980% రిటర్న్స్ ఆశ చూపి రూ.1.3 కోట్లు మోసం.. బెంగళూరు ఉద్యోగిని నిలువునా ముంచిన కేటుగాళ్లు.. అసలు స్కామ్ ఇదే

ఐటీ రాజధాని బెంగళూరులో భారీ సైబర్ మోసం వెలుగులోకి వచ్చింది. నకిలీ ఇన్ఫర్మేషన్ పబ్లిక్ ఆఫరింగ్ (IPO) పెట్టుబడి పథకం ద్వారా భారీ లాభాలు ఇప్పిస్తామని ఆశ చూపి.. 55 ఏళ్ల ప్రైవేట్ రంగానికి చెందిన ఉద్యోగి నుండి సైబర్ మోసగాళ్లు ఏకంగా రూ. 1.3 కోట్లు కాజేశారు. ఈ ఘటనపై తూర్పు సైబర్ క్రైమ్ (CEN) పోలీస్ స్టేషన్‌లో కేసు నమోదైంది. జూరిచ్ ప్రధాన కార్యాలయంగా పనిచేసే ప్రముఖ 'జూలియస్ బేర్' (Julius Baer) వెల్త్ మేనేజ్‌మెంట్ సంస్థ ప్రతినిధులుగా నటిస్తూ.. సోనాల్ జగన్నాథ్, కునాల్ సుమయా అనే పేర్లతో గుర్తుతెలియని వ్యక్తులు బాధితుడిని లక్ష్యంగా చేసుకున్నారు.

జూలై 7 నుండి సెప్టెంబర్ 4 మధ్య వాట్సాప్ ద్వారా బాధితుడిని సంప్రదించిన మోసగాళ్లు.. అతడిని 'D036 జూలియస్ బేర్ వెల్త్' అనే వాట్సాప్ గ్రూప్‌లో చేర్చారు. ఆ తర్వాత, హై నెట్ వర్త్ ఇండివిడ్యువల్స్ (HNI) కోసం రూపొందించిన ప్రత్యేక కార్యక్రమంగా నమ్మించి.. 'JB X One' అనే నకిలీ ఆండ్రాయిడ్/ఐఓఎస్ యాప్‌ను డౌన్‌లోడ్ చేసుకోమని చెప్పారు.

ఈ యాప్‌లో సెబీ (SEBI), నేషనల్ స్టాక్ ఎక్స్ఛేంజ్ (NSE), బాంబే స్టాక్ ఎక్స్ఛేంజ్ (BSE) లోగోలను అక్రమంగా ఉపయోగించి అసలైన ప్లాట్‌ఫామ్‌గా భ్రమ కలిగించారు. కేవలం ఆరు నెలల వ్యవధిలోనే 980 శాతం వరకు విపరీతమైన లాభాలు వస్తాయని వాగ్దానం చేయడమే కాకుండా.. ప్రారంభంలో చిన్న మొత్తంలో డిపాజిట్ చేసిన డబ్బును విత్‌డ్రా చేసుకునేందుకు అనుమతించి బాధితుడి నమ్మకాన్ని గెలుచుకున్నారు.

ఆ తర్వాత బాధితుడు తన వద్ద ఉన్న నిధులతో పాటు రూ. 1.3 కోట్లు వివిధ వ్యక్తిగత, కార్పొరేట్ బ్యాంక్ ఖాతాల్లోకి విడతలవారీగా బదిలీ చేశాడు. యాప్‌లో అతనికి 99 శాతం లాభాలు వచ్చినట్లు డిజిటల్ స్క్రీన్‌పై చూపించిన మోసగాళ్లు, అదనపు ఐపీఓ కేటాయింపుల పేరుతో మరిన్ని నిధులను పంపాలని ఒత్తిడి చేశారు. అనుమానం వచ్చిన బాధితుడు తన అసలు పెట్టుబడిని, వచ్చిన లాభాలను విత్‌డ్రా చేసుకోవడానికి ప్రయత్నించగా.. సదరు యాప్ అతని ఖాతాను ఉన్నపళంగా స్తంభింపజేసింది (Freeze). విత్‌డ్రా చేసుకోవాలంటే మరో 10 శాతం సర్వీస్ లేదా బ్రోకరేజ్ ఫీజు చెల్లించాలని డిమాండ్ చేయడంతో బాధితుడు తాను మోసపోయానని గ్రహించాడు.

Also Read

అమ్మాయి గొంతుతో ఒక్క వాట్సప్ మెజేస్.. రూ. 21 కోట్లు పోగొట్టుకున్న చార్టర్డ్ అకౌంటెంట్..

అదనపు మొత్తాన్ని చెల్లించేందుకు నిరాకరించిన బాధితుడు.. తక్షణమే నేషనల్ సైబర్ క్రైమ్ రిపోర్టింగ్ పోర్టల్‌లో (NCRP) ఫిర్యాదు చేయగా, సెప్టెంబర్ 16న Bengaluru తూర్పు సైబర్ క్రైమ్ పోలీసులు అధికారికంగా కేసు నమోదు చేసి దర్యాప్తు ప్రారంభించారు. నేరస్థులు ఉపయోగించిన బ్యాంక్ ఖాతాలు, వాట్సాప్ నంబర్లు, డిజిటల్ కమ్యూనికేషన్ ఆధారంగా దర్యాప్తు వేగవంతం చేసినట్లు సీనియర్ పోలీస్ అధికారులు తెలిపారు. నకిలీ ట్రేడింగ్ యాప్‌లు, అధిక రాబడుల పేరుతో వాట్సాప్, టెలిగ్రామ్ ద్వారా వచ్చే ఇన్వెస్ట్‌మెంట్ ఆఫర్లను నమ్మవద్దని, కేవలం సెబీ నమోదిత బ్రోకర్లు మరియు అధికారిక మార్గాల ద్వారా మాత్రమే పెట్టుబడులు పెట్టాలని సైబర్ పోలీసులు ప్రజలను హెచ్చరిస్తున్నారు.