Bank strike: ఈ తేదీల్లో SBI సేవలకు అంతరాయం!

బ్యాంకుల ప్రయివేటీకరణను వ్యతిరేకిస్తూ తొమ్మిది ప్రధాన ఉద్యోగ సంఘాలు ఈ నెల 15వ తేదీ, 16వ తేదీల్లో సమ్మెకు పిలుపునిచ్చాయి. దీంతో రెండు రోజుల పాటు సాధారణ బ్యాంకు కార్యకలాపాలకు ఆటంకం కలిగే అవకాశం ఉందని స్టాక్ ఎక్స్చేంజీలకు ప్రభుత్వరంగ దిగ్గజం స్టేట్ బ్యాంక్ ఆఫ్ ఇండియా సమాచారం అందించింది. బ్యాంకుల ప్రయివేటీకరణ నిర్ణయంతో పాటు తిరోగమన బాటలో ఉన్న బ్యాంకింగ్ సంస్కరణలను వెనక్కి తీసుకోవాలని ఉద్యోగ సంఘాలు ప్రకటించాయి.

బ్యాంకు శాఖల్లో కార్యకలాపాలు కొనసాగేందుకు అవసరమైన చర్యలు తీసుకుంటున్నట్లు ఎస్బీఐ తెలిపింది. తొమ్మిది ప్రధాన సంఘాలకు ప్రాతినిథ్యం వహిస్తున్న యునైటెడ్ ఫోరమ్ ఆఫ్ బ్యాంక్ యూనియన్స్ (UFBU) ఇటీవల రెండు రోజుల సమ్మెకు పిలుపునిచ్చింది. దీంతో ఈ రెండు రోజులు తమ సేవలకు విఘాతం కలగవచ్చని ఎస్బీఐ వెల్లడించింది. సమ్మె సందర్భంగా అన్ని శాఖలు యథాతథంగా పని చేసేలా ఏర్పాట్లు చేశామని, అయినా వ్యాపార కార్యకలాపాలపై ప్రభావం ఉండవచ్చునని తెలిపింది. సమ్మె వల్ల ఎంత నష్టం ఉంటుందో అప్పుడే చెప్పలేమని వెల్లడించింది.

కాగా, బ్యాంకులకు ఈ నెలలో సెలవులు ఉన్నాయి. వచ్చే వారం పది రోజుల్లో బ్యాంకులు ఎక్కువ రోజులు మూసివేసి ఉండనున్నాయి. గురువారం మార్చి 11 శివరాత్రి సందర్భంగా బ్యాంకులు పని చేయవు. శుక్రవారం మార్చి 12, 2021 ఒకరోజు బ్యాంకులు పని చేస్తాయి. ఆ తర్వాత శనివారం మార్చి 13, ఆదివారం మార్చి 14 రెండు రోజులు సెలవు. రెండో శనివారం కారణంగా బ్యాంకులు బంద్ ఉంటాయి. ఆదివారం బ్యాంకులు పని చేయవు.