Bengaluru: బెంగళూరులో సామాన్యుడు బ్రతకగలడా? వైరల్ అవుతున్న టెక్కీ నెలవారీ ఖర్చుల చిట్టా!

భారతదేశపు సిలికాన్ వ్యాలీగా పిలవబడే బెంగళూరు (Bengaluru) నగరం కేవలం అవకాశాలకే కాదు, విపరీతమైన ఖర్చులకు కూడా నిలయంగా మారుతోంది. తాజాగా సోషల్ మీడియాలో ఒక యువ ఐటీ ఉద్యోగిని షేర్ చేసిన తన నెలవారీ ఖర్చుల వివరాలు ఇప్పుడు ఇంటర్నెట్‌లో పెద్ద చర్చకు దారితీశాయి. కేవలం ఒక్క నెలలోనే ఆమె ఏకంగా రూ. 1.43 లక్షలు ఖర్చు చేయడం అందరినీ ఆశ్చర్యానికి గురిచేస్తోంది.

గూగుల్ (Google) కంపెనీలో పనిచేస్తున్న 24 ఏళ్ల పూజా నరులా అనే యువతి.. ఫిబ్రవరి 2026 నెలలో తను చేసిన ఖర్చులను వివరిస్తూ ఒక వీడియో పోస్ట్ చేసింది. అందులో ఆమె తన రెగ్యులర్ ఖర్చులతో పాటు కొన్ని అనుకోని ఖర్చులను కూడా బయటపెట్టింది. సాధారణంగా బెంగళూరులో ఒక ఐటీ ఉద్యోగి జీవితం ఎంత విలాసవంతంగా, ఎంత భారంగా ఉంటుందో ఈ వీడియో అద్దం పడుతోంది.

ఖర్చుల బ్రేక్‌డౌన్: ఎక్కడ ఎంత ఖర్చయింది?

పూజా తన వీడియోలో వివరించిన దాని ప్రకారం, ఆమె నెలవారీ ఫిక్స్‌డ్ ఖర్చులు ఇలా ఉన్నాయి:

• రూమ్ రెంట్: నెలకు రూ.22,400
• పనిమనిషి , వంట మనిషి: రూ.2,800
• కరెంట్ బిల్లు , ఇతర వసతులు: రూ.2,000
• వీకెండ్ పార్టీలు/ ఔటింగ్స్: వారానికి రూ.2,000 చొప్పున నెలకు రూ.8,000

ఇవి కాకుండా ఫిబ్రవరి నెలలో ఆమె కొత్త అపార్ట్‌మెంట్‌లోకి మారడం వల్ల అదనపు ఖర్చులు తోడయ్యాయి. ఇంటి అద్దె అడ్వాన్స్ (సెక్యూరిటీ డిపాజిట్) కింద రూ.66,600, సామాన్ల షిఫ్టింగ్ కోసం రూ.3,000 ఖర్చు చేసింది. అలాగే సొంతూరికి వెళ్లడానికి ఫ్లైట్ టికెట్ల కోసం రూ.16,000, ఎయిర్‌పోర్ట్ క్యాబ్స్ కోసం రూ.2,000 వెచ్చించింది. వీటన్నింటికీ తోడు స్నేహితులకు గిఫ్ట్‌ లు, బయట భోజనాల కోసం మరో రూ.20,000 ఖర్చయ్యాయి. ఇలా మొత్తం కలిపి ఆమె బడ్జెట్ రూ. 1.43 లక్షలకు చేరుకుంది.

సోషల్ మీడియాలో సెటైర్లు , చర్చ

ఈ వీడియో చూసిన నెటిజన్లు రకరకాలుగా స్పందిస్తున్నారు. "నీ ఒక్క నెల ఖర్చు.. నా ఏడాది సేవింగ్స్ కంటే ఎక్కువ" అని ఒకరు కామెంట్ చేయగా.. "24 ఏళ్లకే 22 వేల అద్దె కడుతున్నావా? నేను వెంటనే రీల్ స్కిప్ చేశాను" అని మరొకరు ఎద్దేవా చేశారు. అసలు ఆమె జీతం ఎంత? నెలకు కనీసం 2 లక్షలు సంపాదిస్తేనే ఇలాంటి ఖర్చులు భరించడం సాధ్యమని మరికొందరు అభిప్రాయపడుతున్నారు.

బెంగళూరులో పెరుగుతున్న జీవన వ్యయం

ఈ వైరల్ వీడియో కేవలం ఒక వ్యక్తి ఖర్చుల గురించి మాత్రమే కాదు, బెంగళూరు (Bengaluru) లాంటి మెట్రో నగరాల్లో పెరుగుతున్న అద్దెలు, లైఫ్ స్టైల్ ఖర్చులపై గంభీరమైన చర్చను మొదలుపెట్టింది. ఐటీ కంపెనీల పుణ్యమా అని జీతాలు పెరుగుతున్నా, దానికి తగ్గట్టుగానే ఖర్చులు కూడా ఆకాశాన్ని తాకుతున్నాయి. ముఖ్యంగా గృహ అద్దెలు, రవాణా ఖర్చులు యువ ప్రొఫెషనల్స్ జేబులకు చిల్లులు పెడుతున్నాయి. "ప్రతిదీ నిజంగా ఖరీదైనదే" అని పూజా అన్న మాటలు ఇప్పుడు బెంగళూరులో ఉంటున్న ప్రతి ఒక్కరికీ ప్రతిధ్వనిస్తున్నాయి. ఈ పరిస్థితి ఇలాగే కొనసాగితే.. భవిష్యత్తులో సామాన్యుడు ఇక్కడ నివసించడం ఒక కలగానే మిగిలిపోయే ప్రమాదం ఉంది.