బెంగళూరు ఆస్తి యజమానులకు బిగ్ షాక్.. ఎ-ఖాటా మార్పు కోసం ఇప్పుడు ఇ-ఖాటా తప్పనిసరి

బెంగళూరులో ఆస్తి యజమానులకు సంబంధించిన పరిపాలనా వ్యవస్థలో మరో పెద్ద మార్పు చోటు చేసుకోబోతోంది. గ్రేటర్ బెంగళూరు అథారిటీ (GBA) తాజాగా తీసుకున్న నిర్ణయం ప్రకారం..బి-ఖాటా ఆస్తులు కలిగిన యజమానులు తమ ఆస్తులను ఎ-ఖాటాగా మార్చుకునే ముందు తప్పనిసరిగా ఇ-ఖాటా పొందాలి. నవంబర్ 1 నుండి ఈ కొత్త నిబంధన అమల్లోకి రానుంది. ఇప్పటికే ఆస్తి పత్రాల మార్పిడి ప్రక్రియను క్లిష్టంగా భావిస్తున్న అనేకమంది నివాసితులకు, ఈ కొత్త డిజిటల్ పొర మరింత గందరగోళాన్ని సృష్టించిందని వారు అంటున్నారు.

కొత్త నిబంధనల ప్రకారం.. 21,527 చదరపు అడుగుల లోపు ఉన్న, ప్రజా రహదారుల వెంబడి ఉన్న బి-ఖాటా ఆస్తులు మాత్రమే ఎ-ఖాటాకు మార్పిడికి అర్హత పొందుతాయి. ఆస్తి యజమానులు భూమి మ్యుటేషన్, మ్యాప్ ఆమోదం వంటి ఇతర ఫీజులతో పాటు, ఆస్తి మార్గదర్శక విలువ ఆధారంగా 5 శాతం మార్పిడి రుసుము చెల్లించాల్సి ఉంటుంది.

టైమ్స్ ఆఫ్ ఇండియా నివేదిక ప్రకారం.. ఇప్పటికే రాజరాజేశ్వరినగర్ వంటి ప్రాంతాల్లో నివాసితులు నిరాశ వ్యక్తం చేశారు. ఎందుకంటే వారు తమ పత్రాలను ఎ-ఖాటా మార్పిడి కోసం సిద్ధం చేసుకుంటుండగా, కొత్త ఇ-ఖాటా నిబంధన అకస్మాత్తుగా అమల్లోకి రావడంతో, వారికి అదనపు ప్రక్రియను పూర్తి చేయాల్సిన పరిస్థితి ఏర్పడింది. ప్రస్తుతం Bengaluru లో సుమారు 7.5 లక్షల బి-ఖాటా ఆస్తులు ఉన్నట్లు అంచనా. వీటిలో ఇప్పటి వరకు కేవలం 2.6 లక్షల ఆస్తులు మాత్రమే ఇ-ఖాటాగా అప్‌గ్రేడ్ అయ్యాయి.
జోన్ వారీగా చూస్తే -

ఇందులో వెస్ట్ జోన్ 72,000 మార్పిడులతో అగ్రస్థానంలో ఉంది. నార్త్ జోన్ 69,000 మార్పిడులతో రెండో స్థానంలో ఉంది.ఈస్ట్ జోన్ 62,816 మార్పిడులతో మూడో స్థానంలో ఉంది. రాజరాజేశ్వరినగర్ జోన్‌లోనే అత్యధికంగా 1.23 లక్షల ఆస్తులు ఇ-ఖాటాకు మారాయి. తరువాత బెంగళూరు సౌత్, అనేకల్ జోన్‌లు 1.03 లక్షల మార్పిడులతో ఉన్నాయి.

ఈ మార్పును సమర్థిస్తూ, GBA స్పెషల్ కమిషనర్ (రెవెన్యూ) మునీష్ మౌద్గిల్ మాట్లాడుతూ, ఇ-ఖాటా అమలు పారదర్శకత, బాధ్యతాయుత వ్యవస్థ వైపు తీసుకెళ్లే ముఖ్యమైన అడుగు అని తెలిపారు. ఆయన ప్రకారం ఈ దశ అపార్ట్‌మెంట్ నివాసితులకు వర్తించదు. ఇది కేవలం వ్యక్తిగత సైట్లు లేదా సైట్,భవన యజమానులకు మాత్రమే వర్తిస్తుందన్నారు.

ఒక సీనియర్ GBA అధికారి వివరించిన ప్రకారం.. ఈ చర్య వెనుక ఉన్న ముఖ్య ఉద్దేశ్యం ఆస్తి పన్ను సమ్మతిని బలోపేతం చేయడంగా చెప్పుకొచ్చారు. అనేక బి-ఖాటా ఆస్తులకు సరైన పత్రాలు లేకపోవడం వల్ల ప్రభుత్వం పన్ను ఆదాయాన్ని కోల్పోతోందని తెలిపారు. వాటిని ఎ-ఖాటా వ్యవస్థలో చేర్చడం ద్వారా నగర పన్ను బేస్ విస్తరిస్తుందని, ఆ పన్ను ఆదాయంతో మౌలిక వసతుల అభివృద్ధికి అవసరమైన నిధులు సమకూరుతాయని ఆయన పేర్కొన్నారు.

ఇ-ఖాటా తప్పనిసరి చేయడం వల్ల బెంగళూరు ఆస్తి మార్కెట్‌లో మరింత క్రమబద్ధత వస్తుందని అధికారులు చెబుతున్నారు. అయితే, ఇప్పటికే అనేక దశల్లో నడిచే పత్రాల ప్రాసెస్‌పై అసంతృప్తి వ్యక్తం చేస్తున్న ఆస్తి యజమానులు, ఈ కొత్త నిబంధన అమలుతో సమయం, ఖర్చు, సాంకేతిక చిక్కులు మరింత పెరగవచ్చని ఆందోళన చెందుతున్నారు.