బెంగళూరు వాసులకు గుడ్ న్యూస్.. 10 వేల గుంతలను పూడ్చే పనిలో సర్కారు బిజీ..

బెంగళూరులోవాసులకు సిద్ధరామయ్య ప్రభుత్వం శుభవార్తను తెలిపింది. నగర వ్యాప్తంగా రోడ్లపై ఉన్న గుంతలను మరమ్మతు చేయడానికి కర్ణాటక ముఖ్యమంత్రి డెడ్ లైన్ విధించారు. అక్టోబర్ 31 నాటికి అన్ని రోడ్లను మరమ్మతు చేయాలని ముఖ్యమంత్రి అధికారులను ఆదేశించారని, దీని కోసం అదనంగా రూ.750 కోట్ల గ్రాంట్‌ను కూడా అందిస్తామని కర్ణాటక ఉప ముఖ్యమంత్రి డీకే శివకుమార్ తెలిపారు. బెంగళూరులో రోడ్లను మెరుగుపరచడం, సజావుగా ట్రాఫిక్ వ్యవస్థను సృష్టించడం కోసం శనివారం జరిగిన ఉన్నత స్థాయి సమావేశం అనంతరం ఉప ముఖ్యమంత్రి డి.కె. శివకుమార్ విలేకరులతో మాట్లాడారు.

డిప్యూటీ సీఎం శివకుమార్ మీడియాతో మాట్లాడుతూ.. బెంగళూరులోని గుంతల సమస్యపై ముఖ్యమంత్రి, నేను GBA అధికారుల సమావేశం నిర్వహించామన్నారు. మా అధికారులు, పోలీసులు, ప్రజల సహకారంతో, నగరంలో 10 వేల గుంతలను గుర్తించాము. వీటిని మరమ్మతు చేయకపోతే కఠిన చర్యలు తీసుకుంటామని అధికారులను హెచ్చరించామని ఆయన అన్నారు. గుంతలను జాబితా చేసి సమాచారం అందించాలని పోలీసు అధికారులను ఆదేశించామని శివకుమార్ తెలిపారు. ప్రజలు వాటిని అధికారుల దృష్టికి తీసుకువస్తే, వాటిని త్వరలో బాగుచేస్తామని శివకుమార్ అన్నారు. ప్రస్తుత వర్షాకాలం ముగిసిన తర్వాత రోడ్లను మరమ్మతు చేయడానికి ప్రత్యేక ప్రణాళికను రూపొందించాలని ముఖ్యమంత్రి ఆదేశించారని తెలిపారు.

పెరుగుతున్న వర్షపాతం ఈ గుంతల సమస్య పెరగడానికి ప్రధాన కారణమని ఉప ముఖ్యమంత్రి అన్నారు, దేశంలోని అన్ని నగరాల్లో గుంతలు ఉన్నాయని అన్నారు. కానీ బెంగళూరు మాత్రమే వార్తల్లో నిలుస్తోంది. ఇతర ప్రదేశాలలో మీడియాపై ఆంక్షలు ఉన్నాయి. మన రాష్ట్రంలో మీడియాకు ఎక్కువ స్వేచ్ఛ ఇవ్వబడింది. ఈ సమస్యపై విస్తృతంగా ప్రచారం జరుగుతోందని కూడా ఆయన అన్నారు.ఇదిలా ఉండగా, శివకుమార్ శనివారం తన సొంత జిల్లా రామనగర పట్ల తనకున్న నిబద్ధతను పునరుద్ఘాటించారు. ఆయన మాట్లాడుతూ.. నేను ఈ భూమిలో పుట్టాను, ఇక్కడే నివసిస్తాను, ఇక్కడే చనిపోతాను" అని చెబుతూ జిల్లా ప్రజల పట్ల తనకున్న అనుబంధాన్ని ఆయన వ్యక్తం చేశారు.

దేవరాజ్ ఉర్స్ జయంతిని పురస్కరించుకుని శుక్రవారం జిల్లాలో ఏర్పాటు చేసిన కార్యక్రమంలో శివకుమార్ మాట్లాడుతూ.. ఈ జిల్లా నుండి నేను ఏమీ తీసుకోలేను. ఇక్కడి నా ప్రజలకు సాధికారత కల్పించడమే నా ఏకైక ప్రాధాన్యత" అని అన్నారు. Bengaluru లో రోడ్ల మరమ్మతులకు ముఖ్యమంత్రి విధించిన గడువు ప్రజల్లో విశ్వాసాన్ని నింపింది. వర్షాకాలం ముగిసిన తర్వాత రోడ్లు మరమ్మతు చేయబడతాయో లేదో, ట్రాఫిక్ మెరుగుపడుతుందో లేదో చూడాలి.

ఇదిలా ఉంటే అక్టోబర్ 1 నుండి నగరంలొ ట్రాఫిక్ సమస్య మరింత పెరగబోతోంది. దీనికి ప్రధాన కారణం ఏంటంటే..ఐటీ కంపెనీలు తీసుకున్న పెద్ద నిర్ణయమేనని చెప్పవచ్చు. ఔటర్ రింగ్ రోడ్ (ORR) ప్రాంతంలోని అనేక ఐటీ, ప్రైవేట్ కంపెనీలు ఇటీవల ఒక పెద్ద నిర్ణయం తీసుకున్నాయి. ఉద్యోగుల ఇంటి నుండి పని (WFH), హైబ్రిడ్ మోడళ్లను పూర్తిగా నిలిపివేసి, పూర్తి సమయం కార్యాలయం నుండి పని చేయాల్సి ఉంటుందని హుకుం చెప్పారు. టాప్ కంపెనీల ప్రకారం, ఇది ఉత్పాదకతను పెంచుతుంది.అలాగే ఉద్యోగుల పనితీరును మెరుగుపరుస్తుందని భావిస్తోంది.