బెంగళూరు ప్రయాణికులకు కీలక అప్‌డేట్.. 45 రోజుల పాటు ORR రోడ్ మూసివేత, ప్రత్యామ్నాయ మార్గాలు ఇవే..

బెంగళూరులో ఇటీవలి ట్రాఫిక్ మార్పులు, మెట్రో నిర్మాణం, సిగ్నల్ సమకాలీకరణ ప్రణాళికలతో సహా అనేక కీలక మార్పులు చోటుచేసుకుంటున్నాయి. తాజాగా బెంగళూరు మెట్రో రైల్ కార్పొరేషన్ లిమిటెడ్ (BMRCL) చేపడుతున్న మెట్రో స్టేషన్ నిర్మాణ పనుల కారణంగా.. నగరంలోని అత్యంత రద్దీగా ఉండే ఔటర్ రింగ్ రోడ్ (ORR) పై సర్వీస్ లేన్‌ను తాత్కాలికంగా మూసివేయాల్సిన పరిస్థితి ఏర్పడింది.

తాజాగా బెంగళూరు ట్రాఫిక్ పోలీసులు ఈ మార్పులపై అధికారిక అడ్వైజరీని విడుదల చేశారు. హిందూస్తాన్ టైమ్స్ నివేదిక ప్రకారం మూసివేయబడిన సర్వీస్ లేన్ 9వ మెయిన్ రోడ్ జంక్షన్ నుండి 5వ మెయిన్ రోడ్ జంక్షన్ వరకు ఉంది. ఈ మూసివేత అక్టోబర్ 6 నుండి 45 రోజుల పాటు అమల్లో ఉంటుంది. దీని ప్రధాన కారణం కొనసాగుతున్న మెట్రో స్టేషన్ నిర్మాణం అని చెప్పవచ్చు.ఇది ఇబ్లూర్ నుండి సిల్క్ బోర్డ్ జంక్షన్ వైపుకు వెళ్తున్న వాహనదారులపై నేరుగా ప్రభావం చూపుతుంది.

దీంతో పోలీసులు వాహనదారులకు రెండు ప్రత్యామ్నాయ మార్గాలను సూచించారు. అవేంటంటే.. 14వ మెయిన్ రోడ్ ఫ్లైఓవర్ గుండా ప్రయాణించి ప్రధాన రహదారి వెంట 5వ మెయిన్ రోడ్ జంక్షన్ చేరుకోవడం. లేదా HSR లేఅవుట్ అంతర్గత రహదారులు ఉపయోగించి సిల్క్ బోర్డ్ మరియు హోసూర్ మెయిన్ రోడ్ వైపు వెళ్లడం. అదే సమయంలో, అధికారులు డ్రైవర్లకు పలు సూచనలు కూడా సూచించారు. మళ్లింపు మార్గాలను కచ్చితంగా పాటించి, రద్దీని తగ్గించడంలో సహకరించాలని. ట్రాఫిక్ పోలీసులు హెచ్చరించారు. ప్రధాన రహదారి (main carriageway) మీద వాహన రద్దీ పెరగవచ్చని, కాబట్టి ప్రయాణికులు ముందుగానే తమ మార్గాలను ప్లాన్ చేసుకోవాలని సూచించారు.

ఈ సమయంలో, మరో ముఖ్యమైన అభివృద్ధి సిగ్నల్ సమకాలీకరణ (Signal Synchronization) ప్రణాళిక రూపంలో ప్రారంభమైంది. Bengaluru ట్రాఫిక్ శాఖ డిప్యూటీ కమిషనర్ (వెస్ట్ డివిజన్) అనూప్ ఎ. శెట్టి, IPS.. తాజాగా X (Twitter) లో ఈ కొత్త వ్యవస్థ ఎలా పనిచేస్తుందో చూపించే వీడియోను పంచుకున్నారు.ఈ కొత్త సిస్టమ్ కింద JC రోడ్, NR జంక్షన్, PS జంక్షన్, పోలీస్ కార్నర్ జంక్షన్ వంటి కీలక ప్రాంతాల్లో సిగ్నల్‌లు ఒకదానితో ఒకటి సమకాలీకరించబడతాయి. రద్దీ లేని సమయాల్లో వాహనాలు ఒక సిగ్నల్ నుండి మరొకదానికి వెళ్లేటప్పుడు వరుసగా గ్రీన్ లైట్లు దొరకేలా చేయడమే దీని లక్ష్యమని శెట్టి తెలిపారు. ఈ సిగ్నల్ సమకాలీకరణ రద్దీ లేని సమయాల్లో ప్రతి సిగ్నల్ వద్ద వాహనాలు ఆగకుండా సజావుగా ప్రయాణించేందుకు అనుకూలంగా ఉంటుంది. ఇది నగర ట్రాఫిక్ వ్యవస్థలో సాంకేతిక పురోగతి వైపు ఒక పెద్ద అడుగు అన్నారు.

ట్రాఫిక్ శాఖ అంచనా ప్రకారం.. ఈ ప్రణాళిక అమలులోకి వస్తే టౌన్‌హాల్ నుంచి నృపతుంగా రోడ్ వరకు ప్రయాణ సమయం గణనీయంగా తగ్గుతుంది. అంతేకాకుండా ఈ పద్ధతి మరిన్ని జంక్షన్లలో విజయవంతమైతే భవిష్యత్తులో నగరంలోని ఇతర రద్దీ ప్రాంతాల్లో కూడా అమలు చేసే అవకాశం ఉంది.

క్లుప్తంగా చెప్పాలంటే మెట్రో పనుల కారణంగా ORR సర్వీస్ రోడ్ తాత్కాలికంగా మూసివేయడం వల్ల ప్రయాణికులు కొంత అసౌకర్యం ఎదుర్కొనవచ్చునేమో, కానీ దీని వెనుక ఉన్న ఉద్దేశ్యం నగర రవాణా వ్యవస్థను దీర్ఘకాలంలో మెరుగుపరచడం అని చెప్పవచ్చు. అదే సమయంలో సిగ్నల్ సమకాలీకరణ ప్రాజెక్ట్ ద్వారా ట్రాఫిక్ క్రమాన్ని సుస్థిరం చేయడంలో బెంగళూరు పోలీస్ శాఖ కొత్త మార్గాలను అన్వేషిస్తోంది.

కథనంలో కీలక వఅంశాలు
ORR సర్వీస్ లేన్ మూసివేత : అక్టోబర్ 6 నుంచి 45 రోజులు
ప్రత్యామ్నాయ మార్గాలు : 14వ మెయిన్ రోడ్ ఫ్లైఓవర్ లేదా HSR లేఅవుట్ అంతర్గత రహదారులు
కొత్త సిగ్నల్ సమకాలీకరణ : JC రోడ్ నుంచి పోలీస్ కార్నర్ జంక్షన్ వరకు
లక్ష్యం : రద్దీ తగ్గించడం, సజావుగా ట్రాఫిక్ ప్రవాహం నిర్వహించడం