బ్యాంకుల సమయాల్లో మార్పులు: ఆ అరగంట: ఆర్బీఐ కీలక ప్రకటన

ముంబై: బ్యాంకులు, ఇతర ఆర్థిక సంస్థల కార్యాలయాల పని వేళలను రిజర్వుబ్యాంక్ సవరించింది. కొత్త వేళలను వెల్లడించింది. ఈ మేరకు భారతీయ రిజర్వుబ్యాంక్ గవర్నర్ శక్తికాంత దాస్ ఓ కీలక ప్రకటనను విడుదల చేశారు. కరోనా వైరస్ వ్యాప్తి చెందిన పరిస్థితులను దృష్టిలో ఉంచుకుని ఇదివరకు కుదించిన బ్యాంకుల సమయాన్ని మళ్లీ పునరుద్ధరించనున్నట్లు పేర్కొన్నారు. సమయాన్ని కుదించిన బ్యాంకులు, ఇతర ఆర్థిక సంస్థలకు ఇది వర్తిస్తుందని శక్తికాంత దాస్ తెలిపారు.

దీనితోపాటు- ఏటీఎంలల్లో కార్డు రహిత నగదు విత్‌డ్రాలను కూడా అందుబాటులోకి తీసుకుని రానున్నట్లు చెప్పారు. గవర్నర్ శక్తికాంత దాస్ విడుదల చేసిన ఈ ప్రకటన ప్రకారం- బ్యాంకులు, ఇతర ఆర్థిక సంస్థల కార్యకలాపాలు ఉదయం 9 గంటలకే ప్రారంభమౌతాయి. ఈ నెల 18వ తేదీ నుంచి కొత్త పని వేళలు అందుబాటులోకి వస్తాయి. అరగంట ముందుగానే అవి తెరచుకోవాల్సి ఉంటుంది. సాయంత్రం వేళ ఎన్నిగంటలకు వాటిని మూసివేయాల్సి ఉంటుందనేది ఈ ప్రకటనలో పొందుపరచలేదు.

అరగంట ముందుగా తెరచుకోవాల్సి రావడం వల్ల ఖాతాదారులకు మరింత మెరుగైన సేవలను అందించినట్టువుతుందని, వారి సౌలభ్యాన్ని దృష్టిలో ఉంచుకుని ఈ నిర్ణయం తీసుకున్నామని గవర్నర్ వివరించారు. ఏటీఎంల నుంచి నగదు విత్​డ్రాపైనా ఆయన కీలక ప్రకటన చేశారు. త్వరలో అన్ని బ్యాంకుల ఖాతాదారులు తమ వద్ద కార్డు లేకపోయినా ఏటీఎంల నుంచి నగదును విత్​డ్రా చేసుకోవచ్చు. దీనికి యూనైటెడ్​ పేమెంట్​ ఇంటర్​ఫేస్​ (యూపీఐ)లో రిజిస్ట్రేషన్​ చేసుకుని ఉండటం తప్పనిసరి చేసినట్లు వివరించారు.

దీనికి సంబంధించిన పూర్తి మార్గదర్శకాలను త్వరలోనే ఖరారు చేస్తామని వెల్లడించారు. కార్డ్‌లెస్ ట్రాన్సాక్షన్స్ వల్ల వినియోగదారులు మోసాలకు గురి కాబోరని, వాటిని అరికట్టడానికే ఈ సౌకర్యాన్ని అందుబాటులోకి తీసుకుని రానున్నామని చెప్పారు. జాతీయ, ప్రైవేటు బ్యాంకులన్నీ ఒకేదఫాలో ఖాతాదారుల కోసం కార్డ్‌లెస్ ఏటీఎం లావాదేవీలను అమలు చేసేలా మార్గదర్శకాలు, విధి విధానాలను రూపొందిస్తామని పేర్కొన్నారు.