బెంగళూరు మెట్రో ప్రయాణికులకు బిగ్ అలర్ట్.. కొత్త నిబంధనలు, భారీ జరిమానాలు అమలు

మెట్రో ప్రయాణికులకు బెంగళూరు మెట్రో రైల్ కార్పొరేషన్ లిమిటెడ్ (BMRCL) కీలక హెచ్చరిక జారీ చేసింది. మెట్రో నెట్‌వర్క్ ప్రాంగణంలో నిబంధనల ఉల్లంఘనలు, భద్రతా లోపాలను అరికట్టే లక్ష్యంతో వివిధ రకాల నేరాలపై విధించే జరిమానాలను ఏకంగా 400 శాతానికి పైగా భారీగా పెంచుతూ సంచలన నిర్ణయం తీసుకుంది. ప్రయాణికుల భద్రతకు అత్యున్నత ప్రాధాన్యత ఇవ్వడం, మెట్రో ఆస్తుల రక్షణ, ప్రయాణంలో క్రమశిక్షణను కాపాడటమే ఈ కఠినమైన నిర్ణయానికి ప్రధాన కారణమని అధికారులు వెల్లడించారు. సవరించిన ఈ కొత్త ఫైన్ల విధానం ఆదివారం నుంచే అమల్లోకి వస్తుందని నివేదికలు స్పష్టం చేస్తున్నాయి.

ఈ కొత్త ఉత్తర్వులలో అత్యంత ప్రధానమైనది మెట్రో ట్రాక్‌లను దాటడం లేదా ట్రాక్‌లపైకి ప్రవేశించడం. మెట్రో నెట్‌వర్క్‌లో అత్యంత ప్రమాదకరమైన నేరంగా పరిగణించే ట్రాక్ అతిక్రమణను పూర్తిగా నిరుత్సాహపరచడానికి బిఎమ్‌ఆర్‌సిఎల్ దీనిపై విపరీతమైన జరిమానాను విధించింది. ఇప్పటివరకు ఉన్న రుసుమును ఏకంగా నాలుగు రెట్లు పెంచి రూ. 20,000 కు చేర్చింది.

అలాగే సాధారణ ప్రయాణికులకు అనుమతి లేని నియంత్రిత ప్రాంతాల్లోకి అనధికారికంగా ప్రవేశిస్తే రూ. 5,000 వరకు జరిమానా విధించబడుతుంది. దీనికి తోడు మెట్రో ప్రాంగణాల్లో అనుమతి లేకుండా నిరసనలు, ర్యాలీలు నిర్వహించడం, మెట్రో కార్యకలాపాలకు ఆటంకం కలిగించేలా ప్రకటనలు, పోస్టర్లు లేదా అభ్యంతరకర రాతలను ప్రదర్శించడం వంటి చర్యలకు పాల్పడితే రూ. 10,000 వరకు భారీ జరిమానాలు పడతాయి.

కేవలం భద్రతా పరమైన అంశాలే కాకుండా మెట్రోలో ప్రయాణించే ఇతర ప్రయాణికులకు ఇబ్బంది కలిగించే సాధారణ చర్యలపై కూడా బిఎమ్‌ఆర్‌సిఎల్ ఉక్కుపాదం మోపింది. హెడ్‌ఫోన్‌లు ధరించకుండా మొబైల్ ఫోన్‌లలో బిగ్గరగా పాటలు వినడం లేదా వీడియోలు చూడటం, చట్టవిరుద్ధమైన లేదా అభ్యంతరకరమైన సాహిత్యాన్ని మెట్రోలోకి తీసుకురావడం, ప్రాంగణంలో బహిరంగంగా మద్యం సేవించడం, ఇతర ప్రయాణికులతో అసభ్యంగా ప్రవర్తించడం, దుర్భాషలాడటం వంటి ఉల్లంఘనలకు గతంలో గరిష్టంగా రూ. 500 జరిమానా ఉండేది. అయితే ప్రయాణికులలో మార్పు తీసుకురావడానికి ఈ మొత్తాన్ని ఇప్పుడు ఐదు రెట్లు పెంచి రూ. 2,500 కి పెంచారు.

Also Read

బెంగళూరు మెట్రో ప్రయాణికులకు అలర్ట్: పర్పుల్ లైన్‌లో భారీ మార్పులు, సేఫ్టీ ఆడిట్ షురూ!

ఇక టికెటింగ్ రంగానికి సంబంధించి జరిగే అక్రమాలు, మోసాలపై కూడా తీవ్రమైన శిక్షలను అమల్లోకి తెచ్చారు. మార్పులు చేసిన లేదా నకిలీ మెట్రో టిక్కెట్లు, పాస్‌లను ఉపయోగించడంతో పాటు, చట్టవిరుద్ధంగా టిక్కెట్లను ఇతరులకు విక్రయించడం లేదా బదిలీ చేయడం వంటి నేరాలకు రూ. 20,000 వరకు జరిమానా విధించబడుతుంది. నిర్దిష్టంగా నకిలీ లేదా తారుమారు చేసిన టిక్కెట్లను ఉపయోగించి ప్రయాణించడానికి ప్రయత్నిస్తే రూ. 5,000 ఫైన్ పడుతుంది, అదే సమయంలో టిక్కెట్లకు సంబంధించి ఇతర ఏవైనా పెద్ద మోసపూరిత నేరాలకు పాల్పడితే రూ. 25,000 వరకు గరిష్ట జరిమానా చెల్లించాల్సి ఉంటుంది.

ఈ కొత్త నిబంధనలతో పాటు బిఎమ్‌ఆర్‌సిఎల్ తన పరిపాలనా విధానంలో ఒక ముఖ్యమైన మార్పును చేపట్టింది. సాధారణంగా నిబంధనల ఉల్లంఘనలపై కోర్టులు, దీర్ఘకాలిక చట్టపరమైన ప్రక్రియల ద్వారా చర్యలు తీసుకునే పద్ధతికి స్వస్తి పలికింది. దానికి బదులుగా, తక్షణ చర్యలు చేపట్టేందుకు నిర్దిష్ట స్టేషన్ యాజమాన్య ఉద్యోగులకే నేరాలను స్వయంగా పరిశీలించి, జరిమానాలు విధించే నిర్ణయాధికారాలను కట్టబెట్టారు. ఒకవేళ అధికారులు విధించిన జరిమానా సమంజసం కాదని ప్రయాణికులు భావిస్తే, సదరు జరిమానాను వ్యతిరేకిస్తూ ఉన్నతాధికారికి అప్పీలు దాఖలు చేయడానికి ప్రయాణికులకు 30 రోజుల సమయం ఇవ్వబడుతుంది. ఈ అప్పీలును సంబంధిత అధికారులు పరిశీలించి అరవై రోజులలోపు తుది పరిష్కారం చూపుతారు.