బేబీ బూమర్లు డబ్బులు లేక విలవిలలాడిపోతారు.. అమెరికా రిటైర్మెంట్ వ్యవస్థపై రాబర్ట్ కియోసాకి ఆందోళన ..

Baby Boomer Retirement: ప్రముఖ అంతర్జాతీయ ఫైనాన్షియల్ నిపుణుడు, 'రిచ్ డాడ్ పూర్ డాడ్' పుస్తక రచయిత రాబర్ట్ కియోసాకి అమెరికా పదవీ విరమణ (Retirement) వ్యవస్థ, స్టాక్ మార్కెట్, బాండ్లపై మరోసారి సంచలన వ్యాఖ్యలు చేశారు. ముఖ్యంగా 1946 నుండి 1964 మధ్య జన్మించిన 'బేబీ బూమర్' తరానికి రిటైర్మెంట్ తర్వాత తీవ్రమైన ఆర్థిక ఇబ్బందులు ఎదురయ్యే ప్రమాదం ఉందని Robert Kiyosaki హెచ్చరించారు. 1970ల కాలంలో 401(k) వంటి పథకాలు ప్రవేశపెట్టబడినప్పటికీ.. సరైన ఆర్థిక విద్య లేకపోవడం వల్ల సాధారణ ప్రజలు ఎలాంటి ముందస్తు జ్ఞానం లేకుండానే వాటిలో పెట్టుబడులు పెట్టాల్సి వచ్చిందని తన 'ఎక్స్' (ట్విట్టర్) ఖాతా ద్వారా పేర్కొన్నారు.

1960ల కాలంలో కొత్తగా వెలిసిన 'ఫైనాన్షియల్ ప్లానర్' వృత్తి ద్వారా బేబీ బూమర్లకు 60 శాతం షేర్లు, 40 శాతం బాండ్లలో పెట్టుబడి పెట్టే సంప్రదాయ 60:40 విధానాన్ని అలవాటు చేశారని కియోసాకి విమర్శించారు. ఆ సమయంలో సరైన ఫైనాన్షియల్ ఎడ్యుకేషన్ లేకపోవడమే కాకుండా, ప్లానర్లకు నామమాత్రపు శిక్షణతో లైసెన్సులు లభించేవని గుర్తుచేశారు. గ్లోబల్ మార్కెట్లలో వస్తున్న మార్పుల దృష్ట్యా ఈ పాతకాలపు 60:40 వ్యూహం రిటైర్‌మెంట్ దశలో ఉన్నవారికి సురక్షితం కాదని ఆయన అభిప్రాయపడ్డారు.

ప్రస్తుతం 2026లో ప్రపంచవ్యాప్తంగా ఉన్న పలు దేశాల సెంట్రల్ బ్యాంకులు అమెరికా ప్రభుత్వ బాండ్లను (US Treasuries) పెద్దఎత్తున విక్రయిస్తూ, సురక్షిత ఆస్తిగా భావించి భారీగా బంగారాన్ని కొనుగోలు చేస్తున్నాయని కియోసాకి ప్రస్తావించారు. బాండ్ల ధరలు విపరీతంగా పడిపోతే అది స్టాక్ మార్కెట్లపై తీవ్ర ఒత్తిడి తెస్తుందని, ఫలితంగా S&P 500 వంటి ప్రధాన సూచీలు క్రాష్ అయితే రిటైర్‌మెంట్ ఫండ్స్‌పై ఆధారపడిన లక్షలాది మంది బేబీ బూమర్లు తీవ్రంగా నష్టపోతారని ఆందోళన వ్యక్తం చేశారు. దీనివల్ల వయోవృద్ధులు తమ పిల్లలు లేదా మనవళ్లపై ఆర్థికంగా ఆధారపడాల్సిన దుస్థితి రావచ్చునని, అయితే తన అంచనాలు తప్పాలని తాను మనస్ఫూర్తిగా కోరుకుంటున్నానని తెలిపారు.

Also Read

వెండిని భారీగా దాచిపెట్టుకుంటున్న బ్యాంకులు.. సామాన్యులకు సిల్వర్ దొరకదంటున్న రాబర్ట్ కియోసాకి..

2008 లెహ్‌మాన్ బ్రదర్స్ సంక్షోభం సమయంలో తాను ఇచ్చిన హెచ్చరికలను గుర్తుచేస్తూ, కాగితపు కరెన్సీల స్థిరత్వం తగ్గుతున్న వేళ బంగారం, వెండి, బిట్‌కాయిన్ (Bitcoin) వంటి రియల్ అసెట్స్‌లోనే అసలైన రక్షణ ఉంటుందని పునరుద్ధరించారు. తాను ఎలాంటి ఫైనాన్షియల్ అడ్వైజర్‌ను కాదని, రెంటింగ్ అపార్ట్‌మెంట్లు మరియు చమురు బావుల వంటి నిజమైన క్యాష్‌ఫ్లో ఇచ్చే ఆస్తులలోనే స్వయంగా ఇన్వెస్ట్ చేస్తున్నానని స్పష్టం చేశారు.

ప్రజల్లో ఆర్థిక అవగాహన పెంచడమే లక్ష్యంగా 1996లో తమ మాజీ భార్య కిమ్‌తో కలిసి 'క్యాష్‌ఫ్లో' బోర్డ్ గేమ్‌ను, 1997లో 'రిచ్ డాడ్ పూర్ డాడ్' పుస్తకాన్ని తీసుకువచ్చామని చెప్పారు. పాఠశాలలు, వాల్‌స్ట్రీట్ బోధించని ఆర్థిక విషయాలను ప్రజలు స్వయంగా నేర్చుకోవాలని కోరారు. "ఎంత ఎక్కువ నేర్చుకుంటే.. ఎంతగా ఇతరులకు నేర్పిస్తే.. అంతగా సంపన్నులవుతారు" అనే సందేశంతో కియోసాకి తన సందేశాన్ని ముగించారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.