Apple News: 'సిరి' టీమ్‌పై ఆపిల్ కీలక నిర్ణయం.. ఇండియా ఆపరేషన్స్‌పై రావాల్సిన స్పష్టత

Siri: స్మార్ట్‌ఫోన్‌ మేకింగ్‌లో ఐఫోన్ తయారీదారు ఆపిల్ రారాజుగా వెలుగొందుతోంది. ఎన్ని బ్రాండ్‌లు ఉన్నప్పటికీ తన అన్‌బీటబుల్‌ ఓఎస్‌ ఫీచర్స్, టెక్ హంగులతో మార్కెట్‌లో లీడర్‌గా కొనసాగుతోంది. అయితే తాజాగా ఆ కంపెనీ తీసుకున్న నిర్ణయం ఇండియా ఆపరేషన్స్‌పైనా ప్రభావం చూపనున్నట్లు తెలుస్తోంది.

ఆర్టిఫిషియల్ ఇంటెలిజెన్స్ (AI) సంబంధిత కార్యకలాపాలను చేపట్టే శాన్ డియాగో ఆధారిత యూనిట్‌ను ఆపిల్ మూసివేస్తోంది. ఈ క్యాంపస్‌లోని డేటా ఆపరేషన్స్ యాన్నొటేషన్స్‌(సిరి వాయిస్ అసిస్టెంట్) టీమ్‌కు కంపెనీ ఈ మేరకు సమాచారం ఇచ్చింది. టెక్సాస్‌, ఆస్టిన్‌లకు మకాం మార్చాలని వారిని ఆదేశించింది. అక్కడ అదే విధమైన కార్యకలాపాలు నిర్వహిస్తున్న బృందంతో కలిసి పనిచేయాలని కోరింది.

'అమెరికా‌లోని డేటా ఆపరేషన్స్ యాన్నొటేషన్స్ బృందం ఆస్టిన్‌లోని మా క్యాంపస్‌లో ఒకచోట చేర్చబడుతోంది. మెజారిటీ బృందం ఇప్పటికే అక్కడ ఉంది. ప్రస్తుతం శాన్ డియాగోలో ఉద్యోగం చేస్తున్న ప్రతి ఒక్కరూ ఆస్టిన్‌లోని ఆపిల్ క్యాంపస్‌లో తమ ఉద్యోగం కొనసాగించే అవకాశం ఉంటుంది' అని కంపెనీ ప్రతినిధి తెలిపారు.

ఈ నిర్ణయంతో డెవలప్‌మెంట్ విభాగంలోని 121 మందిలో పలువురు నిరుద్యోగులుగా మారే అవకాశం ఉంది. బదిలీకి అంగీకరిస్తారా లేదా అని నిర్ణయించుకోవడానికి సిబ్బందికి ఫిబ్రవరి చివరి వరకు సమయం ఇచ్చారు. ఆఫర్‌ను అంగీకరించే వారు జూన్ చివరి నాటికి తరలించబడతారు. కాగా తిరస్కరించిన వారు ఏప్రిల్ 26లోపు తొలగించబడతారని తెలుస్తోంది. ఈ ఆపరేషన్స్ USతో పాటు ఇండియాలోనూ నిర్వహించబడుతుండటంతో.. ఇక్కడ పరిస్థితిపై స్పష్టత రావాల్సి ఉంది.