Flipkart: ఫ్లిప్‌కార్ట్‌కి భారీ ఎదురుదెబ్బ.. గట్టి షాక్‌ ఇచ్చిన బిన్నీ బన్సాల్

Binny Bansal: దేశీయ ఇ-కామర్స్ రంగంలో పలు సంస్కరణలకు ఫ్లిప్‌కార్ట్ నాంది పలికింది. దీంతో నంబర్ 1 ప్లేయర్‌గా కొనసాగుతోంది. అయితే ఎన్నో కలలతో కంపెనీని మొదలుపెట్టిన వ్యవస్థాపకుల్లో ఒకరైన సచిన్ బన్సాల్.. సంస్థ నుంచి ఇటీవల నిష్క్రమించారు. కాగా ఇప్పుడు కంపెనీకి మరో ఎదురుదెబ్బ తగిలింది.

ఫ్లిప్‌కార్ట్ సహ వ్యవస్థాపకులు బిన్నీ బన్సాల్ కూడా ఇటీవలే ప్లిప్‌కార్ట్‌లో తన మిగిలిన వాటాను విక్రయించారు.అనంతరం తాజాగా బోర్డు నుంచి అధికారికంగా రాజీనామా చేసినట్లు మీడియా నివేదికలు చెబుతున్నాయి. ఫిన్‌టెక్ 'నవీ'ని కొనసాగించేందుకు కొన్నేళ్ల క్రితం సహ వ్యవస్థాపకులు సచిన్ బన్సాల్ ఫ్లిప్‌కార్ట్ నుంచి వైదొలిగారు. అయితే మరోసారి ఇ-కామర్స్ రంగంలోకి ప్రవేశించాలనే బిన్నీ బన్సాల్ ఆలోచిస్తున్నట్లు తెలుస్తోంది.

గత 16 ఏళ్లుగా ఫ్లిప్‌కార్ట్ గ్రూప్ సాధించిన విజయాలపై బిన్నీ హర్షం వ్యక్తం చేశారు. సమర్థవంతమైన నాయకత్వ బృందంతో కలిసి కంపెనీని బలమైన స్థానంలో నిలబెట్టినట్లు ధృవీకరించారు. 'కంపెనీ సమర్థుల చేతుల్లో ఉందని తెలుసు. నేను పక్కకు తప్పుకోవాలని నిర్ణయించుకున్నాను. కస్టమర్స్ అనుభవాలను మెరుగుపరచడంతోపాటు వ్యాపారానికి బలమైన మద్దతుదారునిగా కొనసాగుతాను. జట్టుకు శుభాకాంక్షలు తెలుపుతున్నాను' అని పేర్కొన్నారు.

బిన్నీ విశిష్ఠ సహకారానికి వాల్మెక్స్ ప్రాంతీయ CEO లీ హాప్‌కిన్స్ కృతజ్ఞతలు తెలిపారు. ఫ్లిప్‌కార్ట్ CEO మరియు బోర్డ్ మెంబర్ కళ్యాణ్ కృష్ణమూర్తి కూడా ఆయన భాగస్వామ్యానికి ప్రశంసలు తెలియజేశారు. బోర్డులో అతను తీసుకువచ్చిన అమూల్యమైన మార్పులను మరియు నైపుణ్యాభివృద్ధిని ప్రశంసించారు. దేశంలో షాపింగ్ అనుభవాన్ని మార్చడానికి కట్టుబడి ఉన్న గొప్ప అంకితభావంతో కూడిన టీమ్‌వర్క్ ఫలితంగా ఫ్లిప్‌కార్ట్‌ ఇవాళ ఈ స్థాయిలో ఉందన్నారు.