబోయే రెండేళ్లలో ఇక్కడ కనీసం 15-20% రేట్లు పెరగడం ఖాయం.

ఎయిర్‌పోర్ట్ కారిడార్‌ పై కన్నేయండి!

యలహంక నుంచి ఎయిర్‌పోర్ట్ వరకు ఉన్న ప్రాంతం ఇప్పుడు ఇన్వెస్టర్లకు హాట్ కేక్‌లా మారింది. ప్రస్తుతం ఇక్కడ భూమి కొంటే తక్షణమే అద్దె రాకపోయినా, లాంగ్ టర్మ్‌లో భారీ లాభాలను తెచ్చిపెడుతుంది. ఎయిర్‌పోర్ట్ దగ్గర ఉండటం, మెట్రో లైన్ తోడవడంతో భవిష్యత్తులో ఇక్కడ ఇంటర్నేషనల్ లెవల్ లాజిస్టిక్స్, వేర్‌హౌసింగ్ హబ్‌లు రానున్నాయి.

మొత్తానికి బెంగళూరు (Bengaluru) మెట్రో బ్లూ లైన్ పూర్తయితే, మెట్రో స్టేషన్‌కు 500-800 మీటర్ల లోపు ఉన్న ఆస్తుల విలువ గతంతో పోలిస్తే 50% నుంచి 70% వరకు పెరిగే ఛాన్స్ ఉంది. కాబట్టి బెంగళూరులో పెట్టుబడి పెట్టాలనుకునే వారికి ఇదే సరైన సమయం!