బెంగళూరుకు పోటీగా ఏపీలో కొత్త హాట్‌స్పాట్.. ఏకంగా రూ. 50,000 కోట్ల పెట్టుబడులతో ఊహించని ప్లాన్!

ఆంధ్రప్రదేశ్‌లోని రాయలసీమ ప్రాంతం త్వరలోనే ఒక భారీ ఇండస్ట్రియల్ హబ్‌గా మారబోతోంది. కర్నూలు జిల్లాలోని ఓర్వకల్లు ప్రాంతం.. ఇప్పుడు సౌత్ ఇండియాలోనే మోస్ట్ వాంటెడ్ ఇన్వెస్ట్‌మెంట్ డెస్టినేషన్‌గా అవతరిస్తోంది. ఐటీ, పరిశ్రమలకు కేరాఫ్ అడ్రస్‌గా ఉన్న బెంగళూరు (Bengaluru) నగరానికి చేరువలో ఉండటం ఈ ప్రాంతానికి పెద్ద ప్లస్ పాయింట్‌గా మారింది. ఇక్కడ దాదాపు రూ. 50,000 కోట్ల పెట్టుబడులను ఆకర్షించడమే లక్ష్యంగా ఆంధ్రప్రదేశ్ ప్రభుత్వం శరవేగంగా అడుగులు వేస్తోంది. ఫుడ్ ప్రాసెసింగ్, మాన్యుఫ్యాక్చరింగ్ (తయారీ రంగం), లాజిస్టిక్స్ వంటి రంగాల్లో బడా కంపెనీలు ఇక్కడ ప్లాంట్లు పెట్టేందుకు క్యూ కడుతున్నాయి.

అసలు ఓర్వకల్లు ఎందుకు హాట్ కేక్‌లా మారింది?

హైదరాబాద్-బెంగళూరు ఇండస్ట్రియల్ కారిడార్ (HBIC) లో భాగంగా దాదాపు 2,621 ఎకరాల భారీ విస్తీర్ణంలో ఈ ఓర్వకల్లు ఇండస్ట్రియల్ నోడ్‌ను డెవలప్ చేస్తున్నారు. నేషనల్ హైవే 40 (NH40) పై పక్కా ప్లానింగ్‌తో ఇది రూపుదిద్దుకుంటోంది.
ఇక్కడి నుండి హైదరాబాద్ కేవలం 215 కిలోమీటర్లు, అలాగే ఐటీ హబ్ బెంగళూరు (Bengaluru).. 360 కిలోమీటర్ల దూరంలో ఉన్నాయి. రెండు మెట్రో నగరాలకు పక్కనే ఉండటం వల్ల రవాణా చాలా ఈజీ అవుతుంది. దీనికి తోడు 2021లోనే ఇక్కడ ఓర్వకల్లు ఎయిర్‌పోర్ట్ ప్రారంభం కావడం మరో పెద్ద అసెట్. పరిశ్రమలకు కావలసిన కార్గో రవాణాకు, ఇన్వెస్టర్లు వచ్చి వెళ్ళడానికి ఈ ఎయిర్‌పోర్ట్ బాగా ఉపయోగపడుతోంది. తక్కువ ధరకే భూములు దొరకడం, తక్కువ నిర్వహణ ఖర్చులు, పోర్టులకు కనెక్టివిటీ ఉండటంతో కంపెనీలు ఇటు వైపు చూస్తున్నాయి.

45,000 మందికి పైగా ఉద్యోగాలు!

ఈ భారీ ప్రాజెక్టు వల్ల రాయలసీమ యువతకు పెద్ద ఎత్తున ఉపాధి దొరకబోతోంది. రాబోయే కొద్ది సంవత్సరాల్లోనే తయారీ, లాజిస్టిక్స్, ఫుడ్ ప్రాసెసింగ్ రంగాల్లో దాదాపు 45,000 మందికి పైగా ప్రత్యక్ష, పరోక్ష ఉద్యోగ అవకాశాలు వస్తాయని ప్రభుత్వం అంచనా వేస్తోంది.

ముఖ్యంగా ఇక్కడ ఏర్పాటు చేయబోయే మెగా ఫుడ్ ప్రాసెసింగ్ ప్రాజెక్టుల వల్ల స్థానిక రైతులకు చాలా మేలు జరుగుతుంది. వారి పంటలకు మంచి డిమాండ్ ఏర్పడి, గ్రామీణ ఆర్థిక వ్యవస్థ ఊపందుకుంటుంది. కేవలం పెద్ద కంపెనీలే కాకుండా, వాటికి సరుకులు సరఫరా చేసే చిన్న, మధ్య తరహా పరిశ్రమలు (MSMEలు), వేర్‌హౌసింగ్, ట్రాన్స్‌పోర్ట్ బిజినెస్‌లు కూడా ఇక్కడ విపరీతంగా పెరుగుతాయి. పరిశ్రమలను ప్రోత్సహించడానికి ఏపీ ప్రభుత్వం సింగిల్ విండో ద్వారా వేగంగా అనుమతులు ఇవ్వడం, ఇన్సెంటివ్‌లు ప్రకటించడం కూడా ఇన్వెస్టర్లలో నమ్మకాన్ని పెంచింది.

సవాళ్లు.. మున్ముందు ఎలా ఉండబోతోంది?

టార్గెట్ రూ. 50,000 కోట్లుగా పెట్టుకున్నా, ఇప్పటికీ చాలా ప్రాజెక్టులు ఇంకా ప్రపోజల్స్, ప్లానింగ్ స్టేజ్‌లోనే ఉన్నాయి. లాజిస్టిక్స్ పార్కులు, రోడ్లు, కరెంట్, వాటర్ సప్లై వంటి ఇన్‌ఫ్రాస్ట్రక్చర్‌ను ప్రభుత్వం ఎంత వేగంగా పూర్తి చేస్తుందనే దానిపైనే దీని సక్సెస్ ఆధారపడి ఉంటుంది. అలాగే పక్కనే ఉన్న హైదరాబాద్, బెంగళూరు, చెన్నై వంటి పాత ఇండస్ట్రియల్ హబ్స్ నుండి గట్టి పోటీని తట్టుకోవాల్సి ఉంటుంది.

ఏదేమైనా, రాబోయే పదేళ్లలో ఆంధ్రప్రదేశ్‌లోనే అతిపెద్ద ఇండస్ట్రియల్ అండ్ లాజిస్టిక్స్ సెంటర్‌గా మారే సత్తా ఓర్వకల్లుకు ఉంది. పక్కాగా ప్లాన్స్ అమలైతే మాత్రం, సౌత్ ఇండియాలోనే ఇదొక నయా ఇండస్ట్రియల్ పవర్‌హౌస్ కావడం ఖాయం.