ఇరాన్ యుద్దం దెబ్బ.. బంగారం కొనడం మానేసి అమ్మేసుకుంటున్న కేంద్ర బ్యాంకులు.. కారణం ఏంటంటే..

ఇటీవలి కాలంలో అంతర్జాతీయ మార్కెట్‌లో బంగారం ధరలు అనూహ్యంగా తగ్గడం వెనుక ఉన్న లోతైన, ఆందోళనకరమైన కారణాలు అనేకం ఉన్నాయి. సాధారణంగా డాలర్ బలపడటం లేదా వడ్డీ రేట్లు పెరగడం వల్ల బంగారం ధరలు తగ్గుతాయని మనం భావిస్తాం.. కానీ ప్రస్తుత పరిస్థితులు అంతకంటే భిన్నంగా ఉన్నాయి. గత కొన్నేళ్లుగా బంగారం ధరలకు వెన్నుముకగా నిలిచిన ప్రపంచ దేశాల కేంద్ర బ్యాంకులు (Central Banks).. ఇప్పుడు తామే స్వయంగా బంగారాన్ని విక్రయించాల్సిన క్లిష్ట పరిస్థితిలోకి నెట్టబడటమే ఈ ధరల పతనానికి ప్రధాన కారణంగా చెప్పవచ్చు.

ఏటా సుమారు 1,000 టన్నుల బంగారాన్ని కొనుగోలు చేస్తూ మార్కెట్‌కు ఒక రక్షణ కవచంలా నిలిచిన కేంద్ర బ్యాంకులు..2026 ఏప్రిల్ నాటికి విక్రయదారులుగా మారాయి. దీనికి ప్రధాన కారణం మధ్యప్రాచ్యంలో నెలకొన్న యుద్ధ వాతావరణం.. దాని ఫలితంగా ఆకాశాన్నంటిన చమురు ధరలు అని చెప్పవచ్చు.

చమురు ధరలు పెరగడంతో ప్రపంచవ్యాప్తంగా డాలర్‌కు డిమాండ్ పెరిగి, ఇతర దేశాల కరెన్సీలు బలహీనపడ్డాయి. తమ దేశ కరెన్సీ విలువ పాతాళానికి పడిపోకుండా కాపాడుకోవడానికి, ద్రవ్యోల్బణాన్ని నియంత్రించడానికి ఆయా దేశాల కేంద్ర బ్యాంకులు తమ వద్ద ఉన్న బంగారు నిల్వలను నగదుగా మార్చుకోక తప్పడం లేదు.

ఈ విక్రయాల్లో టర్కీ అత్యంత కీలక పాత్ర పోషిస్తోంది. ఇరాన్ యుద్ధ ప్రభావంతో తమ దేశ కరెన్సీ 'లీరా'ను రక్షించుకోవడానికి టర్కీ ఏకంగా 60 టన్నుల బంగారాన్ని (సుమారు 8 బిలియన్ డాలర్లు) మార్కెట్లో విక్రయించింది. మరోవైపు గత రెండేళ్లుగా బంగారాన్ని విపరీతంగా కొనుగోలు చేసిన పోలాండ్ కూడా ఇప్పుడు తన నిల్వలను ఉపయోగించుకోవాలని చూడటం మార్కెట్ విశ్వాసాన్ని దెబ్బతీసింది. వీటన్నిటికీ మించి రష్యా తన యుద్ధ ఖర్చుల కోసం దాదాపు 25 ఏళ్ల తర్వాత మొదటిసారిగా ఫిజికల్ Gold బార్లను మార్కెట్లోకి విడుదల చేస్తోంది. 2026 మొదటి రెండు నెలల్లోనే రష్యా దాదాపు 14 టన్నుల బంగారాన్ని అమ్మడం మార్కెట్‌పై తీవ్ర ఒత్తిడిని పెంచింది.

బంగారం, వెండి ధరలు భారీగా తగ్గాలంటే రూపాయి బలపడాల్సిందే.. ఆర్థిక నిపుణులు ఏమంటున్నారంటే..

సాంకేతికంగా చూస్తే.. జనవరి 2026లో ఔన్సు Gold ధర 5,596 డాలర్ల రికార్డు స్థాయికి చేరినప్పటికీ, మార్చి చివరి నాటికి అది 4,428 డాలర్లకు పడిపోయింది. ఇది దాదాపు 21 శాతం తగ్గుదల. రిలేటివ్ స్ట్రెంత్ ఇండెక్స్ (RSI) 28 వద్ద ఉండటం మార్కెట్ 'ఓవర్‌సోల్డ్' స్థితిలో ఉందని సూచిస్తున్నప్పటికీ, కేంద్ర బ్యాంకుల బలవంతపు అమ్మకాలు కొనసాగినంత కాలం ధరలు వెంటనే కోలుకోవడం కష్టమని నిపుణులు భావిస్తున్నారు. ఒకవేళ ఒత్తిడి ఇలాగే కొనసాగితే బంగారం ధర 4,079 డాలర్ల మద్దతు స్థాయికి లేదా అంతకంటే దిగువకు పడిపోయే ప్రమాదం ఉంది.

అయితే దీర్ఘకాలికంగా బంగారం తన ప్రాముఖ్యతను కోల్పోలేదని విశ్లేషకులు గుర్తు చేస్తున్నారు. ప్రపంచవ్యాప్తంగా ఉన్న అనిశ్చితి, డాలర్ ప్రభావం నుండి బయటపడాలనే దేశాల ప్రయత్నాలు బంగారానికి భవిష్యత్తులో మద్దతునిస్తాయి.

ప్రస్తుతానికి కొనుగోలుదారులుగా ఉండాల్సిన వారే అమ్మకందారులుగా మారడం వల్ల ఈ తాత్కాలిక పతనం సంభవించింది. చమురు ధరలు తగ్గి, డాలర్ కొద్దిగా బలహీనపడితే బంగారం ధర మళ్లీ 5,000 డాలర్ల మార్కును దాటే అవకాశం ఉంది. పెట్టుబడిదారులు ప్రస్తుత మార్కెట్ ఒత్తిడిని గమనిస్తూ, దీర్ఘకాలిక ప్రయోజనాల కోసం వేచి చూడటం ఉత్తమమని నిపుణులు చెబుతున్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.