జీఎస్‌టి 2.0 ఎఫెక్ట్‌తో ఆటోమొబైల్ రంగం ఉత్సాహంలో...టాటా, మారుతి సేల్స్ వృద్ధి ఎప్పుడూ ఇంత చూడలేదట!

ఫైనాన్స్ మంత్రి నిర్మలా సీతారామన్ చెప్పినట్లుగా, సెప్టెంబర్ 22న కొత్త జీఎస్‌టి 2.0 రేట్లు అమలులోకి వచ్చిన తర్వాత, భారతదేశ ఆటోమొబైల్ పరిశ్రమకు పెద్ద ప్రోత్సాహం లభించింది. జీఎస్‌టి తగ్గింపుల వల్ల కారు కొనుగోలు ఆసక్తి గణనీయంగా పెరిగింది. ఫలితంగా కారు విక్రయాలు రెట్టింపు అయి 5 లక్షల యూనిట్లకు చేరాయి. అలాగే, మొత్తం వాహనాల రీటైల్ సేల్స్ నవరాత్రి నుండి దీపావళి వరకు 6.5 - 7 లక్షల యూనిట్ల మధ్యన నమోదయాయి. అంటే, కొత్త పన్ను విధానం మరియు పండుగ సీజన్ కలిసిన కారణంగా మార్కెట్‌లో అమ్మకాలు భారీగా పెరిగాయి, వినియోగదారులు కూడా కొత్త కార్లు కొనడానికి ఉత్సాహంగా ఉన్నారు.

X పోస్ట్‌లో మంత్రి సీతారామన్, జీఎస్‌టి 2.0 వినియోగదారుల డిమాండ్‌ను గణనీయంగా పెంచింది, ముఖ్యంగా పండుగల సమయంలో. ఈ-కామర్స్ మరియు క్విక్-కామర్స్ ప్లాట్ఫారమ్‌లలో విక్రయాలు బాగా పెరిగాయి, ప్రీమియం ఉత్పత్తులు మరియు ఇన్‌స్టంట్ డెలివరీ సర్వీసులు మెట్రో సెంటర్లను దాటి వృద్ధికి దారితీసాయి అని పేర్కొన్నారు.

పండుగల సీజన్‌లో ఆటోమొబైల్ రంగం భారీ ఉత్సాహాన్ని చూసింది. జీఎస్‌టి రేట్లు తగ్గించడం కూడా ఈ వృద్ధికి ముఖ్య కారణమైంది. నవరాత్రి నుంచి దీపావళి వరకు ప్రజలు కొత్త వాహనాలు కొనడానికి పెద్ద సంఖ్యలో ముందుకు వచ్చారు. టాటా మోటార్స్ ఒక్కటే ఈ సీజన్‌లో 1 లక్ష కార్లను డెలివర్ చేసింది ఇది గత ఏడాదితో పోల్చితే 33% పెరుగుదల. SUV మోడళ్ల పై ప్రజల్లో ప్రత్యేక ఆసక్తి ఉండటంతో కంపెనీ అమ్మకాలు మరింత పెరిగాయి.

అదే సమయంలో మారుతి సుజుకి ఇండియా కూడా బలమైన డిమాండ్‌ను నమోదు చేసింది. కారు మరియు SUV వాహనాలపై డిమాండ్ గణనీయంగా పెరిగింది. దీనికి ప్రధాన కారణాలు స్థానికంగా తయారైన ఉత్పత్తుల పై వినియోగదారుల విశ్వాసం, అలాగే జీఎస్‌టి రేట్ల తగ్గింపుతో వాహనాల ధరలు కొంత తగ్గడం. ఈ రెండు అంశాలు కలిపి పండుగ సీజన్‌లో ఆటోమొబైల్ విక్రయాలను గణనీయంగా పెంచాయి.

ఈ సంవత్సరం పండుగల సీజన్‌ వ్యాపారాలకు పెద్ద ఊపును తెచ్చిందని నిపుణులు చెబుతున్నారు. ఆన్‌లైన్‌ మరియు ఆఫ్‌లైన్‌ షాపింగ్‌ డిమాండ్‌ భారీగా పెరగడంతో లాజిస్టిక్స్‌, ట్రాన్స్‌పోర్ట్‌, ప్యాకేజింగ్‌ మరియు డెలివరీ వంటి రంగాల్లో పెద్ద ఎత్తున తాత్కాలిక ఉద్యోగాలు సృష్టించబడే అవకాశం ఉంది. అంచనా ప్రకారం, ఈ రంగాల్లో మొత్తం సుమారు 50 లక్షల మందికి పండుగల సీజన్‌ కారణంగా తాత్కాలిక ఉపాధి లభించనుంది. వస్తువుల రవాణా, ఆర్డర్ల డెలివరీ, గోడౌన్లు నిర్వహణ వంటి పనుల్లో తాత్కాలిక సిబ్బంది అవసరం పెరగడంతో ఇది సాధ్యమవుతోంది. వ్యాపార సంస్థలు కూడా ఈ సీజన్‌ను ఉపయోగించుకుని అమ్మకాల లక్ష్యాలను పెంచాయి. నిపుణుల అంచనా ప్రకారం, 2025 పండుగల సేల్స్‌ మొత్తం విలువ రూ. 6.05 లక్షల కోట్లు చేరే అవకాశం ఉంది. ఇది ఇప్పటివరకు రికార్డుగా నిలవబోతుంది.

కొత్తగా అమలు చేసిన జీఎస్‌టి 2.0 పన్ను సవరణలు కేవలం కారు తయారీదారులకే కాకుండా, వాటికి సంబంధిత అనుబంధ రంగాలకు లాజిస్టిక్స్‌, స్పేర్‌ పార్ట్స్‌, సర్వీస్‌ సెంటర్లు, షోరూమ్‌లు వంటి విభాగాలకు కూడా మేలుచేయనున్నాయి. పన్ను భారాన్ని తగ్గించడం వల్ల వాహనాల ధరలు కొంత తగ్గి, వినియోగదారుల కొనుగోలు ఆసక్తి పెరగనుంది. అంతేకాక పండుగల సీజన్‌లో ప్రజలు కొత్త వాహనాలు కొనుగోలు చేయడానికి ముందుకు రావడం వల్ల మార్కెట్‌లో డిమాండ్‌ మరింతగా పెరిగింది. మొత్తం మీద, జీఎస్‌టి 2.0 వల్ల ఆటోమొబైల్ రంగం వేగంగా వృద్ధి చెందే అవకాశం ఉంది. ఇది భారత ఆర్థిక వ్యవస్థకు కూడా ఒక బలమైన ప్రోత్సాహకంగా పనిచేయనుంది.