Bengaluru: ఇంట్లో పాత వస్తువులు ఉన్నాయా? ఫ్రీగా తీసుకెళ్లేందుకు వచ్చేస్తోంది కొత్త యాప్!

టెక్ సిటీ బెంగళూరు (Bengaluru) లో ఇల్లు మారేటప్పుడో లేదా పండగలకో ఇంట్లో ఉండే పాత సామాన్లు, విరిగిపోయిన మంచాలు, సోఫాలు, పాత ఫ్రిజ్‌లు మార్చడం కామన్. అయితే, వీటిని వదిలించుకోవడం మాత్రం పెద్ద తలనొప్పిగా మారుతోంది. ఇనుము, ప్లాస్టిక్ లాంటి విలువైన వస్తువులను స్క్రాప్ డీలర్లు కొంటారు కానీ.. విరిగిపోయిన చెక్క కుర్చీలు, పాత పరుపులు, టేబుళ్లు, పాత సిరామిక్ కమోడ్స్ లాంటి వాటిని ఎవరూ తీసుకోరు. దీనితో చాలామంది ప్రయాణికులు వేరే దారి లేక వాటిని అర్ధరాత్రి వేళ ఫుట్‌పాత్‌లపై, ఖాళీ ప్లాట్లలో పారేస్తున్నారు. దీనివల్ల నగరం అంతా చెత్త కుప్పలుగా (Black spots) మారుతోంది. ఈ సమస్యకు శాశ్వత పరిష్కారం చూపిస్తూ.. బెంగళూరు సాలిడ్ వేస్ట్ మేనేజ్‌మెంట్ లిమిటెడ్ (BSWML) సరికొత్త 'Dclutter' యాప్‌ను అందుబాటులోకి తెచ్చింది.

ఒక్క రూపాయి ఖర్చు లేకుండా.. మీ ఇంటి వద్దకే వచ్చి పికప్!

ఈ 'Dclutter' యాప్ ద్వారా బెంగళూరు ప్రజలు తమ ఇంట్లోని పెద్ద పెద్ద వేస్ట్ వస్తువులను (Bulky waste items) ఉచితంగా, బాధ్యతాయుతంగా పారేయవచ్చు. దీనికోసం సిటిజన్లు చేయాల్సిందల్లా ఒక్కటే.. గూగుల్ ప్లేస్టోర్ లేదా ఆన్‌లైన్ నుండి ఈ యాప్‌ను డౌన్‌లోడ్ చేసుకోవాలి. ఆ తర్వాత తమ బేసిక్ డీటెయిల్స్ ఎంటర్ చేసి రిజిస్టర్ అవ్వాలి. మీ ఇంట్లో ఏ వస్తువులను పారేయాలనుకుంటున్నారో వాటిని సెలెక్ట్ చేసుకుని, మీకు నచ్చిన పికప్ స్లాట్‌ను షెడ్యూల్ చేసుకోవాలి. అంతే, BSWML కి చెందిన ప్రత్యేక టీమ్ మీ ఇంటి వద్దకే వచ్చి ఆ వస్తువులను ఉచితంగా తీసుకెళ్తుంది.

ప్రస్తుతానికి ఆదివారం సర్వీస్.. సైంటిఫిక్ పద్ధతిలో ప్రాసెసింగ్!

BSWML సీఈఓ కరీ గౌడ ఈ యాప్‌కు సంబంధించిన వివరాలను పంచుకున్నారు. ప్రస్తుతానికి ఈ డోర్‌స్టెప్ పికప్ సర్వీస్ కేవలం ఆదివారాలు (Sundays) మాత్రమే అందుబాటులో ఉంటుందని ఆయన తెలిపారు. ప్రజల నుండి వచ్చే డిమాండ్, బుకింగ్స్ సంఖ్యను బట్టి రాబోయే రోజుల్లో వారంలోని మిగిలిన రోజులకు కూడా ఈ సేవలను విస్తరిస్తామని చెప్పారు. ఇలా సేకరించిన పాత సామాన్లు, బల్కీ వేస్ట్‌ను పర్యావరణానికి హాని కలగకుండా సైంటిఫిక్ పద్ధతిలో రీసైక్లింగ్ లేదా ప్రాసెస్ చేస్తామని స్పష్టం చేశారు.

ఈ యాప్ వెనుక ఉన్న అసలు కారణం ఇదే!

గత ఏడాది నగరంలో చెత్త పేరుకుపోతున్న ప్రాంతాలను (Black spots) క్లీన్ చేయడానికి ప్రయత్నించినప్పుడు, మున్సిపల్ కార్మికులు ఎంత శుభ్రం చేసినా మళ్లీ అక్కడ పాత మంచాలు, కమోడ్స్, విరిగిన ఫర్నిచర్ ప్రత్యక్షం అవుతున్నాయని అధికారులు గుర్తించారు. సాధారణంగా వచ్చే మున్సిపల్ గార్బేజ్ కలెక్టర్లు ఇలాంటి పెద్ద వస్తువులను తీసుకెళ్లరు. అందువల్లనే ప్రజలు వీటిని రోడ్ల పక్కన పారేస్తున్నారని, దీనికోసమే ఒక ప్రత్యేక యాప్ , టీమ్‌ను తీసుకురావాలని నిర్ణయించినట్లు కరీ గౌడ వివరించారు.

ఈ యాప్ ద్వారా కేవలం పెద్ద వస్తువులే కాకుండా.. ఇంట్లో వాడకుండా పడేసిన పాత బట్టలు, చెప్పులు, పిల్లల బొమ్మలు , ఎలక్ట్రానిక్ వస్తువులను (E-waste) కూడా అందజేయవచ్చు. నిజానికి ఈ యాప్ గత ఏడాది చివరలోనే లాంచ్ కావాల్సి ఉన్నప్పటికీ కొన్ని కారణాల వల్ల వాయిదా పడుతూ వచ్చింది. ఎట్టకేలకు ఇప్పుడు ఈ యాప్ అందుబాటులోకి రావడంతో బెంగళూరు (Bengaluru) నగర ప్రజలు తమ ఇళ్లను, అలాగే తమ పరిసరాలను క్లీన్‌గా ఉంచుకోవడానికి ఒక మంచి అవకాశం దొరికినట్లయింది.