Bajaj Finance: ఇంట్రాడేలో భారీగా నష్టపోయిన బజాజ్ ఫైనాన్స్.. RBI ఆదేశాలతో ఏకంగా 4 శాతం పతనం

Bajaj Finance: దేశీయ ఈక్విటీ మార్కెట్లలో బుల్స్ జోరు కొనసాగుతున్న వేళ.. బజాజ్ ఫైనాన్స్ స్టాక్ నేలచూపులు చూసింది. రిజర్వ్ బ్యాంక్ ఆదేశాల ప్రభావం ప్రస్ఫుటంగా కనిపించింది. దీంతో స్టాక్ తీవ్ర ఒత్తిడికి గురైంది. షేర్ విలువ ఏకంగా 4 శాతం వరకు క్షీణింంచింది.

బజాజ్ ఫైనాన్స్ కు సంబంధించిన రెండు లెండింగ్ ఉత్పత్తులపై రిజర్వ్ బ్యాంక్ ఆఫ్ ఇండియా ఆంక్షలు విధించింది. eCOM మరియు Insta EMI కార్డ్ కింద రుణాల మంజూరును నిలిపివేయాలని కోరింది. వీటిని వెంటనే అమల్లోకి తీసుకురావాలని సూచించడంతో కంపెనీ షేర్లలో భారీగా అమ్మకాల ఒత్తిడి కనిపించింది.

డిజిటల్ లెండింగ్ గైడ్‌లైన్స్‌లో పేర్కొన్న నిబంధనలను పాటించడంలో బజాజ్ ఫైనాన్స్ విఫలం కావడంతో RBI ఈ చర్యలు తీసుకున్నట్లు తెలుస్తోంది. దీంతో ఈరోజు ఇంట్రాడేలో స్టాక్ విలువ 4 శాతం మేర పడిపోయి.. 6,937 కనిష్ఠని టచ్ చేసింది. అయితే ప్రస్తుతం మార్కెట్లలో నెలకొన్న బుల్ రన్‌ వల్ల తిరిగి పుంజుకుంటోంది.

రెండు రుణ ఉత్పత్తులకు సంబంధించిన కీలక వాస్తవాలు రుణగ్రహీతలకు తెలిసేలా ప్రకటనలు జారీ చేయకపోవడం, ఇతర స్టేట్‌మెంట్‌లలో లోపాల కారణంగా నియంత్రణ సంస్థ జోక్యం చేసుకున్నట్లు RBI ఓ ప్రకటనలో పేర్కొంది. గుర్తించిన లోపాలు సరిదిద్దబడిన తర్వాత ఈ పరిమితులను తిరిగి రివ్యూ చేస్తామని స్పష్టం చేసింది. కాగా ఇవాళ మధ్యాహ్నం 1 గంట సమయానికి దాదాపు 1.1 శాతం లాభంతో 7,300 వద్ద స్టాక్ ట్రేడవుతోంది.