గుంటూరు ట్రాఫిక్ కష్టాలకు చెక్.. రూ. 108 కోట్లతో ఫోర్-లేన్ ఓవర్ బ్రిడ్జ్ వచ్చేస్తోంది.. ఎక్కడి నుంచంటే..

Andhra Pradesh News: ఆంధ్రప్రదేశ్ లోని కీలక నగరమైన గుంటూరులో దశాబ్దాలుగా ప్రయాణికులను వేధిస్తున్న ట్రాఫిక్ సమస్యలకు శాశ్వత పరిష్కారం చూపేందుకు కేంద్ర ప్రభుత్వం శ్రీకారం చుట్టింది. గుంటూరు - నంబూరు రైల్వే స్టేషన్ల మధ్య గుంటూరు-కృష్ణా కెనాల్ సెక్షన్‌లోని లెవెల్ క్రాసింగ్ (LC) గేట్ నంబర్ 3 స్థానంలో అధునాతన నాలుగు లేన్ల రోడ్ ఓవర్ బ్రిడ్జ్ (ROB) నిర్మాణానికి శంకుస్థాపన కార్యక్రమం ఘనంగా నిర్వహించడం జరిగింది. వంద శాతం కేంద్ర నిధులతో.. మొత్తం రూ. 108 కోట్ల అంచనా వ్యయంతో నిర్మించనున్న ఈ ప్రతిష్టాత్మక ప్రాజెక్ట్‌ను భారతీయ రైల్వే శాఖ పూర్తి బాధ్యతతో చేపట్టనుంది.

ఈ నూతన రోడ్ ఓవర్ బ్రిడ్జ్ గుంటూరు ఇన్నర్ రింగ్ రోడ్ సమీపంలో 668 మీటర్ల పొడవునా నిర్మాణం కానుంది. ప్రాజెక్ట్ అందుబాటులోకి వచ్చాక ఇది బస్ స్టాండ్ రోడ్, గోరంట్ల గ్రామాల మధ్య నేరుగా రాకపోకలు సాగించేందుకు సులువైన కనెక్టివిటీని అందిస్తుంది. ప్రస్తుతం ఉన్న లెవెల్ క్రాసింగ్ వద్ద రైళ్లు వెళ్లే సమయంలో గేటు మూసివేయడం వల్ల గంటల తరబడి వాహనాలు నిలిచిపోయి తీవ్రమైన ట్రాఫిక్ నిరోధం ఏర్పడుతోంది. ఈ 4-లేన్ల వంతెన పూర్తయితే లెవెల్ క్రాసింగ్‌ పూర్తిగా తొలగిపోవడమే కాకుండా.. వాహనదారులకు నిరంతరాయమైన ప్రయాణ సౌకర్యం లభించి ప్రయాణ సమయం, ఇంధనం ఆదా కానున్నాయి.

కేంద్ర రైల్వే, జలశక్తి శాఖ సహాయ మంత్రి వి. సోమన్న, కేంద్ర గ్రామీణాభివృద్ధి, సమాచార శాఖ సహాయ మంత్రి డాక్టర్ పెమ్మసాని చంద్రశేఖర్‌తో కలిసి ఈ ప్రాజెక్ట్‌కు భూమిపూజ చేశారు. ఈ సందర్భంగా మంత్రి వి. సోమన్న మాట్లాడుతూ.. భారతీయ రైల్వే వ్యవస్థలో ప్రయాణికుల భద్రత, కార్యాచరణ సామర్థ్యానికే ప్రథమ ప్రాధాన్యతనిస్తున్నామని తెలిపారు. ప్రమాదాలకు ఆస్కారమున్న లెవెల్ క్రాసింగ్‌ల స్థానంలో ఆర్‌వోబీలు, ఆర్‌యూబీలను నిర్మించడం వల్ల రైళ్ల సమయపాలన మెరుగుపడటంతో పాటు నగర భద్రత గణనీయంగా పెరుగుతుందని పేర్కొన్నారు. ఆంధ్రప్రదేశ్ వ్యాప్తంగా అమృత భారత్ పథకం కింద 74 రైల్వే స్టేషన్లను దాదాపు రూ. 3,500 కోట్ల వ్యయంతో ఆధునికీకరిస్తున్నట్లు ఆయన వెల్లడించారు.

Also Read

ఏపీకి బిగ్ బూస్ట్.. రూ. 4,178 కోట్ల రైల్వే ప్రాజెక్టులకు కేంద్ర ఆమోదం.. ఎక్కడనుంచి ఎక్కడికంటే..

కేంద్ర మంత్రి డాక్టర్ పెమ్మసాని చంద్రశేఖర్ మాట్లాడుతూ, గుంటూరు పరిసర ప్రాంతాలలో సుదీర్ఘకాలంగా పెండింగ్‌లో ఉన్న రవాణా సమస్యలను పరిష్కరించేందుకు కేంద్ర, రాష్ట్ర ప్రభుత్వాలు సమన్వయంతో వేగంగా పనిచేస్తున్నాయని స్పష్టం చేశారు. సుమారు 2.9 ఎకరాల భూసేకరణతో త్వరలోనే పనులు ప్రారంభం కానున్న ఈ బ్రిడ్జ్, గుంటూరు నగర సామాజిక, ఆర్థిక పురోగతికి సరికొత్త ఊపునిస్తుందని విశ్లేషకులు భావిస్తున్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.