Bengaluru: స్టార్టప్ పెట్టాలనుకుంటున్నారా? అయితే ఈ ఎంట్రప్రెన్యూర్ చెప్తున్న చేదు నిజాలు వినాల్సిందే!

నగరం అనగానే మనకు ఐటీ కంపెనీలు, స్టార్టప్‌లు, కోట్లాది రూపాయల ఫండింగ్ వార్తలు గుర్తొస్తాయి. కానీ, ఆ మెరిసే లోకం వెనుక ఉన్న అసలైన కష్టం, మానసిక ఒత్తిడి గురించి చాలా తక్కువ మంది మాట్లాడుతుంటారు. తాజాగా బెంగళూరు (Bengaluru) కు చెందిన ఒక కాఫీ బ్రాండ్ ఫౌండర్ వర్ధమాన్ జైన్.. సోషల్ మీడియా వేదికగా పంచుకున్న తన ఐదేళ్ల వ్యాపార అనుభవం ఇప్పుడు నెట్టింట వైరల్ అవుతోంది. వ్యాపారం నిర్మించడం అనేది ఒక "సుదీర్ఘమైన, ఒంటరి ప్రయాణం" అని ఆయన అభివర్ణించారు.

5 ఏళ్ల ప్రయాణం.. నేర్పిన పాఠాలు

భారతదేశంలో కాఫీ వ్యాపారాన్ని నిర్మించడానికి గత ఐదేళ్లుగా తాను పడుతున్న శ్రమ గురించి జైన్ వివరిస్తూ.. ఇది తన జీవితంలో అత్యంత కఠినమైన (Gruelling) పనని పేర్కొన్నారు. ఆర్థికంగానే కాకుండా మానసికంగా కూడా ఇది మనిషిని పూర్తిగా మార్చేస్తుందని ఆయన ఆవేదన వ్యక్తం చేశారు. మొదట్లో ఉన్న ఉత్సాహం, ఆ తర్వాత ఎదురయ్యే రిజెక్షన్లు (Rejections) ఒక వ్యక్తిని ఎలా రాటుదేలుస్తాయో ఆయన వివరించారు. ముఖ్యంగా కస్టమర్లు తమ ప్రొడక్ట్‌ ను విమర్శించినప్పుడు.. ఆ మాటలను తట్టుకుని నిలబడాలంటే ఈగోను పక్కన పెట్టాలని ఆయన సూచించారు.

ఎంట్రప్రెన్యూర్‌షిప్ అంటే ఏమిటి?

వర్ధమాన్ జైన్ అభిప్రాయం ప్రకారం.. బిజినెస్ రన్ చేయడం వల్ల మనం తెలియకుండానే ఎమోషనల్ డిటాచ్‌మెంట్ (భావోద్వేగాలకు దూరంగా ఉండటం) అలవాటు చేసుకుంటాం. ప్రొడక్ట్‌ పై అతిగా ప్రేమ పెంచుకోకుండా దాన్ని కేవలం ఒక వ్యాపారంగా మాత్రమే చూడటం నేర్చుకుంటాం. "బిజినెస్ పెట్టే ముందు ఒకటికి పదిసార్లు ఆలోచించండి. బలమైన ఫైనాన్షియల్ సపోర్ట్ లేకపోతే.. ఈ ప్రయాణంలో నిలదొక్కుకోవడం చాలా కష్టం" అని ఆయన కొత్తగా స్టార్టప్ పెట్టాలనుకునే వారికి సూచించారు.

సోషల్ మీడియాలో భారీ స్పందన

ఈ పోస్ట్‌కు బెంగళూరు (Bengaluru), ఇతర నగరాల్లోని అనేకమంది స్టార్టప్ ఫౌండర్ల నుంచి మద్దతు లభించింది. ఒక యూజర్ స్పందిస్తూ.. "బిజినెస్ అనేది కేవలం ఒక ఐడియాను అమలు చేయడం మాత్రమే కాదు, అది మన వ్యక్తిత్వాన్ని మళ్ళీ నిర్మించుకోవడం" అని రాశారు. మరొక నెటిజన్.. "భారతదేశంలో కంజ్యూమర్ బిజినెస్ చేయడం చాలా సవాలుతో కూడుకున్న పని. ఐదేళ్ల పాటు ఒకే పనిపై దృష్టి పెట్టడం అంటే చిన్న విషయం కాదు" అని కొనియాడారు. కేవలం పర్పస్ (Purpose) ఉంటే సరిపోదని, క్యాష్ ఫ్లో , సిస్టమ్స్ చాలా ముఖ్యమని మరికొందరు అభిప్రాయపడ్డారు.

కొత్తగా వచ్చే వారికి సలహాలు

మీరు కూడా బెంగళూరు లాంటి నగరంలో కొత్తగా ఏదైనా వ్యాపారం మొదలుపెట్టాలని చూస్తుంటే.. వర్ధమాన్ జైన్ చెప్పిన ఈ సూత్రాలు గుర్తుంచుకోండి..

• ఆర్థిక పటిష్టత: కనీసం ఏడాది పాటు వ్యాపారం నడవకపోయినా తట్టుకునేంత సొమ్ము ఉండాలి.
• భావోద్వేగ నియంత్రణ: విమర్శలను పాజిటివ్‌ గా తీసుకోవడం అలవాటు చేసుకోవాలి.
• ఓర్పు: ఇది రాత్రికి రాత్రి సక్సెస్ అయ్యే ప్రయాణం కాదు అని గుర్తుంచుకోవాలి.

మొత్తానికి స్టార్టప్ ప్రపంచంలో కేవలం సక్సెస్ స్టోరీలు మాత్రమే కాకుండా, ఇలాంటి చేదు నిజాలను కూడా తెలుసుకోవడం వల్ల యువ ఎంట్రప్రెన్యూర్లు వాస్తవ పరిస్థితులకు సిద్ధంగా ఉంటారు.