బెంగళూరులో ఈ ఏరియాలో ప్రయాణించే వారికి బిగ్ షాక్.. అమాంతం పెరిగిన టోల్ ఛార్జీలు.. ఎంతలా అంటే..

బెంగళూరు నగరంతో మధ్య- తీరప్రాంత కర్ణాటక జిల్లాలను అనుసంధానించే అత్యంత కీలకమైన నెలమంగళ-హాసన్ జాతీయ రహదారి-75 (NH-75) పై ప్రయాణించే వాహనదారులకు గట్టి ఎదురుదెబ్బ తగిలింది. నేషనల్ హైవేస్ అథారిటీ ఆఫ్ ఇండియా (NHAI) నెలామంగళ-దేవరహళ్లి ఎక్స్‌ప్రెస్‌వే పరిధిలోని టోల్ ప్లాజాల వద్ద రుసుములను పెంచుతూ నిర్ణయం తీసుకుంది. ఈ సవరించిన టోల్ ఛార్జీలు సెప్టెంబర్ 1వ తేదీ అర్ధరాత్రి నుంచే అధికారికంగా అమలులోకి వచ్చాయి.

ఈ పెంపు వల్ల ఈ మార్గంలో ప్రతిరోజూ ప్రయాణించే ఉద్యోగులు, పర్యాటకులు, సరుకు రవాణా చేసే వాణిజ్య వాహనదారుల జేబులకు చిల్లు పడనుంది. Bengaluru నెలమంగళ దేవిహళ్లి ఎక్స్‌ప్రెస్‌వే ప్రైవేట్ లిమిటెడ్ పర్యవేక్షణలో నిర్వహించబడుతున్న ఈ మార్గంలోని దొడ్డకరేనహళ్లి, కర్బైలు టోల్ ప్లాజాల వద్ద అన్ని రకాల వాహన వర్గాలకు ప్రాథమికంగా రూ. 5 మేర రుసుమును పెంచారు.

సవరించిన కొత్త టోల్ ధరల వివరాలు:

కార్లు, జీపులు, వ్యాన్లు (తేలికపాటి వాహనాలు): ఫాస్టాగ్ (FASTag) ద్వారా ఒకవైపు ప్రయాణానికి (Single Journey) ఇకపై రూ. 60 చెల్లించాల్సి ఉంటుంది. అదే రోజు తిరుగు ప్రయాణానికి (Return Journey) ఛార్జీని రూ. 85 నుండి రూ. 90కి పెంచారు.
తేలికపాటి వాణిజ్య వాహనాలు (LCV/LGV): ఒకవైపు ప్రయాణానికి రూ. 100 నుండి రూ. 105కి పెరిగింది. అదే రోజు డే పాస్ (Day Pass) ధర రూ. 155గా నిర్ణయించారు.
బస్సులు, ట్రక్కులు: ఒక ప్రయాణానికి సవరించిన టోల్ రుసుము రూ. 205 కాగా, డే పాస్‌కు రూ. 310 ఖర్చవుతుంది.
మల్టీ-యాక్సిల్, భారీ వాహనాలు: ఒకవైపు ప్రయాణానికి రూ. 330 కాగా, అదే రోజు తిరుగు ప్రయాణపు డే పాస్‌కు రూ. 495 వసూలు చేయనున్నారు.

Also Read

బెంగళూరులో ఆటో ఛార్జీల బాదుడు.. బైక్ ట్యాక్సీల కొరతతో ప్రయాణికుల నానా అవస్థలు..

ధరల పెంపునకు కారణాలు - వాహనదారుల ఆగ్రహం:

ద్రవ్యోల్బణం, రహదారుల నిర్వహణ, పునరుద్ధరణ, మరమ్మతు వ్యయాలు నిరంతరం పెరుగుతున్న నేపథ్యంలో వినియోగదారుల రుసుముల వార్షిక సర్దుబాటులో (Annual Adjustment) భాగంగానే ఈ టోల్ పెంపును చేపట్టినట్లు ఎన్‌హెచ్‌ఏఐ వర్గాలు వివరణ ఇచ్చాయి. రహదారి నాణ్యతను కాపాడటానికి, మెరుగైన మౌలిక సదుపాయాలను అందించడానికే అదనపు ఆదాయం సమకూర్చుకుంటున్నట్లు తెలిపాయి.

అయితే ఈ పెంపుపై క్రమం తప్పకుండా ప్రయాణించే వాహనదారులు, ట్రాన్స్‌పోర్టర్లు తీవ్ర నిరసన వ్యక్తం చేస్తున్నారు. ఇప్పటికే ఇంధన ధరలు, నిత్యావసర సరుకుల ధరల భారంతో సతమతమవుతుంటే, వరుసగా టోల్ ఛార్జీలు పెంచడం సరికాదని మండిపడుతున్నారు. కేవలం రూ. 5 పెంపుగా పైకి కనిపిస్తున్నప్పటికీ.. నిత్యం రాకపోకలు సాగించే వాణిజ్య వాహనదారులకు నెలవారీ బడ్జెట్‌లో ఇది పెను భారంగా మారుతుందని వాపోతున్నారు.