అధిక ఛార్జీలు వసూలు చేసే ఆటోడ్రైవర్లపై చర్యలు తీసుకోరా.. ప్రభుత్వానికి ప్రయాణికులు సూటి ప్రశ్న..

కర్ణాటకలో అనధికారిక బైక్-టాక్సీ సేవలపై రవాణా శాఖ చేపట్టిన విస్తృత తనిఖీలు, కఠిన చర్యలు నగర ప్రయాణికులలో తీవ్ర ఆగ్రహానికి, ఆందోళనకు దారితీస్తున్నాయి. గత మూడు రోజులుగా రవాణా అధికారులు నిర్వహించిన ప్రత్యేక డ్రైవ్‌లో నిబంధనలు ఉల్లంఘించి నడుపుతున్న సుమారు 350 అనధికార ద్విచక్ర వాహనాలను స్వాధీనం చేసుకున్నారు.

సరైన అనుమతులు, వాణిజ్య రిజిస్ట్రేషన్ లేకుండా బైక్ టాక్సీ సేవలు అందిస్తున్న వాహన యజమానులకు రవాణా శాఖ రూ. 5 వేల నుండి రూ. 10 వేల వరకు భారీ జరిమానాలు విధించింది. నిబంధనలను ఉల్లంఘించిన డ్రైవర్ల లైసెన్సులను రద్దు చేయడంతో పాటు వారి వాహనాలను పూర్తిగా జప్తు చేసే దిశగా అధికారులు అడుగులు వేస్తున్నారు. రవాణా శాఖ తీసుకుంటున్న ఈ చర్యలు చట్టబద్ధమైనవే అయినప్పటికీ.. ప్రయాణికులకు మాత్రం తీవ్ర ఇబ్బందులను తెచ్చిపెడుతున్నాయి.

నగరంలో బైక్ టాక్సీ సేవలు అకస్మాత్తుగా నిలిచిపోవడంతో రోజువారీ ప్రయాణికులు ఆటోరిక్షాలపైనే పూర్తిగా ఆధారపడాల్సి వస్తోంది. ఇదే అవకాశంగా భావించిన పలువురు ఆటో డ్రైవర్లు అధిక ఛార్జీలు డిమాండ్ చేయడమే కాకుండా, ప్రయాణికులు కోరిన ప్రాంతాలకు రావడానికి నిరాకరిస్తున్నారని ఫిర్యాదులు వెల్లువెత్తుతున్నాయి. అక్రమ బైక్ టాక్సీలపై ఇంత వేగంగా చర్యలు తీసుకుంటున్న రవాణా శాఖ, ప్రయాణికులను వేధిస్తున్న ఆటో డ్రైవర్లపై ఎందుకు అదే స్థాయిలో చర్యలు తీసుకోవడం లేదని ప్రజలు ప్రశ్నిస్తున్నారు.

ప్రభుత్వ సమర్థవంతమైన చర్యలను మెచ్చుకుంటూనే.. ఆటోల అక్రమాలపై కూడా దృష్టి సారించాలని రేష్మా వంటి ప్రయాణికులు కోరుతున్నారు. రవాణా శాఖ మంత్రి బైరతి సురేష్ ఈ సమస్యపై ఎందుకు మౌనంగా ఉన్నారని సోషల్ మీడియా వేదికగా నెటిజన్లు నిలదీస్తున్నారు. వృద్ధులకు రైడ్ నిరాకరించే ఆటో డ్రైవర్లపై లేదా సాధారణ ఛార్జీ కంటే ఐదు రెట్లు ఎక్కువ అడిగే వారిపై అధికారులు ఎలాంటి చర్యలు తీసుకోవడం లేదని ప్రజలు ఆగ్రహం వ్యక్తం చేస్తున్నారు.

Also Read

బెంగళూరు రియల్ ఎస్టేట్.. సొంతిల్లు వద్దు బాబోయ్ అంటున్న ఉద్యోగులు..షాకింగ్ కారణం ఏంటంటే..

బాగ్మనే టెక్ పార్క్‌లో ప్రాజెక్ట్ మేనేజర్‌గా పనిచేస్తున్న రీమా ఎం తన చేదు అనుభవాన్ని పంచుకుంటూ.. సాధారణంగా బైక్ టాక్సీ ద్వారా రూ. 90 తో ముగిసే ప్రయాణానికి ఆటో డ్రైవర్లు వర్షాన్ని సాకుగా చూపుతూ రూ. 220 డిమాండ్ చేస్తున్నారని తెలిపారు. అలాగే తాను సంప్రదించిన పది మంది ఆటో డ్రైవర్లలో తొమ్మిది మంది ప్రయాణాన్ని నిరాకరించారని ఆవేదన వ్యక్తం చేశారు. మరో ప్రయాణికుడు రవి ప్రసాద్ మాట్లాడుతూ.. అధిక రవాణా ఖర్చులను భరించలేక తాను సుదీర్ఘ సమయం పట్టే బస్సు మార్గాలను ఎంచుకోవాల్సి వస్తోందని.. దీనివల్ల తన అమూల్యమైన సమయం వృథా అవుతోందని తెలిపారు.

మరోవైపు ఈ వివాదంపై నమ్మ బైక్ టాక్సీ అసోసియేషన్ రవాణా శాఖ వైఖరిని తప్పుబట్టింది. రాష్ట్రంలో లక్షకు పైగా ఉన్న బైక్-టాక్సీ రైడర్లు, గిగ్ వర్కర్ల భవిష్యత్తును దృష్టిలో ఉంచుకుని చట్టబద్ధమైన కార్యకలాపాలకు స్పష్టమైన మార్గదర్శకాలు ఇవ్వాలని తాము పలుమార్లు కోరినా అధికారుల నుంచి స్పందన లేదని వారు విమర్శించారు. మోటార్‌సైకిళ్లను వాణిజ్య రవాణా వాహనాలుగా రిజిస్టర్ చేసుకోవచ్చని హైకోర్టు సూచించినప్పటికీ.. అధికారులు సరైన నియంత్రణ విధానాలను రూపొందించడంలో విఫలమయ్యారని అసోసియేషన్ పేర్కొంది.

అయితే ఈ ఆందోళనలపై రవాణా శాఖ స్పందిస్తూ.. ప్రస్తుతం రాష్ట్రంలో కేవలం టాక్సీ అగ్రిగేటర్లకు మాత్రమే నిబంధనలు ఉన్నాయని, బైక్ టాక్సీల నిర్వహణకు ఎలాంటి విధానం లేదా విధాన పత్రం లేకపోవడం వల్లే వాటిని చట్టవిరుద్ధమైనవిగా పరిగణించి చర్యలు తీసుకుంటున్నామని స్పష్టం చేసింది. ప్రయాణికుల ఇబ్బందులు, గిగ్ వర్కర్ల ఉపాధిని సమతుల్యం చేసేలా ప్రభుత్వం త్వరలోనే ఒక పరిష్కారం చూపాలని ప్రజలు కోరుకుంటున్నారు.