బెంగళూరు రియల్ ఎస్టేట్: ఈ ఖరీదైన ఇళ్లు కొనే రహస్యం ఏంటి?

బెంగళూరులో రోజూ ఏదో ఒక కొత్త విషయం వైరల్ అవుతూనే ఉంటుంది. ఇప్పుడు ఓ బెంగళూరు వాసి ఆవేదన దేశవ్యాప్తంగా చర్చనీయాంశమైంది. భారత ఐటీ హబ్‌గా పేరుగాంచిన బెంగళూరులో టెక్కీలకు భారీ జీతాలు వస్తుంటాయి. దీనివల్ల ఇక్కడ ఖర్చులు కూడా అదే స్థాయిలో ఆకాశాన్నంటుతున్నాయి.

ముఖ్యంగా రియల్ ఎస్టేట్ రంగంలో ఈ పరిస్థితి మరీ ఎక్కువగా ఉంది. బెంగళూరులో ప్రస్తుతం అమ్మకానికి ఉన్న 3BHK అపార్ట్‌మెంట్ల ప్రారంభ ధర రూ.1.5 కోట్ల నుంచి మొదలై రూ.2.5 కోట్ల నుంచి రూ.6 కోట్ల వరకు పలుకుతోంది.

అయినా సరే, బుకింగ్స్ ఓపెన్ చేసిన కొద్ది వారాల్లోనే అపార్ట్‌మెంట్లన్నీ హాట్ కేకుల్లా అమ్ముడైపోతున్నాయి. ఇటీవల ఓ వైపుకు ఒరిగిపోవడంతో కూల్చివేయాలని ఆదేశించిన అపార్ట్‌మెంట్‌లోని ఫ్లాట్లు కూడా పూర్తిగా అమ్ముడయ్యాయంటే పరిస్థితి అర్థం చేసుకోవచ్చు.

అయితే, బెంగళూరు టెక్ రంగంలో ఉద్యోగాల కోతలు, ఏఐ టెక్నాలజీ వల్ల ఉద్యోగ భద్రత లేకపోవడం వంటి ఎన్నో సమస్యలు ఉన్నాయి. ఇలాంటి పరిస్థితుల్లో ప్రజలు ఇంత ఖరీదైన ఇళ్లను ఎలా కొనుగోలు చేస్తున్నారు?

బెంగళూరు వాసుల దగ్గర ఇంత డబ్బు ఎలా ఉంది? అంటూ రెడ్డిట్ (Reddit) ప్లాట్‌ఫామ్‌లో అడిగిన ఒక ప్రశ్న ఇప్పుడు దేశవ్యాప్తంగా పెద్ద చర్చకు దారితీసింది.

'Bangalore Real Estates' అనే రెడ్డిట్ పేజీలో అడిగిన ఈ ప్రశ్నలో.. 'బెంగళూరు ప్రజలు రూ.2.5 కోట్ల నుంచి రూ.6 కోట్ల విలువైన ఇళ్లను ఎలా కొంటున్నారు? పెద్ద మొత్తంలో డౌన్‌పేమెంట్ చెల్లించినా, నెలవారీ ఈఎంఐ సులభంగా రూ.1-1.5 లక్షల వరకు ఉంటుంది. అంటే, ఈ ఇళ్లు కొనేవాళ్లు నెలకు రూ.3-5 లక్షల వరకు సంపాదిస్తున్నారా?' అని ప్రశ్నించారు.

'ఉద్యోగాల కోతలు, ఏఐ భయాల మధ్య 20-25 ఏళ్ల సుదీర్ఘ రుణంలోకి ఎలా వెళ్లగలుగుతున్నారు? దీని వెనుక ఉన్న రహస్యం ఏంటి? అందరి ఇళ్లలోనూ డబుల్ ఇన్‌కమ్ (భార్యాభర్తలిద్దరూ సంపాదించడం) ఉందా? లేక కుటుంబ ఆస్తులు లేదా పాత ఆస్తులను అమ్మి వచ్చిన డబ్బుతో కొంటున్నారా?' అంటూ ఆ వ్యక్తి ప్రశ్నల వర్షం కురిపించారు.

ఈ పోస్టుకు నెటిజన్లు రకరకాల సమాధానాలు ఇచ్చారు. వాటిలో కొన్ని సమాధానాలు అయితే షాకింగ్‌గా ఉన్నాయని చెప్పాలి. 'బెంగళూరులో 15 ఏళ్లుగా పనిచేస్తున్న వారి పవర్ మీకు తెలియదు' అని ఒకరు కామెంట్ చేయగా, 'బెంగళూరులో రూ.2 కోట్ల విలువైన ఇళ్లు చాలా వరకు హోమ్ లోన్ లేకుండానే కొంటున్నారు' అని మరొకరు తెలిపారు.

ఇక మూడో వ్యక్తి అయితే, 'చాలా మంది ఐటీ ఉద్యోగులు లగ్జరీ ఇళ్లు కొనడానికి 10-15 ఏళ్లుగా స్టాక్ మార్కెట్‌లో పెట్టిన పెట్టుబడులను, లాభాల్లో ఉన్న షేర్లను అమ్మి ఆ డబ్బుతో కొంటున్నారు' అని వెల్లడించారు.

మరి మీ స్నేహితులు, బంధువుల్లో ఎవరైనా ఇటీవల బెంగళూరులో ఇలాంటి ఖరీదైన ఇల్లు కొన్నారా? మీ సమాధానాన్ని కామెంట్స్‌లో చెప్పండి.