Bengaluru: వాట్సాప్ వెడ్డింగ్ ఇన్విటేషన్‌పై క్లిక్ చేస్తే జేబు ఖాళీ.. బెంగళూరులో కొత్త రకం సైబర్ క్రైమ్!

టెక్నాలజీ పెరిగేకొద్దీ సైబర్ నేరగాళ్లు కొత్త పద్ధతుల్లో సామాన్యులను దోచుకుంటున్నారు. తాజాగా బెంగళూరు (Bengaluru) కు చెందిన 42 ఏళ్ల వ్యాపారి నూర్ నాహిద్ ఖాన్ ఒక చిన్న పొరపాటు వల్ల ఏకంగా రూ. 5 లక్షలు పోగొట్టుకున్నారు. కేవలం ఒక వాట్సాప్ వెడ్డింగ్ ఇన్విటేషన్‌ను డౌన్‌లోడ్ చేయడమే ఆయన చేసిన తప్పయింది.

అసలేం జరిగింది?

నూర్ నాహిద్ ఖాన్ మొబైల్‌కు ఒక వాట్సాప్ మెసేజ్ వచ్చింది. "మా పెళ్లికి మిమ్మల్ని ఆహ్వానిస్తున్నాం.. పూర్తి వివరాల కోసం అటాచ్ చేసిన ఇన్విటేషన్‌ను డౌన్‌లోడ్ చేసుకోండి" అనే టెక్స్ట్ మెసేజ్ కింద ఒక APK ఫైల్ ఉంది. అది నిజమైన పెళ్లి పత్రిక అని నమ్మిన ఖాన్, ఆ ఫైల్‌ను డౌన్‌లోడ్ చేసి ఇన్‌స్టాల్ చేశారు.

దీని తర్వాత ఏప్రిల్ 16 తెల్లవారుజామున 4:45 నుంచి 4:54 మధ్య కేవలం పది నిమిషాల్లోనే ఆయన బ్యాంక్ అకౌంట్ నుంచి రూ. 5,00,440 మాయమయ్యాయి. వరుసగా జరిగిన యూపీఐ (UPI) లావాదేవీల ద్వారా సైబర్ కేటుగాళ్లు ఈ మొత్తాన్ని కొల్లగొట్టారు.

APK ఫైల్ అంటే ఏమిటి? అందులో డేంజర్ ఏముంది?

సాధారణంగా ఆండ్రాయిడ్ ఫోన్లలో యాప్స్‌ను ఇన్‌స్టాల్ చేయడానికి APK (Android Package Kit) ఫైల్స్‌ను ఉపయోగిస్తారు.

• సైబర్ వల: హ్యాకర్లు పెళ్లి పత్రిక పేరుతో వైరస్ లేదా మాల్వేర్ ఉన్న APK ఫైల్‌ను పంపిస్తారు.
• యాక్సెస్: మీరు ఆ ఫైల్‌ను ఇన్‌స్టాల్ చేయగానే, మీ ఫోన్‌లోని కెమెరా, గూగుల్ పే, బ్యాంకింగ్ యాప్స్ , మెసేజ్‌లన్నింటినీ నియంత్రించే అధికారం హ్యాకర్‌కు లభిస్తుంది.
• OTP చోరీ: ఈ యాప్స్ సహాయంతో హ్యాకర్లు మీ ఫోన్‌కు వచ్చే OTPలను కూడా చదవగలరు, తద్వారా మీకు తెలియకుండానే బ్యాంక్ లావాదేవీలు పూర్తి చేస్తారు.

డిజిటల్ అక్షరాస్యత అవసరం

ఈ ఘటనపై స్పందిస్తూ కాయిన్ డిసిఎక్స్ (CoinDCX) వ్యవస్థాపకుడు సుమిత్ గుప్తా సోషల్ మీడియాలో హెచ్చరించారు. "ప్రజలు JPEG (ఫోటో)లకు , APK ఫైల్స్‌కు మధ్య తేడా తెలుసుకోవాలి. తెలియని నంబర్ల నుంచి వచ్చే ఎలాంటి APK ఫైల్స్‌ను డౌన్‌లోడ్ చేయకండి" అని ఆయన సూచించారు. నిజమైన పెళ్లి పత్రికలు ఎప్పుడూ ఫోటోలు (JPEG/PNG), వీడియోలు (MP4) లేదా PDF రూపంలో ఉంటాయి. కానీ అవి ఎప్పటికీ APK ఫైల్స్ రూపంలో ఉండవు.

సురక్షితంగా ఉండటానికి చిట్కాలు..

1. APK ఫైల్స్ వద్దు: వాట్సాప్ లేదా టెలిగ్రామ్‌లో వచ్చే తెలియని APK ఫైల్స్‌ను ఎప్పుడూ క్లిక్ చేయకండి.
2. ప్లే స్టోర్ మాత్రమే: యాప్స్ కావాలంటే కేవలం గూగుల్ ప్లే స్టోర్ (Google Play Store) నుంచి మాత్రమే డౌన్‌లోడ్ చేసుకోండి.
3. అనుమతులు తనిఖీ చేయండి: ఏదైనా యాప్ మీ బ్యాంకింగ్ వివరాలు లేదా మెసేజ్‌ల యాక్సెస్ అడుగుతుంటే అనుమానించండి.

ఇలాంటి స్కామ్ ల బారిన పడి మోసపోకుండా ఉండాలంటే.. మీ కుటుంబ సభ్యులకు, ముఖ్యంగా పెద్దవారికి ఇలాంటి సైబర్ మోసాల గురించి వివరించండి. బెంగళూరు పోలీసులు ఈ ఘటనపై ఐటీ చట్టం , భారతీయ న్యాయ సంహిత (BNS) కింద కేసు నమోదు చేసి దర్యాప్తు చేస్తున్నారు. ఇలాంటి మెసేజ్‌లు బెంగళూరు (Bengaluru) లో మరికొందరికి కూడా వచ్చి ఉండవచ్చని పోలీసులు అనుమానిస్తున్నారు. సైబర్ భద్రత విషయంలో అప్రమత్తంగా ఉండటమే మనం సంపాదించిన సొమ్మును కాపాడుకునే ఏకైక మార్గం.