లైఫ్ ఎప్పుడూ ఒకేలా ఉండదు! 5 ఏళ్లలో 8 సార్లు నో అన్నా.. అమెజాన్ లోనే జాబ్ కొట్టిన కుర్రాడి స్టోరీ!

ప్రస్తుత ఐటీ రంగంలో ఉద్యోగం సంపాదించడం అనేది కత్తిమీద సాములా మారింది. ఎంతో మంది ప్రతిభావంతులు కూడా సరైన అవకాశాలు రాక, రెజ్యూమ్‌లు షార్ట్‌లిస్ట్ అవ్వక నిరాశలో మునిగిపోతున్నారు. అలాంటి వారందరికీ స్ఫూర్తినిస్తూ బెంగళూరు (Bengaluru) కు చెందిన అరిత్ర అనే యువకుడి సక్సెస్ జర్నీ ఇప్పుడు సోషల్ మీడియాలో విపరీతంగా వైరల్ అవుతోంది. ప్రముఖ టెక్ దిగ్గజం 'అమెజాన్' (Amazon) లో డేటా ఇంజనీర్‌గా ఉద్యోగం సాధించడానికి ముందు అతను పడిన కష్టాలు, ఎదుర్కొన్న రిజెక్షన్లు చదివితే ఎవరికైనా రోమాలు నిక్కబొడుచుకుంటాయి.
ఐదేళ్ల కాలంలో ఏకంగా 7 నుండి 8 సార్లు అమెజాన్ కంపెనీ నుండి రిజెక్షన్ మెయిల్స్ అందుకున్న అరిత్ర.. పట్టువదలకుండా ప్రయత్నించి ఎలా విజయం సాధించాడో తన ఇన్‌స్టాగ్రామ్ రీల్‌లో పంచుకున్నాడు.

'ఆటో-రిజెక్షన్' మెయిల్స్ ఎంతో బాధించాయి..

"మనం ఎంత బాగా రెజ్యూమ్ మార్చినా, రెఫరల్స్ తీసుకున్నా, ప్రిపేర్ అయినా సరే.. రిజెక్షన్లు వస్తూనే ఉంటాయి. నేను దాదాపు 5 ఏళ్ల పాటు అమెజాన్ ఉద్యోగం కోసం 8 సార్లు అప్లై చేశాను. జాబ్ పోర్టల్స్ ద్వారా, తెలిసిన వాళ్ల నుండి రెఫరల్స్ తీసుకొని ప్రయత్నించినా.. ప్రతిసారీ నా రెజ్యూమ్ కనీసం స్క్రీనింగ్‌కు కూడా సెలెక్ట్ అవ్వలేదు. ప్రతిసారీ ఇన్-బాక్స్‌లోకి వచ్చే ఆటో-రిజెక్షన్ మెయిల్స్ నన్ను తీవ్రంగా బాధించాయి" అంటూ అరిత్ర ఆ రోజులను గుర్తుచేసుకున్నాడు.

ఒకానొక దశలో ప్రయత్నించడం ఆపేయాలా? లేక ముందుకు వెళ్లాలా? అనే సందిగ్ధంలో పడ్డానని, కానీ తాను మాత్రం రెండో ఆప్షన్ ఎంచుకొని నిరంతరం నేర్చుకుంటూనే ఉన్నానని చెప్పాడు. అలా ఒకరోజు ఊహించని విధంగా ఇంటర్వ్యూ కాల్ వచ్చిందని, ఆ సమయానికి తాను పక్కా ప్రిపరేషన్‌తో ఉండటం వల్ల ఫస్ట్ అటెంప్ట్ లోనే అమెజాన్ ఇంటర్వ్యూ క్రాక్ చేశానని సంతోషంగా పంచుకున్నాడు.

నిరుద్యోగులకు అరిత్ర ఇచ్చిన క్రేజీ అడ్వైస్..

"లైఫ్ కొన్నిసార్లు చాలా అన్యాయంగా (Unfair), విపరీతమైన కాంపిటీషన్‌తో మనల్ని అలసిపోయేలా చేస్తుంది. వచ్చే ప్రతి రిజెక్షన్‌ను మనం కంట్రోల్ చేయలేం. కానీ, మన చేతుల్లో ఉన్న కన్సిస్టెన్సీ (నిరంతర ప్రయత్నం), ప్రిపరేషన్, హార్డ్ వర్క్‌ను మాత్రం మనం కంట్రోల్ చేయగలం. నమ్మండి.. కష్టపడే గుణం ఉంటే మనం ఊహించని ఎత్తుకు ఎదుగుతాం. మీపై మీకు నమ్మకం కోల్పోకండి."

సోషల్ మీడియాలో నెటిజన్ల హల్‌చల్!

ఈ వీడియో వైరల్ అవ్వడంతో ఐటీ ఉద్యోగులు, నిరుద్యోగుల నుండి భారీ రెస్పాన్స్ వస్తోంది. "ప్రాడక్ట్ కంపెనీల్లో జాబ్ కొట్టడానికి ఎన్ని ఏళ్లు పట్టినా పర్లేదు.. పట్టుదల ఉంటే సాధించవచ్చని ఈ వీడియో నిరూపించింది" అని ఒకరు కామెంట్ చేయగా.. "ఆటో-రిజెక్షన్ మెయిల్స్ ఎంతలా నరకం చూపిస్తాయో నాకు తెలుసు, కానీ ఈ స్టోరీ నాకు కొత్త ఆశను ఇచ్చింది" అని మరొకరు రాసుకొచ్చారు. ఆలస్యంగానైనా సక్సెస్ సాధించిన ఈ బెంగళూరు (Bengaluru) టెక్కీని నెటిజన్లు ప్రశంసలతో ముంచెత్తుతున్నారు.