Banking News: కొత్త బిజినెస్‌లోకి బంధన్ బ్యాంక్.. NBFCలతో జతకట్టేందుకు రెడీ..

Banking News: నాన్ బ్యాంకింగ్ ఫైనాన్షియల్ సంస్థలను ఒకచోటికి చేర్చడానికి ఇటీవల రిజర్వ్ బ్యాంక్ ఆఫ్ ఇండియా చర్యలు చేపట్టింది. కాగా బంధన్ బ్యాంక్ కూడా NBFCలతో జత కట్టడానికి సిద్ధమైంది. కొత్త వ్యాపారంలోకి ప్రవేశించనున్నట్లు బ్యాంక్ ప్రకటించింది.

కొత్తగా కో-లెండింగ్ బిజినెస్ లోకి దిగుతున్నట్లు బంధన్ బ్యాంక్ MD&CEO చంద్రశేఖర్ ఘోష్ తెలిపారు. మొత్తం 2 NBFCలతో కలవనున్నట్లు ప్రకటించారు. బ్యాంక్ వ్యవస్థాపక దినోత్సవం సందర్భంగా జరిగిన ఓ కార్యక్రమంలో ఈ మేరకు వెల్లడించారు. తద్వారా రుణాలిచ్చే అన్ని విభాగాలనూ ఈ వ్యాపారం కవర్ చేస్తునందని చెప్పారు.

"మేము కొన్ని NBFCలను ఎంచుకున్నాము. త్వరలో వాటితో టై అప్ అవుతాము" అని ఘోష్ ప్రకటించారు. 8 ఏళ్ల క్రితం ప్రారంభమైన బ్యాంక్.. ప్రస్తుతం 35 రాష్ట్రాలు, కేంద్ర పాలిత ప్రాంతాల్లో మొత్తం 6 వేల 100 శాఖలతో సేవలందిస్తోందన్నారు. తాజాగా లేహ్‌ లో ఓ బ్రాంచ్ లాంచ్ చేయగా.. వచ్చే నెలలో కార్గిల్‌ లో మరో శాఖను ప్రారంభిస్తామని తెలిపారు.

బ్యాంకుకు 3 కోట్ల మంది కస్టమర్లు ఉన్నారని.. వ్యాపార సామర్థ్యం 2 లక్షల కోట్లకు పైమాటేనని వెల్లడించారు. CASA డిపాజిట్లు 39 శాతం వద్ద ఉన్నట్లు చెప్పారు. మొత్తం బ్యాంకు లావాదేవీల్లో 94 శాతం డిజిటల్ మోడ్ లో జరుగుతన్నట్లు పేర్కొన్నారు. భౌగోళికంగా, పోర్ట్‌ ఫోలియో వారీగా వైవిధ్యభరితంగా బిజినెస్ కొనసాగిస్తున్నామన్నారు.