Click it and Unblock the Notifications
బెంగళూరు వాసులకు గుడ్ న్యూస్.. ఆస్తుల రిజిస్ట్రేషన్‌కు కొత్త ప్లాన్.. రిజిస్ట్రేషన్ ఆఫీసుల్లో క్యూలైన్లకు చెక్
Bengaluru Property Registration: ఆస్తి నమోదు (Property Registration) కార్యాలయాలలో మౌలిక వసతులను మెరుగుపరచడంతో పాటు పౌరులకు ఎలాంటి ఇబ్బందులు లేని మెరుగైన సేవలను అందించేందుకు కర్ణాటక ప్రభుత్వం కీలక నిర్ణయం తీసుకుంది. పాస్‌పోర్ట్ సేవా కేంద్రం (PSK) నమూనాను పూర్తిగా అనుసరిస్తూ.. ప్రభుత్వ-ప్రైవేట్ భాగస్వామ్యం (PPP) చట్రం కింద బెంగళూరులో ఐదు మోడల్ సబ్-రిజిస్ట్రార్ కార్యాలయాలను (SROs) ఏర్పాటు చేయడానికి రాష్ట్ర ప్రభుత్వం యోచిస్తోంది.
ఈ ప్రాజెక్ట్ సాధ్యాసాధ్యాలను అంచనా వేయడానికి.. తగిన పీపీపీ నిర్మాణాన్ని సిఫార్సు చేయడానికి, ప్రైవేట్ భాగస్వామిని ఎంపిక చేయడంలో సహాయపడటానికి స్టాంపులు, రిజిస్ట్రేషన్ల శాఖ త్వరలో ఒక లావాదేవీ సలహాదారుని (Transaction Advisor) నియమించనుంది. ఆధునిక మౌలిక సదుపాయాలు, ఆహ్లాదకరమైన వేచి ఉండే ప్రదేశాలు, రిసెప్షన్ సౌకర్యాలు, పౌర సహాయ కేంద్రాలు, అత్యుత్తమ సేవల పంపిణీపై ప్రధానంగా దృష్టి సారించి ఈ ఐదు కార్యాలయాలను ఒక పైలట్ ప్రాజెక్ట్‌గా అభివృద్ధి చేయనున్నారు.
రిజిస్ట్రేషన్ ఇన్‌స్పెక్టర్ జనరల్, స్టాంప్స్ కమిషనర్ ముల్లై ముహిలన్ ఎంపీ మనీకంట్రోల్‌తో మాట్లాడుతూ.. గాంధీ నగర్, శివాజీ నగర్, రాజాజీ నగర్, జయనగర్, బసవనగుడిలోని జిల్లా రిజిస్ట్రార్ కార్యాలయాల పరిధిలో ఒక్కొక్కటి చొప్పున ఐదు మోడల్ ఎస్‌ఆర్ఓలను ఏర్పాటు చేయాలని మేము భావిస్తున్నామని తెలిపారు. ఈ కార్యాలయాలు ఇప్పటికే ఉన్న ఎస్‌ఆర్ఓలను ఉన్నతీకరించడం కాకుండా, పూర్తిగా కొత్త సౌకర్యాలుగా ఉంటాయని ఆయన స్పష్టం చేశారు. పాస్‌పోర్ట్ సేవా కేంద్రాల మాదిరిగానే ప్రవేశ నియంత్రణ (Entry Control), మెరుగైన సందర్శకుల సౌకర్యాలతో రిజిస్ట్రేషన్ కార్యాలయాల రూపురేఖలను పూర్తిగా మార్చడమే దీని ప్రధాన ఉద్దేశంగా కనిపిస్తోంది.
సౌకర్యాల కల్పన, నిర్వహణ బాధ్యతలను ప్రైవేట్ రంగ భాగస్వామికి అప్పగించనున్నప్పటికీ.. చట్టబద్ధమైన రిజిస్ట్రేషన్ విధులు, నియంత్రణ అధికారాలు మాత్రం పూర్తిగా రాష్ట్ర ప్రభుత్వానికే ఉంటాయి. సబ్-రిజిస్ట్రార్ కార్యాలయాల్లో తరచుగా కనిపించే పొడవైన క్యూలు, జాప్యం, అవినీతి, మధ్యవర్తుల ప్రమేయంపై వస్తున్న ఫిర్యాదులకు చెక్ పెట్టడమే లక్ష్యంగా ఈ చర్య తీసుకున్నారు. కాగా, మహారాష్ట్ర ప్రభుత్వం కూడా ఇదే తరహాలో VFS గ్లోబల్, WE ఎక్సెల్ సాఫ్ట్‌వేర్‌ల కన్సార్టియంతో కలిసి రాష్ట్రవ్యాప్తంగా 60 మోడల్ ఎస్‌ఆర్ఓలను ఏర్పాటు చేయడానికి ఐదేళ్ల కాంట్రాక్టును ఖరారు చేయడం గమనార్హం.
నియమించబడే లావాదేవీ సలహాదారు ఆయా ప్రదేశాలలో రిజిస్ట్రేషన్ల సంఖ్య, పౌరుల రాకపోకలు, మౌలిక వసతుల అవసరాలు, డిమాండ్‌ను సమగ్రంగా అంచనా వేస్తారు. అంతేకాకుండా, మూలధన, నిర్వహణ వ్యయం, ప్రధాన ఆదాయ మార్గాలు, ప్రభుత్వం - ప్రైవేట్ భాగస్వామి మధ్య ఆదాయ-భాగస్వామ్య (Revenue-Sharing) యంత్రాంగాన్ని ఈ సలహాదారు సిఫార్సు చేస్తారు. ఇరు పక్షాల బాధ్యతలు, సేవా ప్రమాణాలు, పనితీరు సూచికలను కూడా వీరు ఖరారు చేస్తారు. అయితే, దీనికి సంబంధించిన ఖచ్చితమైన పెట్టుబడి అవసరాలు, ఆదాయ-భాగస్వామ్య విధానం, ప్రైవేట్ సేవల కోసం అనుమతించదగిన ఛార్జీలను ఇంకా అధికారికంగా నిర్ణయించాల్సి ఉంది.
Sign in with Google