Vande Bharat: బెంగళూరు టూ ముంబై వందే భారత్ స్లీపర్ వచ్చేస్తోంది! రూట్ మ్యాప్ ఇదే!

బెంగళూరు, ముంబై నగరాల మధ్య ప్రయాణించే వారికి ఇండియన్ రైల్వేస్ అదిరిపోయే తీపి కబురు అందించింది. ఎంతో కాలంగా ఎదురుచూస్తున్న వందే భారత్ (Vande Bharat) స్లీపర్ రైలు సర్వీసును ఈ మార్గంలో ప్రారంభించేందుకు రైల్వే శాఖ గ్రీన్ సిగ్నల్ ఇచ్చింది. రైల్వే మంత్రి అశ్విని వైష్ణవ్ ఈ ప్రతిపాదనకు ఆమోదం తెలుపుతూ బెంగళూరు సెంట్రల్ ఎంపీ పి.సి. మోహన్‌కు అధికారికంగా లేఖ రాశారు. దీనివల్ల రెండు ఆర్థిక హబ్‌ల మధ్య ప్రయాణ సమయం గణనీయంగా తగ్గనుంది.

ఉద్యాన్ ఎక్స్‌ప్రెస్‌కు ప్రత్యామ్నాయంగా..

ప్రస్తుతం బెంగళూరు-ముంబై మధ్య 1983లో ప్రారంభమైన ఉద్యాన్ ఎక్స్‌ప్రెస్ ప్రధాన రైలు సర్వీసుగా ఉంది. ఈ రైలు 1,139 కిలోమీటర్ల దూరం ప్రయాణించడానికి దాదాపు 22 గంటలకు పైగా సమయం తీసుకుంటుంది. సాంకేతికత మారినా, ట్రాక్ సామర్థ్యం కారణంగా ఈ వేగం పెరగలేదు. ప్రైవేట్ బస్సులు 16 గంటల్లోనే చేరుకుంటుండగా, రైలు ప్రయాణం ఇంత సుదీర్ఘంగా ఉండటం ప్రయాణికులకు ఇబ్బందిగా మారింది. ఈ నేపథ్యంలో వందే భారత్ స్లీపర్ రాక పెద్ద ఊరటనివ్వనుంది.

ఎంత వేగంగా వెళ్తుంది? రూట్ ఎలా ఉండబోతోంది?

రైల్వే వర్గాల సమాచారం ప్రకారం, కొత్త వందే భారత్ స్లీపర్ రైలు పూణే, సోలాపూర్, కలబురగి, రాయచూర్ , గుంతకల్ మీదుగా నడిచే అవకాశం ఉంది. ప్రస్తుతం ముంబై-సోలాపూర్ మధ్య ఇప్పటికే వందే భారత్ నడుస్తోంది, కాబట్టి ఈ రూట్‌లో స్లీపర్ సర్వీస్ నడపడానికి సాంకేతిక సమస్యలేవీ ఉండవని భావిస్తున్నారు. ప్రయాణికులు , వ్యాపారవేత్తలు ఈ రైలు ద్వారా ప్రయాణ సమయం 16 నుంచి 17 గంటలకు తగ్గాలని కోరుకుంటున్నారు. బస్సు ప్రయాణాల కంటే తక్కువ సమయంలో, విమాన టికెట్ల కంటే తక్కువ ధరలో ఈ సదుపాయం అందుబాటులోకి వస్తుందని ఆశిస్తున్నారు.

విమానం వద్దు.. బస్సు వద్దు.. వందే భారత్ ముద్దు!

విమాన ప్రయాణాలు ఖరీదైనవి కావడం, బస్సు ప్రయాణాలు అంత సౌకర్యవంతంగా ఉండకపోవడంతో మధ్యతరగతి ప్రయాణికులు ఇబ్బంది పడుతున్నారు. ఈ కొత్త స్లీపర్ సర్వీస్ అందుబాటులోకి వస్తే, ఐటీ ఉద్యోగులు, వ్యాపారులు , పర్యాటకులకు ఇది వరంగా మారనుంది. త్వరలోనే ఈ రైలు ప్రారంభ తేదీ, టికెట్ ధరలు , పూర్తి టైమ్ టేబుల్‌ను రైల్వే శాఖ అధికారికంగా ప్రకటించనుంది.

మొత్తానికి బెంగళూరు-ముంబై మధ్య వందే భారత్ స్లీపర్ రైలు రాక అనేది దక్షిణ, పశ్చిమ భారత దేశాల మధ్య రవాణా వ్యవస్థలో ఒక కీలక మైలురాయిగా నిలవనుంది. కేవలం వేగమే కాకుండా, విమాన ప్రయాణంతో సమానమైన సౌకర్యాలను సామాన్యులకు కూడా అందుబాటులోకి తీసుకురావడమే ఈ రైలు ప్రధాన ఉద్దేశం. ఐటీ నిపుణులు, విద్యార్థులు, వ్యాపారవేత్తల చిరకాల కోరిక తీరబోతున్న ఈ తరుణంలో, భారతీయ రైల్వేలు తీసుకున్న ఈ నిర్ణయం రియల్ ఎస్టేట్, వాణిజ్య రంగాలపై కూడా సానుకూల ప్రభావం చూపే అవకాశం ఉంది. పూర్తి షెడ్యూల్, టికెట్ ధరల వివరాల కోసం ప్రయాణికులు ఇప్పుడు ఎంతో ఆసక్తిగా ఎదురుచూస్తున్నారు.