Iran Israel war: యుద్ధాల్లో ఇరుక్కుపోయినప్పుడు ఏం చేయాలో తెలుసా? ప్రతి ఒక్కరూ తెలుసుకోవాల్సి విషయాలు!

పశ్చిమాసియాలో ఉద్రిక్తతలు పతాక స్థాయికి చేరుకున్నాయి. అమెరికా, ఇజ్రాయెల్, ఇరాన్ మధ్య జరుగుతున్న ఘర్షణల (Iran Israel war) ప్రభావం ఇప్పుడు గల్ఫ్ దేశాలపై తీవ్రంగా పడుతోంది. ఈ నేపథ్యంలో దుబాయ్, ఖతార్ వంటి 14 గల్ఫ్ దేశాల్లో నివసిస్తున్న లక్షలాది మంది భారతీయుల భద్రతపై ఆందోళన వ్యక్తమవుతోంది. భారత విదేశీ వ్యవహారాల శాఖ , ఆయా దేశాల్లోని భారత రాయబార కార్యాలయాలు (Embassies) అక్కడి భారతీయుల కోసం కీలకమైన మార్గదర్శకాలను జారీ చేశాయి. అవేంటో ఇప్పుడు వివరంగా తెలుసుకుందాం.

అధికారిక సమాచారాన్ని మాత్రమే నమ్మండి

ఖతార్‌లోని భారత రాయబార కార్యాలయం ఇటీవల జారీ చేసిన అప్‌డేట్‌లో, ప్రజలు స్థానిక అధికారుల ఆదేశాలను ఖచ్చితంగా పాటించాలని కోరింది. సోషల్ మీడియాలో వచ్చే పుకార్లను నమ్మవద్దని, కేవలం అధికారిక ఛానెళ్ల ద్వారా వచ్చే సమాచారాన్ని మాత్రమే పరిగణనలోకి తీసుకోవాలని సూచించింది. అబుదాబి , దుబాయ్‌లోని భారత రాయబార కార్యాలయాలు కూడా ఇదే విధమైన సూచనలు చేశాయి. యుద్ధం (Iran Israel war) వంటి అత్యవసర పరిస్థితుల్లో తప్పుడు సమాచారం వల్ల భయాందోళనలు చెందకుండా జాగ్రత్త పడటం చాలా ముఖ్యం.

ఇళ్లలోనే సురక్షితంగా ఉండండి

ప్రస్తుతం ఆకాశంలో డ్రోన్లు , క్షిపణుల ముప్పు పొంచి ఉన్నందున, భారతీయులందరూ ఇళ్లలోనే ఉండాలని కేంద్ర ప్రభుత్వం సూచించింది. సోమవారం నాడు జరిగిన ఒక ప్రమాదంలో అమెరికా యుద్ధ విమానం కూడా కూలిపోవడం అక్కడి అనిశ్చిత పరిస్థితికి అద్దం పడుతోంది. అత్యవసరమైతే తప్ప బయటకు రావద్దని ఖతార్ అంతర్గత వ్యవహారాల మంత్రిత్వ శాఖ గట్టిగా హెచ్చరించింది. సురక్షితమైన, మూసి ఉన్న ప్రదేశాల్లో ఉండటం వల్ల ప్రాణాపాయం నుండి రక్షణ పొందవచ్చని అధికారులు వివరిస్తున్నారు.

ప్రయాణాలను వాయిదా వేసుకోండి

ప్రస్తుతం గల్ఫ్ ప్రాంతంలో విమానయాన రంగం తీవ్రంగా ప్రభావితమైంది. ఖతార్ ఎయిర్‌స్పేస్ ఇంకా మూతపడే ఉండటంతో హమద్ ఇంటర్నేషనల్ ఎయిర్‌పోర్ట్‌లో విమాన సర్వీసులు నిలిచిపోయాయి. దుబాయ్ ఎయిర్‌పోర్ట్ కార్యకలాపాలు కొంత మేర పునఃప్రారంభమైనప్పటికీ, పరిమితంగానే నడుస్తున్నాయి. కాబట్టి ప్రయాణికులు విమానాశ్రయాలకు వెళ్లే ముందు సంబంధిత ఎయిర్‌లైన్స్ ద్వారా విమానాల స్టేటస్‌ను సరిచూసుకోవాలి. వీలైతే ప్రస్తుతానికి ప్రయాణాలను వాయిదా వేసుకోవడమే మంచిది.

భారత రాయబార కార్యాలయ హెల్ప్‌లైన్ నంబర్లు

ఏదైనా అత్యవసర సహాయం కోసం భారత రాయబార కార్యాలయం 24/7 హెల్ప్‌లైన్ నంబర్లను అందుబాటులో ఉంచింది.

• ఖతార్ (దోహా): ఫోన్: [phone], ఈమెయిల్: [email protected]
• అబుదాబి (యూఏఈ): టోల్ ఫ్రీ నంబర్: 800-46342, వాట్సాప్: [phone], ఈమెయిల్: [email protected]

భారత విదేశాంగ మంత్రి ఎస్. జైశంకర్ ఇప్పటికే గల్ఫ్ దేశాల మంత్రులతో మాట్లాడి, శాంతిని నెలకొల్పేందుకు దౌత్యపరమైన చర్చలు జరుపుతున్నారు. గల్ఫ్‌లో ఉన్న మన వాళ్లంతా ధైర్యంగా ఉంటూ అధికారులకు సహకరించాలని ప్రభుత్వం కోరుతోంది. యుద్ధం (Iran Israel war) ప్రభావం తగ్గే వరకు ప్రతి ఒక్కరూ అప్రమత్తంగా ఉండటం అవసరం.

యుద్ధం సమయంలో సేఫ్టీ ఇలా..

యుద్ధం లేదా అంతర్యుద్ధం వంటి పరిస్థితులు తలెత్తినప్పుడు భయాందోళన చెందకుండా 'సర్వైవల్ ప్లాన్' సిద్ధం చేసుకోవడం ప్రాణాలను కాపాడుతుంది. ముందుగా ఒక 'గో-బ్యాగ్' (Go-Bag) సిద్ధం చేసుకోవాలి. ఇందులో కనీసం మూడు రోజులకు సరిపడా నీళ్లు, పాడవని ఆహార పదార్థాలు (బిస్కెట్లు, నట్స్), టార్చ్ లైట్, రేడియో, పవర్ బ్యాంక్, అత్యవసర మందులు ఉండాలి. వైమానిక దాడులు లేదా క్షిపణి దాడులు జరిగినప్పుడు కిటికీలకు దూరంగా ఉండాలి. ఒకవేళ బాంబు షెల్టర్లు అందుబాటులో లేకపోతే.. ఇంటి లోపల కిటికీలు లేని గదిలో లేదా మెట్ల కింద (Lowest floor) దాక్కోవడం సురక్షితం. అలాగే మీ పాస్‌పోర్ట్, ఆధార్ వంటి ముఖ్యమైన పత్రాలను ఒక వాటర్ ప్రూఫ్ కవరులో ఎల్లప్పుడూ మీ దగ్గరే ఉంచుకోవాలి. స్థానిక అధికారులు , ఎంబసీలు ఇచ్చే సూచనలను ఎప్పటికప్పుడు రేడియో లేదా సోషల్ మీడియా ద్వారా గమనిస్తూ ఉండటం వల్ల ప్రమాదాల నుండి త్వరగా బయటపడవచ్చు.