మెట్రో నగరాలు వదిలేయండి.. టైర్-2 నగరాల్లో ఈ రేంజ్ శాలరీ ఉంటే మీరు మహారాజులా బతికేయొచ్చు!

ముంబై (Mumbai), బెంగళూరు (Bengaluru), హైదరాబాద్ (Hyderabad) వంటి మెట్రో నగరాల్లో భారీగా సంపాదిస్తున్నా.. నెలాఖరు వచ్చేసరికి చేతిలో రూపాయి మిగలడం లేదని చాలామంది ఐటీ ఉద్యోగులు, ప్రొఫెషనల్స్ బాధపడుతుంటారు. భారీ ఇళ్ల అద్దెలు, పిల్లల స్కూల్ ఫీజులు, రోజువారీ ఖర్చులతోనే సంపాదన అంతా కరిగిపోతుంది. మరి అదే భారతదేశంలోని 'టైర్-2' (చిన్న) నగరాల్లో అయితే ఎంత సంపాదిస్తే 'ధనవంతులు'గా, హాయిగా బతికేయొచ్చు?

దీనిపై బెంగళూరుకు చెందిన ప్రముఖ పారిశ్రామికవేత్త, గుడ్‌వర్క్స్ గ్రూప్ సీఈఓ విశ్వాస్ ముదగల్ చేసిన ఒక వీడియో ఇప్పుడు సోషల్ మీడియాలో తెగ వైరల్ అవుతోంది. టైర్-2 నగరాల్లో కేవలం బతకడమే కాదు, ఒక రాయల్ లైఫ్ స్టైల్ , ఫ్రీడమ్ ఎంజాయ్ చేయాలంటే ఏ సిటీకి ఎంత ఆదాయం ఉండాలో ఆయన క్లియర్‌గా వివరించారు.

ఇండోర్, లక్నో నగరాల్లో లగ్జరీ లైఫ్స్!

విశ్వాస్ ముదగల్ తన వీడియోలో మొదట ఇండోర్ (Indore) నగరం గురించి మాట్లాడారు. "ఇండోర్‌లో నెలకు రూ. 1.5 లక్షల నుండి రూ. 2 లక్షల ఆదాయం ఉంటే చాలు.. విజయ్‌నగర్ లాంటి బెస్ట్ ఏరియాలో హై-ఎండ్ ఫ్లాట్, పిల్లలకు కార్పొరేట్ స్కూల్స్, ఒక సొంత కారుతో పాటు వీకెండ్స్ లో లగ్జరీ లైఫ్‌ను ఎంజాయ్ చేయొచ్చు" అని చెప్పారు.

ఇక నవాబుల నగరమైన లక్నో (Lucknow) లో నెలకు రూ. 1 లక్ష నుండి రూ. 2 లక్షల శాలరీ ఉంటే.. అక్కడి నవాబీ సంస్కృతిని అనుభవిస్తూనే, కొత్త మాల్స్, ప్రైవేట్ క్లబ్ మెంబర్‌షిప్‌లు, ఇంట్లో పనివాళ్లను పెట్టుకుని దర్జాగా బతికేయొచ్చని ఆయన పేర్కొన్నారు.

కోయంబత్తూర్, నాగ్‌పూర్‌లలో తక్కువ ఖర్చు.. ఎక్కువ సదుపాయాలు!

తమిళనాడులోని కోయంబత్తూర్ (Coimbatore) గురించి చెబుతూ.. అక్కడ నెలకు రూ. 1.25 లక్షల నుండి రూ. 1.75 లక్షల ఆదాయం ఉంటే సొంతంగా ఒక ఇండిపెండెంట్ ఇల్లు, బయట మంచి రెస్టారెంట్లలో డైనింగ్, లగ్జరీ ట్రావెల్ , బెస్ట్ హెల్త్‌కేర్ సదుపాయాలను చాలా ఈజీగా పొందవచ్చన్నారు.

అదేవిధంగా నాగ్‌పూర్ (Nagpur) నగరంలో రూ. 1.25 లక్షల నుండి రూ. 1.75 లక్షల శాలరీ ఉంటే.. స్మార్ట్ సిటీ ఇన్‌ఫ్రాస్ట్రక్చర్ సదుపాయాలతో పాటు చాలా తక్కువ జీవన వ్యయం (Low cost of living) ఉంటుంది. దీనివల్ల మనం ఖర్చు పెట్టే ప్రతి రూపాయికి మెట్రో నగరాల కంటే ఎక్కువ కంఫర్ట్ దొరుకుతుందని ఆయన వివరించారు.

జైపూర్, భువనేశ్వర్.. మైసూర్‌లో అయితే 'మహారాజా' రేంజ్!

రాజస్థాన్ రాజధాని జైపూర్ (Jaipur) లో నెలకు రూ. 1.75 లక్షల నుండి రూ. 2.25 లక్షల ఆదాయం ఉంటే మోడ్రన్ కేఫ్‌లు, గోల్ఫ్ క్లబ్‌లతో కూడిన విలాసవంతమైన జీవితాన్ని గడపవచ్చని, పెద్ద సిటీల లాంటి రద్దీ లేకుండా హాయిగా ప్రశాంతంగా ఊపిరి పీల్చుకోవచ్చని సీఈఓ తెలిపారు.

ఒడిశా రాజధాని భువనేశ్వర్ (Bhubaneswar) గురించి మాట్లాడుతూ.. "చాలా క్లీన్ అండ్ ఫాస్ట్ గా డెవలప్ అవుతున్న సిటీ ఇది. ఇక్కడ నెలకు రూ. 1.25 లక్షల నుండి రూ. 1.5 లక్షలు సంపాదిస్తే మిమ్మల్ని అప్పర్ క్లాస్ (ధనవంతులు) గా పరిగణించవచ్చు" అని చెప్పారు. ఇక చివరగా కర్ణాటకలోని సాంస్కృతిక రాజధాని మైసూర్ (Mysuru) గురించి చెబుతూ.. "మైసూర్ చాలా ప్రశాంతమైన నగరం, ఇక్కడ రాయల్ వైబ్స్ ఉంటాయి. ఇక్కడ నెలకు రూ. 2 లక్షలు సంపాదిస్తే మీరు ఒక 'మారన్ మహారాజు'తో సమానం" అంటూ ఆసక్తికర వ్యాఖ్యలు చేశారు.

డబ్బు మాత్రమే కాదు.. మనశ్శాంతి ముఖ్యం!

వీడియో చివరలో విశ్వాస్ ముదగల్ ఒక అద్భుతమైన మాట చెప్పారు. "చిన్న నగరాల్లో రిచ్‌గా బతకడం అంటే కేవలం బ్యాంక్ బ్యాలెన్స్ మాత్రమే కాదు. అక్కడ దొరికే ప్రశాంతత, సదుపాయాలు , లైఫ్‌స్టైల్ ఫ్రీడమ్ ముఖ్యం. మెట్రో నగరాల్లో లాగా తీవ్రమైన ఒత్తిడి (Burnout) కి గురికాకుండానే ఇక్కడ ఒక పెద్ద జీవితాన్ని ఆస్వాదించవచ్చు. ఎవరో ఉన్న నగరంలో ధనవంతులు అవ్వాలని పరుగెత్తకండి.. మీకంటూ ఒక రిచ్ లైఫ్ అంటే ఏంటో తెలుసుకుని, అది ఎక్కడ దొరుకుతుందో అక్కడే మీ జీవితాన్ని ప్లాన్ చేసుకోండి" అని ముగించారు. ప్రస్తుతం ఈ వీడియోపై నెటిజన్లు పెద్ద ఎత్తున చర్చిస్తున్నారు. మెట్రో సిటీల కంటే టైర్-2 నగరాలే వర్క్-లైఫ్ బ్యాలెన్స్‌కు బెస్ట్ ఆప్షన్ అని చాలామంది అభిప్రాయపడుతున్నారు