బెంగళూరు ట్రాఫిక్ సమస్యకు గుడ్ బై.. కొత్తగా 72 కిలోమీటర్ల పొడవైన మెట్రో కారిడార్‌ వచ్చేస్తోంది..

దేశ ఐటీ రాజధాని, సిలికాన్ సిటీ బెంగళూరు నగర రవాణా వ్యవస్థను మరింత విస్తరించేందుకు నమ్మ మెట్రో (BMRCL) ఒక భారీ ప్రణాళికను సిద్ధం చేసింది. నగర ఆగ్నేయ భాగంలో నిర్మించబోయే అంతర్జాతీయ క్రీడా సముదాయాన్ని కలుపుతూ.. 72 కిలోమీటర్ల పొడవైన మెట్రో కారిడార్‌ నిర్మాణం ప్రతిపాదనలో ఉంది. బెంగళూరు మెట్రో రైల్ కార్పొరేషన్ లిమిటెడ్ ఇప్పటికే బన్నెరఘట్ట రోడ్డులోని కలేన అగ్రహార నుండి వైట్‌ఫీల్డ్ సమీపంలోని కడుగోడి ట్రీ పార్క్ వరకు 68 కిలోమీటర్ల పొడవైన మార్గానికి సంబంధించిన సాధ్యాసాధ్యాల (Feasibility) నివేదికను సిద్ధం చేసింది.

ఈ మార్గం బన్నెరఘట్ట, జిగని, అత్తిబెలె, సర్జాపూర్, దొమ్మసంద్ర సర్కిల్, వర్తూర్ కోడి వంటి ప్రధాన ప్రాంతాలను కలుపుతూ వెళ్లనుంది. ఈ లైన్‌ నగరంలోని పలు ఐటీ కారిడార్‌లను, రియల్ ఎస్టేట్ అభివృద్ధి చెందుతున్న ప్రాంతాలను కూడా కలుపుతుంది. ఈ ప్రాజెక్టును ఢిల్లీలోని ఇంట్రోసాఫ్ట్ సొల్యూషన్స్ ప్రైవేట్ లిమిటెడ్ రూపొందిస్తోంది. ఈ సంస్థ అలైన్‌మెంట్, ట్రాఫిక్ డిమాండ్, భూసేకరణ, ఖర్చు అంచనా, స్టేషన్ల సంఖ్య, ప్రయాణికుల సంఖ్య (రైడర్‌షిప్) వంటి అంశాలపై అధ్యయనం చేసింది.

ఇదే సమయంలో ఆనేకల్ తాలూకాలోని ఇండ్లవాడి సూర్య సిటీ ఫేజ్ 4లో రూ. 2,350 కోట్ల వ్యయంతో అంతర్జాతీయ క్రీడా సముదాయం నిర్మాణానికి రాష్ట్ర కేబినెట్ ఆమోదం తెలిపింది. ఈ క్రీడా సముదాయానికి మెట్రో లింక్‌ను కల్పించాలనే సూచన ప్రభుత్వం నుంచి రావడంతో.. BMRCL ఈ ప్రాజెక్టులో ఒక 3.5-నుంచి 4 కిమీ స్పర్ లైన్ ను చేర్చాలని నిర్ణయించింది. ఈ లైన్ జిగని తర్వాత అనేకల్ వైపు విడిపోయి నేరుగా స్టేడియంకు చేరేలా ఉంటుందని BMRCL అధికారులు తెలిపారు.

ఈ స్పర్ లైన్ జిగని తర్వాత విడిపోయి స్టేడియంకు చేరుతుంది. బన్నెరఘట్ట, అనేకల్ నుండి వచ్చే ప్రయాణికులు నేరుగా క్రీడా సముదాయానికి చేరవచ్చు. ప్రధాన లైన్ యథాతథంగా కొనసాగుతుంది, కానీ స్పర్ లైన్‌కు ప్రత్యేక రైళ్లు నడుస్తాయని అధికారులు తెలిపారు. ఈ అంతర్జాతీయ క్రీడా సముదాయం 80 వేల మంది సామర్థ్యం గల క్రికెట్ స్టేడియం, 24 ఇండోర్, అవుట్‌డోర్ క్రీడలకు సౌకర్యాలు, అలాగే 30 వేల సీట్ల ఆడిటోరియంతో ప్రత్యేకంగా రూపొందించారు. దీని వివరణాత్మక ప్రాజెక్టు నివేదిక (DPR) రూపొందించే బాధ్యతను రాష్ట్ర గృహనిర్మాణ శాఖ చేపట్టింది.

BMRCL తన సాధ్యాసాధ్యాల నివేదికను అక్టోబర్ చివరి నాటికి రాష్ట్ర ప్రభుత్వానికి సమర్పించనుంది. రాష్ట్రం ఆమోదం ఇచ్చిన తర్వాత DPR తయారీ దశ మొదలవుతుంది. సాధారణంగా ఈ దశకు ఏడాది సమయం పడుతుంది. తర్వాత రాష్ట్ర, కేంద్ర ప్రభుత్వ అనుమతులు రావడానికి మరో రెండు సంవత్సరాలు పట్టవచ్చు. ఈ ప్రక్రియ పూర్తయిన తర్వాత, నిర్మాణ పనులు 2029 నాటికి ప్రారంభమవుతాయని, ప్రాజెక్టు పూర్తవ్వడానికి మరో ఐదు నుంచి పది సంవత్సరాలు పట్టవచ్చని అధికారులు అంచనా వేస్తున్నారు.

ఈ 72 కిమీ కారిడార్‌లో భూగర్భ, ఎలివేటెడ్ (Elevated) సెక్షన్‌లు రెండూ ఉంటాయి. అదనంగా ఇది సర్జాపూర్‌లోని SWIFT సిటీ (Startups, Workshops కోసం ప్రతిపాదిత 1,000 ఎకరాల టౌన్‌షిప్)ను కూడా కలుపుతుంది. ఈ లైన్‌లో 50 కంటే ఎక్కువ స్టేషన్లు ఉండే అవకాశం ఉంది. ఈ కారిడార్‌ గృహనిర్మాణం, పట్టణ వ్యవహారాల మంత్రిత్వ శాఖ (MoHUA) సూచించిన 210.9 కిమీ మాస్టర్ ప్లాన్‌లో భాగంగా ఉంది.

ఈ మాస్టర్ ప్లాన్‌లో ఆరు పొడిగింపులు, రెండు కొత్త లైన్లు ఉన్నాయి. పూర్తయిన తర్వాత, Bengaluru మెట్రో నెట్‌వర్క్ 467.69 కిలోమీటర్లకు చేరనుంది. ఇది ఢిల్లీ-ఎన్‌సిఆర్ మెట్రో ప్రణాళిక చేసిన 467 కిలోమీటర్లతో సమానంగా ఉంటుంది. ఈ ప్రాజెక్టు అమలు అయితే బెంగళూరు ప్రజా రవాణాలో విప్లవాత్మక మార్పు చోటుచేసుకునే అవకాశం ఉంది. నగర ట్రాఫిక్ ఒత్తిడి తగ్గి, ఐటీ హబ్‌ల మధ్య రాకపోకలు వేగవంతమవుతాయి. అంతర్జాతీయ క్రీడా సముదాయానికి నేరుగా మెట్రో సౌకర్యం అందించడం, బెంగళూరును క్రీడా, టెక్నాలజీ రాజధానిగా ముందు వరసలో నిలపనుంది.