ఏపీకి పెట్టుబడుల వెల్లువ.. రూ.1 లక్ష కోట్లకు ఆంధ్రప్రదేశ్ SIPB ఆమోదం.. 26 కొత్త పరిశ్రమలు..85 వేల ఉద్యోగాలు

ఆంధ్రప్రదేశ్ రాష్ట్రంలో పారిశ్రామికీకరణ కొత్త దశలోకి అడుగుపెడుతోంది. ముఖ్యమంత్రి ఎన్. చంద్రబాబు నాయుడు అధ్యక్షతన శుక్రవారం జరిగిన 12వ రాష్ట్ర పెట్టుబడి ప్రోత్సాహక బోర్డు (SIPB) సమావేశంలో రూ.1,01,899 కోట్ల పెట్టుబడులకు ఆమోదం లభించింది. ఈ పెట్టుబడుల ద్వారా రాష్ట్రవ్యాప్తంగా 26 కొత్త పరిశ్రమలు ఏర్పాటు కానున్నాయి. సుమారు 85,870 ఉద్యోగాలు వస్తాయని ప్రభుత్వం ప్రకటించింది.

ప్రభుత్వ అధికారిక పత్రికా ప్రకటన ప్రకారం.. ఈ తాజా ఆమోదాలతో కలిపి ఆంధ్రప్రదేశ్ ఇప్పటి వరకు మొత్తం రూ.8 లక్షల కోట్లకు పైగా పెట్టుబడులను ఆకర్షించింది.ఈ పెట్టుబడులు 7 లక్షలకుపైగా ప్రజలకు ఉపాధి అవకాశాలను కల్పిస్తున్నాయి. ఈ ప్రాజెక్టులు పరిశ్రమల విభాగాల వారీగా విస్తరించి ఉంటాయి. ఆటోమొబైల్, ఫుడ్ ప్రాసెసింగ్, గ్రీన్ ఎనర్జీ, ఐటీ, ఎలక్ట్రానిక్స్, మాన్యుఫ్యాక్చరింగ్ రంగాల్లో పెట్టుబడులు ప్రధానంగా ఉంటాయని అధికార వర్గాలు వెల్లడించాయి.

పరిశ్రమలు అనుకున్న సమయానికి ప్రారంభమయ్యేలా చర్యలు తీసుకోవాలని అధికారులను ముఖ్యమంత్రి చంద్రబాబు నాయుడు ఆదేశించారు. అలాగే రాష్ట్రంలో క్లస్టర్ ఆధారిత పారిశ్రామిక అభివృద్ధి కోసం 15 పారిశ్రామిక మండలాలను ఏర్పాటు చేయాలని ఆయన సూచించారు.ప్రతి ప్రాంతం ప్రత్యేకతను బట్టి పరిశ్రమలను ఆకర్షించాలి. ఉదాహరణకు ఉత్తర ఆంధ్రలో లోజిస్టిక్స్, మెటల్ పరిశ్రమలు, మధ్య ఆంధ్రలో ఆహార ప్రాసెసింగ్, దక్షిణ ఆంధ్రలో టెక్స్‌టైల్, ఐటీ రంగాలను అభివృద్ధి చేయాలని నాయుడు అన్నారు.

కేంద్ర ప్రభుత్వం అందించే పారిశ్రామిక ప్రోత్సాహకాలను సమర్థంగా వినియోగించుకోవాలని సీఎం సూచించారు. అదే సమయంలో ల్యాండ్ బ్యాంక్ వ్యవస్థను బలోపేతం చేయాల్సిన అవసరాన్ని ఆయన నొక్కి చెప్పారు. తమ భూమిని పరిశ్రమలకు అందించాలనుకునే రైతులు లేదా వ్యక్తులను అధికారులు ప్రోత్సహించాలి. వారితో పారిశ్రామికీకరణకు దోహదం చేసే విధంగా సమన్వయం చేయాలని ఆయన తెలిపారు.

విశాఖపట్నంను విజయనగరం, అనకాపల్లి ప్రాంతాలను కలుపుతూ మెగా సిటీగా అభివృద్ధి చేయాలని సూచించారు.అలాగే అమరావతి, తిరుపతిని పర్యాటకం, ఐటీ, విద్యా కేంద్రాలుగా తీర్చిదిద్దాలనే దిశగా ప్రణాళికలు రూపొందించాలని ఆదేశించారు. ఇది రాష్ట్ర ఆర్థిక వ్యవస్థకు కొత్త జీవం పోస్తుందని ఆయన పేర్కొన్నారు. నవంబర్ 14, 15 తేదీల్లో విశాఖపట్నంలో జరగనున్న CII భాగస్వామ్య సదస్సు రాష్ట్ర పెట్టుబడి వాతావరణానికి కీలక మలుపుగా నిలుస్తుందని తెలిపారు.ఈ సదస్సును విజయవంతం చేయడానికి సంబంధిత శాఖలు సమగ్ర ఏర్పాట్లు చేయాలని ఆయన ఆదేశించారు.