Bengaluru: టోక్యో, పారిస్‌లను దాటేసిన బెంగళూరు! ఆ విషయంలో ఇదే టాప్!

భారతదేశ సిలికాన్ వ్యాలీగా పిలవబడే బెంగళూరు(Bengaluru) నగరం మరో అంతర్జాతీయ మైలురాయిని అధిగమించింది. ప్రపంచంలోని అత్యుత్తమ టెక్ టాలెంట్ మార్కెట్లలో బెంగళూరు ఏకంగా 6 వ స్థానాన్ని కైవసం చేసుకుంది. 'కొలియర్స్ గ్లోబల్ టెక్ మార్కెట్స్ 2025' నివేదిక ప్రకారం.. మన బెంగళూరు నగరం పారిస్ (7వ స్థానం), బోస్టన్ (8వ స్థానం), టోక్యో (10వ స్థానం) వంటి దిగ్గజ నగరాలను వెనక్కి నెట్టి ఈ ఘనత సాధించింది. ఇప్పుడు ప్రపంచ టెక్ రంగంలో శాన్ ఫ్రాన్సిస్కో, లండన్, న్యూయార్క్ వంటి నగరాల సరసన బెంగళూరు నిలవడం గమనార్హం.

బెంగళూరు ఈ స్థాయికి చేరడానికి ప్రధాన కారణాలు..

బెంగళూరు నగరం కేవలం సాఫ్ట్‌వేర్ సేవలకే పరిమితం కాకుండా, గ్లోబల్ ఇన్నోవేషన్ హబ్‌గా మారింది. ఇందుకు మూడు ప్రధాన కారణాలు ఉన్నాయని నిపుణులు విశ్లేషిస్తున్నారు..

• భారీ టాలెంట్ పూల్: నగరంలో దాదాపు 10 లక్షల మందికి పైగా టెక్ ప్రొఫెషనల్స్ ఉన్నారు. ఆసియా-పసిఫిక్ రీజియన్‌లోనే ఇది అతిపెద్ద సంఖ్య. ఇందులో సుమారు 94,000 మంది ఏఐ (AI) నిపుణులు ఉండటం విశేషం.
• స్టార్టప్ ఎకోసిస్టమ్: 2,400కు పైగా యాక్టివ్ స్టార్టప్‌లు, 28కి పైగా యూనికార్న్ కంపెనీలతో బెంగళూరు స్టార్టప్ రాజధానిగా వెలుగొందుతోంది. ఏఐ, బిగ్ డేటా రంగాల్లో ఇక్కడ విపరీతమైన పెట్టుబడులు వస్తున్నాయి.
• గ్లోబల్ సెంటర్లు (GCCs): గూగుల్, మైక్రోసాఫ్ట్, అమెజాన్, మెటా , గోల్డ్‌మన్ సాక్స్ వంటి అంతర్జాతీయ సంస్థలు తమ అతిపెద్ద పరిశోధనా కేంద్రాలను (R&D) ఇక్కడే ఏర్పాటు చేశాయి. ఆసియాలోనే అమెజాన్ యొక్క రెండవ అతిపెద్ద కార్యాలయం బెంగళూరులోనే ఉండటం గమనార్హం.

రాజకీయ ప్రాధాన్యత ..

ఈ అద్భుత విజయంపై కర్ణాటక శాసనసభలో ఆసక్తికర చర్చ జరిగింది. ఉప ముఖ్యమంత్రి డి.కె. శివకుమార్ మాట్లాడుతూ, బెంగళూరు అభివృద్ధిని ఇతర నగరాలతో పోల్చలేమని పేర్కొన్నారు. "నేను హైదరాబాద్‌తో పోటీ పడాలనుకోవడం లేదు, బెంగళూరుకు ఉన్న కాస్మోపాలిటన్ క్యారెక్టర్, ఇక్కడి విద్యాసంస్థలు , దశాబ్దాల కృషితో ఏర్పడిన ఐటీ పునాది చాలా ప్రత్యేకం" అని ఆయన అన్నారు. ప్రస్తుతం నగరంలో 26 లక్షల మంది ఐటీ నిపుణులు, 250 ఇంజనీరింగ్ కాలేజీలు ఉండటమే దీనికి నిదర్శనమని ఆయన గుర్తు చేశారు.

గ్లోబల్ ర్యాంకింగ్స్ ఒకసారి చూస్తే..

1. శాన్ ఫ్రాన్సిస్కో బే ఏరియా
2. లండన్ ...
3. బీజింగ్
4. బెంగళూరు (Bengaluru)
5. పారిస్
6. బోస్టన్
7. టోక్యో

కేవలం ఐటీ సేవలే కాకుండా, కమర్షియల్ రియల్ ఎస్టేట్‌లో కూడా బెంగళూరు అగ్రస్థానంలో ఉంది. ఆఫీస్ స్పేస్ డిమాండ్ పరంగా దేశంలోనే బెంగళూరు నంబర్ వన్‌గా కొనసాగుతోంది. వెంచర్ క్యాపిటల్ ఫండింగ్, టాలెంట్ అవైలబిలిటీ , రీసెర్చ్ అండ్ డెవలప్‌మెంట్ వంటి అంశాల్లో బెంగళూరు ప్రపంచ స్థాయి ప్రమాణాలను అందుకుంటోంది. అయితే ఇంతటి వేగవంతమైన వృద్ధిని తట్టుకోవాలంటే మౌలిక సదుపాయాలైన రవాణా వ్యవస్థ, పబ్లిక్ సర్వీసెస్ , పట్టణ ప్రణాళికలో మార్పులు అవసరమని నిపుణులు హెచ్చరిస్తున్నారు.