Bengaluru: బెంగళూరు మెట్రో ప్రయాణికులకు చేదువార్త! ఫిబ్రవరి 9 నుండి పెరగనున్న ఛార్జీలు!

ఐటీ నగరం బెంగళూరు (Bengaluru)లో నిత్యం లక్షలాది మంది ప్రయాణించే 'నమ్మ మెట్రో' ఛార్జీలు పెరగనున్నాయి. బెంగళూరు మెట్రో రైల్ కార్పొరేషన్ లిమిటెడ్ (BMRCL) ఫిబ్రవరి 9, 2026 నుండి మెట్రో ధరలను 5 శాతం మేర పెంచుతూ నిర్ణయం తీసుకుంది. అయితే గతంలో ఏడేళ్ల గ్యాప్ తర్వాత ఒక్కసారిగా 51 శాతం పెంచినట్లు కాకుండా.. ఇకపై ఏటా కొద్దికొద్దిగా ధరలు సవరించే విధానాన్ని (Annual Fare Revision) అధికారులు ప్రవేశపెట్టారు. దీని గురించిన పూర్తి వివరాలు ఇప్పుడు తెలుసుకుందాం.

పెంపు ఎందుకు? ఎంత పెరిగింది?

మెట్రో నిర్వహణ ఖర్చులు, పెరుగుతున్న విద్యుత్ బిల్లులు, ఉద్యోగుల జీతాల భారాన్ని దృష్టిలో ఉంచుకుని ఈ నిర్ణయం తీసుకున్నట్టు అధికారులు చెప్తున్నారు. 2024-25 లెక్కల ప్రకారం నిర్వహణ ఖర్చులు 10 శాతం పెరిగినప్పటికీ, ప్రయాణికులపై భారం పడకుండా ఉండాలని ఫేర్ ఫిక్సేషన్ కమిటీ (FFC) గరిష్ట పరిమితిని 5 శాతానికి పరిమితం చేసింది. దీనివల్ల ప్రయాణికులపై కనిష్టంగా రూ. 1 నుండి గరిష్టంగా రూ. 5 వరకు భారం పడనుంది. పెరగనున్న కొత్త ఛార్జీలు ఎలా ఉంటాయంటే...

కొత్త ఛార్జీల వివరాలు ఇవే..

ప్రస్తుతం బెంగళూరులో 96.10 కిలోమీటర్ల మేర మెట్రో నెట్‌వర్క్ ఉంది. తాజా సవరణ ప్రకారం పది జోన్లలో ధరలు ఇలా ఉండబోతున్నాయి..

• తక్కువ దూరం (F1 Zone): గతంలో రూ. 10 ఉండగా.. ఇప్పుడు రూ. 11 కు పెరిగింది.
• మధ్యస్థ దూరం (F6 Zone - 10 నుండి 15 కి.మీ): గతంలో రూ. 60 ఉండగా, అది రూ. 63 అవుతుంది.
• ఎక్కువ దూరం (F10 Zone): గరిష్టంగా రూ. 90 నుండి రూ. 95 కి పెరిగింది.

ఇకపోతే మెట్రో టికెట్ ధరలతో పాటు టూరిస్ట్ కార్డ్స్, గ్రూప్ టిక్కెట్ల ధరలు కూడా 5 శాతం పెరిగాయి. ఒక రోజు పాస్ ధర స్మార్ట్ కార్డ్ వినియోగదారులకు రూ. 263 గా, మొబైల్ క్యూఆర్ కోడ్ వాడేవారికి రూ. 313 గా నిర్ణయించారు. ఐదు రోజుల పాస్ ధర కూడా వరుసగా రూ. 893 , రూ. 943 కు పెరిగింది.

డిస్కౌంట్లు యథాతథం!

ధరలు పెరిగినప్పటికీ, డిజిటల్ పేమెంట్లను ప్రోత్సహించేందుకు పాత రాయితీలను మాత్రం అలాగే కొనసాగిస్తున్నారు.

• పీక్ అవర్స్ (రద్దీ సమయం): స్మార్ట్ కార్డ్ , NCMC కార్డులు వాడేవారికి 5% డిస్కౌంట్ ఉంటుంది.
• నాన్-పీక్ అవర్స్ & సెలవు రోజులు: ఆదివారాలు , జాతీయ సెలవు దినాల్లో కార్డులు వాడేవారికి 10% డిస్కౌంట్ లభిస్తుంది.

మొత్తంగా మెట్రో సేవల్లో నాణ్యత, భద్రత, సమయపాలనను కాపాడటంతో పాటు కొత్త మార్గాల విస్తరణ కోసం ఈ ధరల పెంపు తప్పనిసరని బెంగళూరు (Bengaluru) మెట్రో అధికారులు స్పష్టం చేశారు. ప్రయాణికులు ఈ మార్పును గమనించి తమ ప్రయాణాలను ప్లాన్ చేసుకోవాలని సూచించారు.