బెంగళూరు వాసులకు బంపర్ ఆఫర్! ఇకపై ఆ సర్టిఫికేట్ లేకుండానే కరెంట్ కనెక్షన్!

మీరు ఐటీ హబ్ బెంగళూరు (Bengaluru) లో సొంత ఇల్లు కట్టుకున్నారా? కొత్త ఇంటికి కరెంట్ కనెక్షన్ కోసం ఆక్యుపెన్సీ సర్టిఫికేట్ (OC) దొరకక ఇబ్బంది పడుతున్నారా? అయితే మీకోసం కర్ణాటక ప్రభుత్వం ఒక అదిరిపోయే గుడ్ న్యూస్ మోసుకొచ్చింది. బెంగళూరు నగర పరిధిలో ఇళ్లు కట్టుకున్న వేలాది మంది యజమానులకు ఊరటనిస్తూ ముఖ్యమంత్రి డీకే శివకుమార్ నేతృత్వంలోని కాంగ్రెస్ ప్రభుత్వం ఒక సంచలన నిర్ణయం తీసుకుంది. ఇకపై కొన్ని రకాల ఇళ్లకు 'ఆక్యుపెన్సీ సర్టిఫికేట్' (OC) లేకపోయినా సరే, నేరుగా విద్యుత్ కనెక్షన్ ఇచ్చేయాలని అధికారులను ఆదేశించింది. జూన్ 5వ తేదీన దీనికి సంబంధించిన అధికారిక జీవో కూడా విడుదలైంది.

అసలు ఈ నిర్ణయం వెనుక కథ ఏంటి?

సాధారణంగా బెంగళూరులో ఇల్లు కట్టడం ఒక ఎత్తయితే, ఆ తర్వాత లోకల్ బాడీస్ (BBMP వంటి సంస్థల) నుండి ఆక్యుపెన్సీ సర్టిఫికేట్ (OC) తెచ్చుకోవడం మరో ఎత్తు. ప్లాన్ ప్రకారం ఇల్లు కట్టలేదని, చిన్న చిన్న మార్పులు ఉన్నాయని అధికారులు ఈ సర్టిఫికెట్ ఇవ్వడానికి నెలల తరబడి తిప్పుకుంటారు. ఈ సర్టిఫికెట్ లేకపోతే విద్యుత్ సరఫరా కంపెనీలు (BESCOM) కొత్త కరెంట్ కనెక్షన్ ఇవ్వవు. దీనివల్ల ఇల్లు పూర్తయినా కూడా కరెంట్ లేక వందలాది కుటుంబాలు అద్దె ఇళ్లలోనే మగ్గిపోవాల్సి వస్తోంది. ప్రజల నుంచి వచ్చిన విజ్ఞప్తులను పరిశీలించిన సీఎం డీకే శివకుమార్, జూన్ 3న జరిగిన తన మొదటి కేబినెట్ సమావేశంలోనే ఈ సమస్యకు వన్-టైమ్ రిలీఫ్ ఇవ్వాలని డిసైడ్ చేశారు.

ఎవరెవరికి ఈ మినహాయింపు వర్తిస్తుంది?

ప్రభుత్వం ఇచ్చిన ఆర్డర్ ప్రకారం, అందరికీ ఈ రూల్ వర్తించదు. దీనికి కొన్ని కండిషన్స్ పెట్టారు..

• మీ ప్లాట్ సైజు గరిష్టంగా 2,400 చదరపు అడుగులు (Sq. Ft) లోపు ఉండాలి.
• భవనం గ్రౌండ్ ప్లస్ 3 అంతస్తులు (G+3) లేదా స్టిల్ట్ పార్కింగ్ ప్లస్ 4 అంతస్తులు (Stilt+4) మాత్రమే ఉండాలి.
• అప్రూవ్డ్ ప్లాన్ కంటే గరిష్టంగా 20 శాతం వరకు తేడాలు (Violations) ఉన్నా కూడా ఈ మినహాయింపు ఇస్తారు.
• ముఖ్యంగా, ఈ ఇళ్ల నిర్మాణం పూర్తయి, మే 31, 2026 లోపు విద్యుత్ కనెక్షన్ కోసం అప్లై చేసి ఉండాలి.

అధికారుల తనిఖీ తప్పనిసరి!

ఈ ఆర్డర్ వచ్చింది కదా అని దొంగ సర్టిఫికెట్లతో మోసాలు చేయకుండా ప్రభుత్వం గట్టి నిఘా పెట్టింది. విద్యుత్ సరఫరా కంపెనీల అధికారులు నేరుగా మీ ఇంటికి వచ్చి సైట్ ఇన్‌స్పెక్షన్ చేస్తారు. బిల్డింగ్ ఫోటోలు తీసి రికార్డుల కోసం దాచుకుంటారు. ప్రభుత్వం చెప్పిన నిబంధనల ప్రకారం ఇల్లు ఉందో లేదో చెక్ చేసుకున్న తర్వాతే పవర్ కనెక్షన్ మంజూరు చేస్తారు.
ఈ వన్-టైమ్ రిలాక్సేషన్ వల్ల బెంగళూరు (Bengaluru)లోని మధ్యతరగతి ప్రజలకు, సొంత ఇంటి కల నిజం చేసుకున్న వారికి పెద్ద ఉపశమనం లభించనుంది. సో.. ఇంకెందుకు ఆలస్యం, మీ ఇల్లు కూడా ఈ లిస్ట్‌లో ఉంటే వెంటనే ప్రాసెస్ పూర్తి చేసుకోండి!