ఏపీలో రోడ్లు అద్దాలే ఇక.. 15 వేల కి.మీ.ల రోడ్లు డెవలప్ కోసం రూ.4,500 కోట్లు కేటాయించిన ప్రభుత్వం

ఆంధ్రప్రదేశ్ ముఖ్యమంత్రి నారా చంద్రబాబు నాయుడు శుక్రవారం అసెంబ్లీలో మాట్లాడుతూ.. రాష్ట్ర రహదారుల అభివృద్ధిపై ఒక మహత్తరమైన కార్యాచరణ ప్రణాళికను ప్రకటించారు. రోడ్లు, భవనాల శాఖ ఆధ్వర్యంలో దాదాపు 15 వేల కి.మీ.ల రోడ్లను మెరుగుపరచడానికి ప్రభుత్వం రూ.4,500 కోట్ల భారీ పెట్టుబడి కేటాయించిందని వెల్లడించారు. లాజిస్టిక్స్ ఖర్చులను తగ్గించడం ద్వారా ఉత్పత్తి వ్యయాలను తగ్గించవచ్చని, దాంతో ఆర్థికాభివృద్ధికి మరింత ఊతం లభిస్తుందని ముఖ్యమంత్రి స్పష్టం చేశారు. ఏ గ్రామానికైనా వెళ్లే రహదారులు సులభంగా అందుబాటులో ఉండాలి, ఎక్కడా రోడ్ల సమస్య ఉండకూడదని ఆయన ధృడంగా చెప్పారు.

రోడ్ల ప్రాముఖ్యతను వివరించిన చంద్రబాబు నాయుడు.. రహదారులు ఒక నాగరిక సమాజానికి ప్రతీకలుగా నిలుస్తాయని అన్నారు. సమాచార సాంకేతికత, టెక్నాలజీ, పరిశ్రమలు అన్నీ ఎంత ముందుకు వెళ్ళినా, మంచి రోడ్లు లేకపోతే అభివృద్ధి అసంపూర్ణమే అవుతుందని Andhra Pradesh CM వ్యాఖ్యానించారు. ఈ ప్రణాళికలో భాగంగా రాష్ట్రవ్యాప్తంగా రకరకాల రహదారుల అప్‌గ్రేడ్‌లు చేపట్టనున్నట్లు ఆయన తెలిపారు. అందులో 1,250 కి.మీ.ల రోడ్ల రైడింగ్ సర్ఫేస్ మెరుగుపరచడానికి రూ.400 కోట్లు, మరో 1,433 కి.మీ.ల రాష్ట్ర రహదారులు, ఇతర ప్రధాన రహదారుల అభివృద్ధికి రూ.600 కోట్లు ఖర్చు చేయనున్నారు. అదనంగా 5,946 కి.మీ.ల రహదారులపై రూ.500 కోట్లతో ఇంటెన్సివ్ ప్యాచ్‌వర్క్‌ చేపట్టనున్నారు.

రూ.1,000 కోట్లతో 2,104 కి.మీ.ల రహదారులను అప్‌గ్రేడ్ చేయనున్నారు. అలాగే, రూ.2,000 కోట్లతో 4,233 కి.మీ.ల రహదారులకు సమగ్ర అభివృద్ధి పనులు చేపట్టనున్నారు. ఈ ప్రణాళిక మొత్తం రాష్ట్ర రహదారి వ్యవస్థను ఒక కొత్త దశకు తీసుకెళ్లనుందని ఆయన విశ్వాసం వ్యక్తం చేశారు. ప్రస్తుతం ఆంధ్రప్రదేశ్‌లోని రోడ్డు నెట్‌వర్క్ 1.6 లక్షల కి.మీ.ల విస్తీర్ణంలో ఉంది. ఇందులో 8,360 కి.మీ.ల జాతీయ రహదారులు, 12,643 కి.మీ.ల రాష్ట్ర రహదారులు, 32,780 కి.మీ.ల ప్రధాన జిల్లా రోడ్లు, 25,670 కి.మీ.ల మున్సిపల్ రోడ్లు, 80,486 కి.మీ.ల పంచాయతీ రోడ్లు ఉన్నాయి.

అదే సమయంలో, 432 కి.మీ.ల మేర విస్తరించి ఉన్న 23 పోర్టులు, హార్బర్ రోడ్ కనెక్టివిటీ ప్రాజెక్టులను కూడా ప్రభుత్వం గుర్తించిందని ఆయన వెల్లడించారు. వీటికి దాదాపు రూ.18,485 కోట్ల పెట్టుబడులు కేటాయించినట్లు తెలిపారు. ప్రస్తుతం రాష్ట్రంలో 4,739 కి.మీ.ల జాతీయ రహదారి ప్రాజెక్టులు కొనసాగుతున్నాయని, వాటి విలువ రూ.1.5 లక్షల కోట్లకు చేరిందని సీఎం వివరించారు.

తీరప్రాంత అభివృద్ధిపై చంద్రబాబు మాట్లాడుతూ, ఆంధ్రప్రదేశ్‌ 1,053 కి.మీ. పొడవైన తీరరేఖను కలిగి ఉందని, ఇది అంతర్జాతీయ వాణిజ్యానికి ఒక గొప్ప వనరుగా నిలుస్తుందని చెప్పారు. ప్రపంచ మార్కెట్లకు ఉత్పత్తులను ఎగుమతి చేయడానికి, విదేశాలనుంచి వస్తువులను దిగుమతి చేసుకోవడానికి ఈ తీరప్రాంతం మరింత సహకారం అందిస్తుందని ఆయన పేర్కొన్నారు. లాజిస్టిక్స్ సామర్థ్యాలను మెరుగుపరచడంలో మెర్స్క్, డిపి వరల్డ్ వంటి అంతర్జాతీయ షిప్పింగ్ కంపెనీలతో కలిసి పనిచేయనున్నట్లు చంద్రబాబు నాయుడు తెలిపారు.

ఇక విమానాశ్రయాల అభివృద్ధిపై దృష్టి సారించిన ఆయన, వైజాగ్ సమీపంలోని భోగాపురం విమానాశ్రయం 2026 ఆగస్టులో ప్రారంభమవుతుందని, అమరావతి విమానాశ్రయాన్ని తూర్పు భారతదేశానికి గేట్‌వే హబ్‌గా తీర్చిదిద్దాలని సంకల్పించారు. ప్రస్తుతం ఆంధ్రప్రదేశ్‌లో ఆరు విమానాశ్రయాలు పనిచేస్తున్నాయి, ఒకటి నిర్మాణంలో ఉంది, మరో ఎనిమిది విమానాశ్రయాలు అభివృద్ధిలో ఉన్నాయని ఆయన వివరించారు. రహదారులు, పోర్టులు, విమానాశ్రయాలు, లాజిస్టిక్స్‌.. ఈ నాలుగు రంగాలలో పెట్టుబడులు పెంచడం ద్వారా ఆంధ్రప్రదేశ్‌ను జాతీయ స్థాయిలో ఒక శక్తివంతమైన ఇన్ఫ్రాస్ట్రక్చర్ హబ్‌గా నిలపాలని ఆయన భవిష్యత్తు పథకాన్ని వివరించారు.