FD Rates Hike: డిపాజిట్లపై వడ్డీ రేట్లు పెంచిన బ్యాంక్ ఆఫ్ బరోడా.. ఏ కాలానికి ఎంతంటే..??

Bank Of Baroda: రిజర్వు బ్యాంక్ ఇటీవల జరిగిన ఎంపీసీ సమావేశంలో సైతం వడ్డీ రేట్లను స్థిరంగా కొనసాగిస్తున్నట్లు ప్రకటించింది. దీంతో చాలా బ్యాంకులు తమ రుణ రేట్లతో పాటు డిపాజిట్లపై చెల్లించే వడ్డీ రేట్లలో మార్పులు ప్రకటిస్తున్నాయి.

ఈ క్రమంలో ప్రభుత్వ యాజమాన్యంలోని బ్యాంక్ ఆఫ్ బరోడా ఫిక్స్‌డ్ డిపాజిట్(FD) రేట్లపై వడ్డీ రేట్లను పెంచుతున్నట్లు ప్రకటించింది. ముందుగా 3 ఏళ్ల వరకు కాలానికి చేసే డిపాజిట్లపై 50 బేసిస్ పాయింట్ల వరకు వడ్డీని పెంచింది. ఈ రేటు అక్టోబర్ 9 నుంచి రూ.2 కోట్ల కంటే తక్కువ మెుత్తం డిపాజిట్లపై వర్తిస్తుందని బ్యాంక్ పేర్కొంది. 2-3 ఏళ్ల మధ్య కాలానికి సీనియర్ సిటిజన్లు చేసే డిపాజిట్లపై ప్రస్తుతం 7.90 శాతం వరకు వడ్డీని అందిస్తున్నట్లు సంస్థ అధికారి వెల్లడించారు.

సాధారణ పౌరులకు బ్యాంక్ 7.40% వరకు, సీనియర్ సిటిజన్లకు 7.90% వరకు వడ్డీ రేట్లను అందిస్తోంది. బ్యాంక్ తన తిరంగా ప్లస్ డిపాజిట్ స్కీమ్‌పై వడ్డీ రేట్లను 399 రోజులకు మార్చింది. సీనియర్ సిటిజన్లు స్కీమ్ కింద కాల్ చేయని డిపాజిట్లపై 7.80% వడ్డీని పొందుతారని తెలిపింది. బ్యాంక్ ఆఫ్ బరోడా ఇంతకు ముందు మే 2023, మార్చి 2023లో రిటైల్ టర్మ్ డిపాజిట్ వడ్డీ రేట్లను పెంచింది. వివిధ కాలవ్యవధులకు రూ.2 కోట్ల నుంచి రూ.10 కోట్ల వరకు చేసే బల్క్ డిపాజిట్లపై బ్యాంక్ చెల్లించే వడ్డీని 100 బేసిస్ పాయింట్ల వరకు పెంచింది. బ్యాంక్ మొబైల్ యాప్, నెట్ బ్యాంకింగ్ ద్వారా కస్టమర్‌లు ఆన్‌లైన్ FDని కూడా తెరవవచ్చు.

బ్యాంక్ ఆఫ్ బరోడా "BOB కే సంగ్ త్యోహార్ కి ఉమంగ్" పేరుతో ఇప్పటికే పండుగ ప్రచారాన్ని ప్రారంభించింది. ఇందులో వినూత్న పథకాలను ప్రారంభించింది. పండుగ ప్రచారం 31 డిసెంబర్, 2023 వరకు కొనసాగుతుంది. బ్యాంక్ కస్టమర్ల నుంచి ప్రోత్సాహకరమైన ప్రతిస్పందనను పొందుతోంది.