హోమ్ లోన్, కారులోన్‌పై బ్యాంక్ ఆఫ్ బరోడా పండుగ ఆఫర్

పండుగ సందర్భంగా ప్రభుత్వరంగదిగ్గజం స్టేట్ బ్యాంక్ ఆఫ్ ఇండియా(SBI), ప్రయివేటురంగ బ్యాంకులు హెచ్‌డీఎఫ్‌సీ, ఐసీఐసీఐ పర్సనల్ లోన్, ఆటో లోన్, హోమ్ లోన్, క్రెడిట్ కార్డ్స్ పైన ఆఫర్లతో పాటు ప్రాసెసింగ్ ఫీజులపై కూడా డిస్కౌంట్ ప్రకటించాయి. ఇప్పుడు బ్యాంక్ ఆఫ్ బరోడా(BOB) కూడా ఫెస్టివెల్ ఆఫర్స్ ప్రకటించింది. బ్యాంక్ ఆఫ్ బరోడా మూడో అతిపెద్ద ప్రభుత్వరంగ బ్యాంకు. పండుగ సీజన్ నేపథ్యంలో రిటైల్ రుణాలపై ఆఫర్లు ప్రకటించింది.

బ్యాంకు ప్రస్తుతం అందిస్తోన్న వడ్డీరేట్లపై పావు శాతం వడ్డీ రేటును తగ్గించింది. ఈ ఆఫర్ బీవోబీ హోమ్ లోన్స్(టేక్ ఓవర్ కేసులు మాత్రమే), కారు రుణాలకు వర్తిస్తుంది. వడ్డీ రేటు తగ్గింపుతో పాటు ప్రాసెసింగ్ ఫీజును కూడా రద్దు చేసింది. ఈ పండుగ సీజన్‌లో నమ్మకమైన వినియోగదారులతో పాటు కొత్త కస్టమర్లు వాహన రుణాలు తీసుకునేందుకు, హోమ్ లోన్స్ BoBకి మార్చుకునే వారికి గిఫ్టుగా అందిస్తున్నామని బ్యాంకు పేర్కొంది.

పండుగ చేసుకో! కస్టమర్లకు HDFC అదిరిపోయే ఆఫర్లు, రూ.7,000 వరకు క్యాష్‌బ్యాక్

ఈ లోన్ దరఖాస్తులపై ఎలాంటి ప్రాసెసింగ్ ఫీజులు వసూలు చేయడం లేదని BoB హైదరాబాద్ జోనల్ జనరల్ మేనేజర్ శ్రీనివాస్ తెలిపారు. పండగ సీజన్ ఆఫర్ కింద వడ్డీ రేటు, ప్రాసెసింగ్ ఫీజుల్లో ఈ ప్రత్యేక రాయితీ ఇస్తున్నామన్నారు.