కేంద్రం నిర్ణయంపై అష్నీర్ గ్రోవర్ ఫైర్.. గేమ్ ఆడటానికి 100 లోడ్ చేస్తే సగానికిపైగా ట్యాక్స్ కట్టాలా?

ఆన్‌ లైన్ గేమింగ్ పై 28 శాతం GST విధిస్తూ కేంద్రం నిర్ణయం తీసుకుంది. ఇండస్ట్రీని దెబ్బతీయడం తమ ఉద్దేశం కాదని కేంద్ర ఆర్థిక మంత్రి నిర్మలా సీతారామన్ ప్రకటించారు. ఆయా రాష్ట్రాలతో సంప్రదిచిన తరువాతే ఈ డెసిషన్ తీసుకున్నట్లు వెల్లడించారు. కాగా ఈ నిర్ణయంపై భారత్‌ పే సహ వ్యవస్థాపకులు అష్నీర్ గ్రోవర్ తనదైన శైలిలో స్పందించారు.

తమ ప్లాట్‌ ఫారమ్స్ లో కస్టమర్లు లోడ్ చేసే నిధులపై కేంద్రం 28 శాతం GST విధించడంపై గ్రోవర్ ఆగ్రహం వ్యక్తం చేశారు. విరాట్ కోహ్లి, MS ధోని, సౌరవ్ గంగూలీ సహా BCCI కూడా ఆన్‌లైన్ గేమింగ్‌ను సమర్థిస్తున్నట్లు చెప్పారు. ఫాంటసీ స్పోర్ట్స్ ప్లాట్‌ఫారమ్ డ్రీమ్ 11ని టైటిల్ స్పాన్సర్‌గా అంగీకరించినట్లు గుర్తు చేశారు. అప్పుడు తీసుకోని ఈ నిర్ణయం ఇప్పుడెందుకు అని ప్రశ్నిస్తూ ట్వీట్ చేశారు.

'విదేశీ ప్రత్యక్ష పెట్టుబడులు ప్రవాహంలా రావడాన్ని ప్రభుత్వం గతంలో సెలబ్రేట్ చేసుకుంది. రెగ్యులేటరీ రిస్క్ వల్ల ఇప్పుడు అవికాస్తా మందగిస్తాయి. ఈ ఇబ్బంది కేవలం ఆన్‌ లైన్ గేమింగ్ ఇండస్ట్రీకే కాక మొత్తం స్టార్టప్స్ సిస్టమ్ కు వర్తిస్తుంది. భవిష్యత్తులో అన్ని టెక్ కంపెనీలు దుబాయ్ లేదా సింగపూర్ కేంద్రంగానే పనిచేస్తాయి. రిస్క్ తీసుకుని ఇండియాలో ఆపరేట్ చేయడంలో అర్థం లేదు' అని గ్రోవర్ అభిప్రాయపడ్డారు.

ప్రభుత్వ నిర్ణయం ఆన్‌ లైన్ గేమింగ్ ఇండస్ట్రీని అంతమొందిస్తుందని అష్నీర్ తెలిపారు. యాప్‌ లో 100 లోడ్ చేస్తే 28 GST కింద పోతాయి. మిగిలిన 72తోనే ఆడుకోవాల్సి ఉంటుంది. ప్లాట్ ఫారమ్ ఛార్జీలకు అదనంగా 54 గెలిస్తే, మళ్లీ దానిపై 30 శాతం TDS పే చేయాల్సి ఉంటుంది. ఈ పన్నులన్నీ మినహాయించగా మిగిలిన మొత్తంతో గేమర్స్ ఎంజాయ్ చేస్తారని ప్రభుత్వం భావిస్తోందంటూ విమర్శించారు.