బెంగళూరు మెట్రో ప్రయాణికులకు గుడ్ న్యూస్.. ఆరు కోచ్‌ల కొత్త రైళ్లు వచ్చేస్తున్నాయ్..

రద్దీ సమయాల్లో కిక్కిరిసిన కోచ్‌లు, నిలబడేందుకు కూడా స్థలం లేక అవస్థలు పడుతున్న Bengaluru మెట్రో (నమ్మ మెట్రో) నిత్య ప్రయాణికులకు త్వరలోనే పెద్ద ఉపశమనం లభించనుంది. నగరంలోని అత్యంత రద్దీగా ఉండే పర్పుల్, గ్రీన్ లైన్లలో రైళ్ల లభ్యతను పెంచడం ద్వారా ప్రయాణికుల రద్దీని తగ్గించేందుకు బెంగళూరు మెట్రో రైల్ కార్పొరేషన్ లిమిటెడ్ (BMRCL) చర్యలు వేగవంతం చేసింది.

ఇందులో భాగంగా, డిస్టెన్స్-టు-గో (DTG) సిగ్నలింగ్ వ్యవస్థతో కూడిన కొత్త ఆరు కోచ్‌ల సిఆర్‌ఆర్‌సి (CRRC) రైలుసెట్లను ఈ రెండు కారిడార్లలో ప్రవేశపెట్టి నడపడానికి సదరన్ సర్కిల్ మెట్రో రైల్వే సేఫ్టీ కమిషనర్ (CMRS) నుండి బిఎమ్‌ఆర్‌సిఎల్ అధికారిక అనుమతులు సాధించింది. ఒప్పందంలో భాగమైన మొత్తం 21 రైలు సెట్లలో ఇప్పటివరకు నాలుగు రైలు సెట్లు బెంగళూరుకు చేరుకోగా.. వీటిని త్వరలోనే దశలవారీగా ప్రయాణికుల సేవల్లోకి తీసుకురానున్నారు. మిగిలిన 17 రైలు సెట్లు నెలకు సుమారు రెండు చొప్పున క్రమంగా రానున్నాయి, దీనివల్ల మెట్రో నెట్‌వర్క్ సామర్థ్యం నిరంతరం పెరుగుతుంది.

బెంగళూరు మెట్రో పర్పుల్ లైన్ పశ్చిమ బెంగళూరులోని చల్లాఘట్ట నుండి తూర్పున ఉన్న వైట్‌ఫీల్డ్ (కడుగోడి) ఐటీ కారిడార్ వరకు 37 స్టేషన్లతో సుమారు 42.17 కిలోమీటర్ల మేర విస్తరించి ఉంది. మైసూరు రోడ్, విజయనగర్, మెజెస్టిక్, కబ్బన్ పార్క్, ఎంజీ రోడ్, ఇందిరానగర్, బైయప్పనహళ్లి, కేఆర్‌ పురా, కుండలహళ్లి వంటి కీలక ప్రాంతాలను అనుసంధానించే ఈ మార్గం ఐటీ ఉద్యోగులకు, రోజువారీ ప్రయాణికులకు అత్యంత ప్రాధాన్యమైనది.

మరోవైపు, గ్రీన్ లైన్ ఉత్తరాన మడవార నుండి దక్షిణాన సిల్క్ ఇన్‌స్టిట్యూట్ వరకు 32 స్టేషన్లతో 33.03 కిలోమీటర్ల మేర విస్తరించి ఉంది. పీణ్య పారిశ్రామిక ప్రాంతం, యశ్వంతపూర్, రాజాజీనగర్, మెజెస్టిక్, చిక్కపేట, లాల్‌బాగ్, జయనగర్, బనశంకరి వంటి బెంగళూరు ప్రధాన వాణిజ్య మరియు నివాస ప్రాంతాలను ఈ లైన్ కలుపుతుంది. ఈ రెండు కారిడార్లలో కొత్త ఆరు కోచ్‌ల రైళ్లను దశలవారీగా అందుబాటులోకి తీసుకురావడం వల్ల ముఖ్యంగా ఉదయం, సాయంత్రం వేళల్లో రైళ్ల ఫ్రీక్వెన్సీ పెరిగి ప్రయాణం మరింత వేగవంతంగా, సౌకర్యవంతంగా మారనుంది.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.