Bengaluru: కనకవర్షం కురిపిస్తున్న పాత కోటలు..! బెంగళూరు రియల్ ఎస్టేట్‌లో కొత్త మలుపు!

సిలికాన్ వ్యాలీ ఆఫ్ ఇండియా బెంగళూరు (Bengaluru) అనగానే మనకు గుర్తొచ్చేది ఆకాశాన్ని తాకే గాజు భవంతులు, మెరిసిపోయే మల్టీ స్టోరీ బిల్డింగులు. కానీ, ఇప్పుడు బెంగళూరులో ట్రెండ్ మారుతోంది. ఆధునికత వెనక పరుగెత్తే జనం, కొంచెం ప్రశాంతత కోసం, మన మూలాల కోసం వెతుకుతున్నారు. అందుకే ఇప్పుడు 150 ఏళ్ల నాటి పాత భవంతులు, బ్రిటిష్ కాలం నాటి విల్లాలు సరికొత్త 'ఆర్ట్ స్పేస్‌లు'గా, కెఫేలుగా రూపుదిద్దుకుంటున్నాయి.

వారసత్వానికి కొత్త మెరుగులు

బెంగళూరు నడిబొడ్డున ఉన్న 'సభ' (Sabha), 'సినమొన్' (Cinnamon), 'కాశ్‌' (Kaash) వంటి ప్రదేశాలు ఇప్పుడు నగరవాసులను అమితంగా ఆకర్షిస్తున్నాయి. ఇవన్నీ ఒకప్పుడు పాత కాలపు నివాసాలు. కానీ ఇప్పుడు ఇవి గొప్ప ఆర్ట్ గ్యాలరీలుగా, డిజైన్ స్టూడియోలుగా మారిపోయాయి. బెర్లీ స్ట్రీట్‌లోని 'కాశ్‌' ఆర్ట్ గ్యాలరీని నిర్వహిస్తున్న శ్రీధర్ పొద్దార్ మాటల్లో చెప్పాలంటే.. "మనం స్వదేశీ కళల గురించి మాట్లాడుతున్నప్పుడు, మన భవనాలు కూడా ఆ సంస్కృతిని ప్రతిబింబించాలి. అందుకే ఈ 150 ఏళ్ల నాటి భవనాన్ని మేము ఎంచుకున్నాం."

సెంటిమెంట్ తో కూడిన వ్యాపారం

కేవలం వ్యాపారం కోసమే కాకుండా, కుటుంబ జ్ఞాపకాలను పదిలపరుచుకోవడానికి కూడా ఇలాంటి పనులు చేస్తున్నారు. డోమ్లూరులోని 'బంగ్లా 157' దీనికి ఒక మంచి ఉదాహరణ. భ్రామిణి రెడ్డి కుటుంబం తమ పూర్వీకులు నివసించిన ఈ ఇంటిని కూల్చేయడం ఇష్టం లేక, దాన్ని ఒక ఈవెంట్ స్పేస్‌గా మార్చారు. ఇక్కడ ఇప్పుడు బర్త్ డే పార్టీలు, హీలింగ్ సెషన్లు, ఆర్ట్ ఎగ్జిబిషన్లు జరుగుతున్నాయి.

మరో అద్భుతమైన ప్రదేశం 'పంచవటి'. నోబెల్ బహుమతి గ్రహీత సి.వి.రామన్ ఒకప్పుడు మల్లేశ్వరంలో నివసించిన ఇల్లు ఇది. ఆయన మనవడు వివేక్ రాధాకృష్ణన్ ఈ చారిత్రక కట్టడాన్ని ప్రజలకు అందుబాటులోకి తెస్తున్నారు. సైన్స్, ఎడ్యుకేషన్ ఈవెంట్లకు ఇది ఒక వేదికగా మారుతోంది.

చల్లదనం.. కథలు.. మరిన్ని లాభాలు

ఈ పాత భవంతులకు వెళ్తే కేవలం కళ్లకు అందం మాత్రమే కాదు, చారిత్రక కథలు కూడా వినొచ్చు. సినమొన్ ఆవరణలోని 'కేఫ్ స్టోన్' యజమాని ఆరుష్ చెబుతున్న కథ ఆసక్తికరంగా ఉంటుంది. "ఇది ఒకప్పుడు కరువు కాలంలో కట్టిన అనాథాశ్రమం. ఆ కథ వినడానికే చాలామంది వస్తుంటారు."
వీటి వల్ల ఆర్థికంగా కూడా లాభం ఉంది. 'అడాప్టివ్ రీయుజ్' (Adaptive Reuse) అనే పద్ధతిలో వీటిని రీమోడల్ చేస్తున్నారు. ఆర్కిటెక్ట్ స్వాతి సుబ్రమణియన్ చెప్పినట్లు, ఈ భవంతులకు ఏసీ అవసరమే ఉండదు. ఎత్తైన పైకప్పులు, మంగళూరు పెంకులు, సున్నంతో కట్టిన గోడల వల్ల లోపల ఉష్ణోగ్రత ఎప్పుడూ తక్కువగానే ఉంటుంది.

చివరిగా చెప్పాలంటే.. బెంగళూరులో ఇప్పుడు 'ఓల్డ్ ఈజ్ గోల్డ్' అనేది కేవలం మాట మాత్రమే కాదు, ఒక సక్సెస్‌ఫుల్ బిజినెస్ మోడల్!