Bengaluru: తక్కువ అద్దెకు ఇల్లు కావాలా? రూ. 25 వేల లోపు 2BHK దొరికే ఏరియాలు ఇవే!

బెంగుళూరులో సాఫ్ట్‌వేర్ ఉద్యోగం సంపాదించడం ఒక ఎత్తయితే, ఉండటానికి సరైన అద్దె ఇల్లు వెతుక్కోవడం మరో ఎత్తు. ముఖ్యంగా కోరమంగళ, వైట్‌ఫీల్డ్, ఇందిరానగర్ వంటి ప్రైమ్ ఏరియాల్లో 2BHK అద్దెలు రూ. 40 వేలు దాటి సామాన్యులకు చుక్కలు చూపిస్తున్నాయి. అయితే మీరు సిటీ మెయిన్ హబ్‌లకు కొంచెం దూరంగా వెతకడానికి సిద్ధంగా ఉంటే, ఇప్పటికీ బెంగళూరు (Bengaluru) లో తక్కువ అద్దెకే మంచి ఇళ్లు దొరుకుతాయని స్థానిక బ్రోకర్లు చెబుతున్నారు.

అద్దెలు తక్కువగా ఉన్న ఏరియాలు ఇవే..

తాజా మార్కెట్ డేటా ప్రకారం, అట్టిబెలే, హోసా రోడ్, బొమ్మనహళ్లి, కార్మెలారామ్, సింగపుర, కొమ్మఘట్ట , సీవీ రామన్ నగర్ వంటి ప్రాంతాల్లో బడ్జెట్ ఫ్రెండ్లీ ఇళ్లు అందుబాటులో ఉన్నాయి. ఈ ఏరియాల్లో ఫర్నిషింగ్ , సౌకర్యాలను బట్టి 2BHK అద్దె నెలకు రూ. 20,000 నుండి రూ. 30,000 మధ్యలో ఉంటుంది. ఐటీ కారిడార్లకు కొంచెం దూరంగా ఉండటమే ఇక్కడ అద్దెలు తక్కువగా ఉండటానికి ప్రధాన కారణం.

ఐటీ హబ్‌ల బయట పెరుగుతున్న డిమాండ్

అట్టిబెలే లాంటి ప్రాంతాల్లోని గేటెడ్ కమ్యూనిటీలలో కూడా రూ. 20,000 కే 2BHK ఇళ్లు దొరుకుతున్నాయి. అలాగే దొడ్డబల్లాపూర్ మెయిన్ రోడ్ , కొప్పా గేట్ పరిసరాల్లో రూ. 25,000 నుండి రూ. 30,000 మధ్య అద్దెలు ఉన్నాయి. ఈస్ట్ బెంగుళూరులో కడుగుడి , నాగవరపాళ్య వంటి చోట్ల చిన్న అపార్ట్‌మెంట్లు తక్కువ ధరకే అందుబాటులో ఉన్నాయి. ఇవి పని చేసే ప్రదేశాలకు కాస్త దగ్గరగా ఉంటూనే, జేబుకు చిల్లు పడకుండా చూస్తాయి.

నెటిజన్ల రియాక్షన్: అద్దెలపై సోషల్ మీడియాలో చర్చ

ఈ అద్దెల పెరుగుదలపై నెటిజన్లు సోషల్ మీడియాలో పెద్ద ఎత్తున స్పందిస్తున్నారు. "బెంగుళూరులో ఇల్లు అద్దెకు తీసుకోవడం అంటే కిడ్నీ అమ్మినంత పనవుతోంది" అని ఒక యూజర్ సరదాగా కామెంట్ చేయగా, "సరైన ఏరియా ఎంచుకుంటే ఇప్పటికీ బడ్జెట్‌లో ఇళ్లు దొరుకుతాయి, కానీ ప్రయాణ సమయం పెరుగుతుంది" అని మరొకరు అభిప్రాయపడ్డారు. ముఖ్యంగా గేటెడ్ కమ్యూనిటీలలో సౌకర్యాలు బాగుంటాయి కాబట్టి అక్కడ అద్దెలు ఎక్కువగా ఉంటున్నాయి. ఒకవేళ మీరు లిఫ్ట్ వంటి సదుపాయాలు లేని స్వతంత్ర భవనాల్లో (Standalone buildings) ఉండగలిగితే, వైట్‌ఫీల్డ్ శివారులో లేదా బీటీఎం లేఅవుట్ వంటి చోట్ల రూ. 25 వేల లోపే 2BHK , రూ. 15 వేలకే 1BHK ఇళ్లు దొరికే అవకాశం ఉందని రియల్ ఎస్టేట్ నిపుణులు వివరిస్తున్నారు.

మొత్తంగా చూస్తే.. మెట్రో కనెక్టివిటీ పెరుగుతుండటంతో బెంగళూరు (Bengaluru) శివారు ప్రాంతాల్లో ఉండటం ఇప్పుడు ప్రయాణికులకు సులభం అవుతోంది. దీనివల్ల చాలా మంది ఐటీ ఉద్యోగులు సిటీ సెంటర్ నుంచి శివారు ప్రాంతాలకు మళ్లుతున్నారు. మీరు అద్దె తక్కువలో ఇల్లు కావాలనుకుంటే, కేవలం డిస్టెన్స్ మాత్రమే కాకుండా మెట్రో స్టేషన్లకు దగ్గరగా ఉండే ఏరియాలను ఎంచుకోవడం ఉత్తమం. ఇది మీ ప్రయాణ భారాన్ని తగ్గించడమే కాకుండా, నెలవారీ ఖర్చులను కూడా అదుపులో ఉంచుతుంది.