బెంగళూరులో ఎబోలా వైరస్ కలకలం.. ఉగాండా నుంచి వచ్చిన మహిళకు వైరస్ లక్షణాలు..

ప్రపంచవ్యాప్తంగా ఎబోలా వైరస్ భయాందోళనలు రేకెత్తిస్తున్న తరుణంలో, సిలికాన్ సిటీ బెంగళూరులో ఒక అనుమానిత కేసు వెలుగుచూడటం తీవ్ర కలకలం సృష్టించింది. ఆఫ్రికా దేశమైన ఉగాండా నుండి ఇటీవల నగరానికి వచ్చిన 28 ఏళ్ల ఓ మహిళలో ఎబోలాను పోలిన లక్షణాలు కనిపించడంతో కర్ణాటక ఆరోగ్య శాఖ అధికారులు అప్రమత్తమయ్యారు.

ఎబోలా తీవ్రంగా వ్యాపిస్తున్న ప్రాంతం నుండి ఆమె ప్రయాణించి రావడం, దానికి తోడు ఒళ్లు నొప్పుల వంటి ప్రాథమిక లక్షణాలు బయటపడటంతో అధికారులు ఏమాత్రం ఆలస్యం చేయకుండా నివారణ చర్యలు చేపట్టారు. హోటల్‌లో ఉంటున్న ఆమెను ముందుజాగ్రత్తగా బెంగళూరులోని ప్రభుత్వ ఆధ్వర్యంలో నడుస్తున్న అంటువ్యాధుల ఆసుపత్రిలోని ప్రత్యేక వార్డుకు తరలించారు.

ప్రస్తుతం ఆ మహిళను నిపుణులైన వైద్య బృందం నిశితంగా పర్యవేక్షిస్తోంది. నిబంధనల ప్రకారం ఆమె శరీర నమూనాలను సేకరించిన అధికారులు, అత్యంత ఖచ్చితమైన నిర్ధారణ కోసం పుణెలోని ప్రసిద్ధ 'నేషనల్ ఇన్‌స్టిట్యూట్ ఆఫ్ వైరాలజీ' (NIV)కి పంపించారు. ఈ పరీక్షల నివేదికల కోసం ఆరోగ్య శాఖ వేచి చూస్తోంది. వైద్య ప్రోటోకాల్స్ ప్రకారం మొదటి ఫలితం వచ్చిన తర్వాత కూడా మరింత స్పష్టత కోసం పునఃపరీక్ష (రీ-టెస్ట్) నిర్వహిస్తామని అధికారులు వెల్లడించారు.

అయితే ప్రస్తుతానికి బాధితురాలి ఆరోగ్యం నిలకడగానే ఉందని, ప్రజలు ఆందోళన చెందాల్సిన అవసరం లేదని వారు స్పష్టం చేశారు. ఒకవేళ ఎవరికైనా ఇలాంటి లక్షణాలు కనిపిస్తే వెంటనే సమీప ఆరోగ్య కేంద్రాలను సంప్రదించాలని, వారి కోసం ప్రత్యేక 'రాపిడ్ రెస్పాన్స్ టీమ్‌లు' (RRTలు) క్షేత్రస్థాయిలో సిద్ధంగా ఉన్నాయని తెలిపారు.

ఈ పరిణామాల నేపథ్యంలో కర్ణాటక ప్రభుత్వం రాష్ట్రవ్యాప్తంగా హై అలర్ట్ ప్రకటించింది. ముఖ్యంగా విదేశీ ప్రయాణికులు ఎక్కువగా వచ్చే బెంగళూరు, మంగళూరు నగరాల్లో కఠిన నిఘా ఏర్పాటు చేశారు. బెంగళూరులోని రాజీవ్ గాంధీ ఛాతీ వ్యాధుల సంస్థ (RGICD)ను అత్యవసర ఐసోలేషన్ కేంద్రంగా మార్చగా, అంటువ్యాధుల ఆసుపత్రిని క్వారంటైన్, ప్రత్యేక చికిత్సా కేంద్రంగా సిద్ధం చేశారు. అటు తీరప్రాంత నగరమైన మంగళూరులో కూడా శ్రీనివాస్ పోర్ట్ ఆసుపత్రిని క్వారంటైన్ కేంద్రంగా, వెన్లాక్ జిల్లా ఆసుపత్రిని ఐసోలేషన్ సెంటర్‌గా మార్చారు. ఆఫ్రికా దేశాల నుండి వచ్చే ప్రతి ఒక్కరూ తప్పనిసరిగా 21 రోజుల పాటు స్వీయ నిర్బంధం (సెల్ఫ్ క్వారంటైన్) పాటించాలని, సొంతంగా ఆరోగ్య పర్యవేక్షణ చేసుకోవాలని ప్రభుత్వం కఠిన ఆదేశాలు జారీ చేసింది.

Also Read

ఏపీలో ఎబోలా వైరస్‌పై హై అలర్ట్.. అప్రమత్తంగా ఉండాలని ప్రజలకు సూచన.. విదేశీ ప్రయాణికులపై ప్రత్యేక నిఘా..

భారత్‌లోనే కాకుండా ప్రపంచవ్యాప్తంగా కూడా ఈ మహమ్మారి పట్ల దేశాలు వణుకుతున్నాయి. కాంగో, ఉగాండా, దక్షిణ సూడాన్ దేశాలలో ఎబోలా తీవ్రత రోజురోజుకూ పెరుగుతుండటంతో ప్రపంచ ఆరోగ్య సంస్థ (WHO) ఇప్పటికే దీనిని "అంతర్జాతీయ ఆందోళన కలిగించే ప్రజారోగ్య అత్యవసర పరిస్థితి" (PHEIC)గా ప్రకటించింది. ఈ నేపథ్యంలో కెనడా ప్రభుత్వం అత్యంత కఠినమైన చర్యలకు పూనుకుంది. ఎబోలా ప్రభావిత దేశాల నుండి వచ్చే ప్రయాణికులపై ఆగస్టు 29 వరకు వర్తించేలా 21 రోజుల నిర్బంధ స్వీయ క్వారంటైన్ నియమాన్ని విధించింది. అంతేకాదు, కాంగో, సూడాన్, ఉగాండా దేశాల నుండి వచ్చే ప్రజల వలస (ఇమ్మిగ్రేషన్) దరఖాస్తులపై తుది నిర్ణయాలను 90 రోజుల పాటు నిలిపివేస్తూ కెనడా పబ్లిక్ హెల్త్ ఏజెన్సీ సంచలన నిర్ణయం తీసుకుంది.

ప్రస్తుతం ఈ ఆఫ్రికన్ మహమ్మారి ఈశాన్య కాంగోలో విలయతాండవం చేస్తోంది. అక్కడ వ్యాపిస్తున్నది అత్యంత అరుదైన, ప్రమాదకరమైన ఎబోలా రకం కావడంతో ప్రపంచవ్యాప్తంగా వైద్య రంగానికి పెద్ద సవాలుగా మారింది. ఇప్పటికే అక్కడ 900కు పైగా అనుమానిత కేసులు నమోదు కాగా, 220 మందికి పైగా ప్రాణాలు కోల్పోయారు. అంతర్జాతీయ సంస్థలు సహాయక చర్యలు ముమ్మరం చేసినప్పటికీ, వైరస్ వ్యాప్తి వేగం వాటన్నింటినీ మించిపోతోందని ప్రపంచ ఆరోగ్య సంస్థ తీవ్ర ఆందోళన వ్యక్తం చేసింది. ఈ మహమ్మారి ముప్పు మరికొన్ని నెలల పాటు ప్రపంచాన్ని వెంటాడే అవకాశం ఉందని నిపుణులు హెచ్చరిస్తున్నారు.