ఏపీకి భారీ పెట్టుబడులు.. రూ.10 వేల కోట్లతో Suzlon విస్తరణ.. 1,325 MW విండ్ పవర్ ప్రాజెక్టులు వేగవంతం..

దేశీయ పవన విద్యుత్ రంగానికి చెందిన ప్రముఖ దిగ్గజ సంస్థ 'సుజ్లాన్ గ్రూప్', ఆంధ్రప్రదేశ్‌లో తన వ్యాపార విస్తరణలో భాగంగా ఏకంగా రూ. 10,000 కోట్ల భారీ పెట్టుబడులు పెట్టేందుకు సమాయత్తమైంది. రాష్ట్రంలో హరిత ఇంధన రంగాన్ని మరింత బలోపేతం చేసే లక్ష్యంతో అనంతపురం జిల్లాలోని రాయదుర్గం నియోజకవర్గంలో 1,325 మెగావాట్ల సామర్థ్యం కలిగిన నూతన పవన విద్యుత్ ప్రాజెక్టులను కంపెనీ అభివృద్ధి చేయనుంది. ఇందులో భాగంగా అనంతపురం జిల్లా కనేకల్లు మండలం హులికర్ గ్రామంలో సుజ్లాన్ తయారు చేసిన సరికొత్త 'ఎస్144' విండ్ బ్లేడ్ల ప్రారంభోత్సవ కార్యక్రమం రాష్ట్ర ఐటీ, ప్రాసెస్ మంత్రి నారా లోకేష్ చేతుల మీదుగా వైభవంగా జరగనుంది.

ఈ భారీ ప్రాజెక్టుల విస్తరణ ద్వారా రాష్ట్రంలో సుమారు 4,000 మంది యువతకు ప్రత్యక్షంగా, పరోక్షంగా కొత్త ఉపాధి అవకాశాలు లభిస్తాయని అంచనా వేస్తున్నారు. 2030 సంవత్సరం నాటికి ఆంధ్రప్రదేశ్‌లో అదనంగా 5 గిగావాట్ల పునరుత్పాదక ఇంధన సామర్థ్యాన్ని సాధించాలనే బలమైన లక్ష్యంతో సుజ్లాన్ ముందుకు సాగుతోంది. ప్రస్తుతం రాష్ట్రంలో ఈ సంస్థకు ఇప్పటికే 1,700 మెగావాట్లకు పైగా స్థాపిత పవన విద్యుత్ సామర్థ్యం అందుబాటులో ఉంది. 2004లోనే ఆంధ్రప్రదేశ్‌లో తన ప్రస్థానాన్ని ప్రారంభించిన సుజ్లాన్ సంస్థ.. నాటి నుండి అనంతపురం జిల్లాను కేంద్రంగా చేసుకుని తయారీ, ప్రాజెక్టుల నిర్వహణ రంగాలలో విస్రృతమైన పురోగతిని సాధించింది.

అనంతపురం జిల్లాలోని కుడేరు మండలం ఇప్పూరు వద్ద ఉన్న సుజ్లాన్ రోటర్ బ్లేడ్ తయారీ కేంద్రం కంపెనీకి అత్యంత కీలకమైన తయారీ యూనిట్లలో ఒకటిగా సేవలందిస్తోంది. ఇది టాటా పవర్ వంటి ప్రముఖ ఇంధన సంస్థలతో వ్యూహాత్మక భాగస్వామ్యాన్ని కలిగి ఉంటూ అనేక పవన విద్యుత్ ప్రాజెక్టుల నిర్మాణానికి ప్రాథమిక మద్దతును అందిస్తోంది. అనంతపురంలోని ఈ ప్రధాన బ్లేడ్ తయారీ విభాగంతో కలిపి కంపెనీ ఇప్పటివరకు ఆంధ్రప్రదేశ్ రాష్ట్రంలో సుమారు రూ. 12,000 కోట్ల మేర పెట్టుబడులు పెట్టింది. విశేషమేమిటంటే.. సుజ్లాన్ సంస్థ సాధించే మొత్తం బ్లేడ్ల ఉత్పత్తిలో దాదాపు 40 శాతం వాటా ఒక్క ఈ ప్లాంట్ నుంచే వస్తోంది. దీని వార్షిక ఉత్పత్తి సామర్థ్యం దాదాపు 1,260 మెగావాట్లకు సమానం కావడం గమనార్హం.

Also Read

కర్నూలు, నెల్లూరు జిల్లాలకు బిగ్ బూస్ట్.. రూ.630 కోట్లతో అగ్రో ఆధారిత యూనిట్లు.. 1,800 ఉద్యోగాలు..

ఈ ప్లాంట్, సంబంధిత ప్రాజెక్టుల కార్యకలాపాల ద్వారా ఇప్పటికే రాష్ట్రంలో సుమారు 2,200 మందికి పైగా స్థానిక నిపుణులకు ఉద్యోగావకాశాలు లభించాయి. కేవలం విద్యుత్ ఉత్పత్తికే పరిమితం కాకుండా, రాబోయే రోజుల్లో పునరుత్పాదక ఇంధన రంగానికి తగిన నైపుణ్యం కలిగిన యువతను సిద్ధం చేసే బృహత్తర లక్ష్యంతో ఆంధ్రప్రదేశ్ ప్రభుత్వం, యు సుజ్లాన్ గ్రూప్ సంయుక్తంగా ఒక భారీ హరిత నైపుణ్యాభివృద్ధి కార్యక్రమాన్ని విజయవంతంగా నిర్వహిస్తున్నాయి.

ఈ భాగస్వామ్యంలో భాగంగా ఉరవకొండ, విజయవాడ నగరాలలో ప్రత్యేక పవన శక్తి శిక్షణా కేంద్రాలను ఏర్పాటు చేశారు. ఇప్పటివరకు దాదాపు 12,000 మంది యువ సాంకేతిక నిపుణులకు సాంకేతిక రంగంలో నైపుణ్య శిక్షణ అందించడం విశేషం. అంతేకాకుండా, ఈ ఉపాధి సంబంధిత శిక్షణ పొందుతున్న వారిలో దాదాపు 25 శాతం వరకు మహిళలు ఉండటం, ప్రాంతీయంగా మహిళా సాధికారతకు మరియు హరిత ఇంధన రంగాభివృద్ధికి ఎంతో తోడ్పడుతోంది. ఈ నూతన రూ. 10,000 కోట్ల పెట్టుబడితో ఆంధ్రప్రదేశ్ రాష్ట్రం పవన విద్యుత్ ఉత్పత్తిలో దేశంలోనే అగ్రగామిగా నిలిచే దిశగా వేగంగా అడుగులు వేస్తోంది.