ఏపీకి పెట్టుబడుల బూస్ట్.. కుప్పంలో రెండు కంపెనీలు భారీ ఇన్వెస్ట్‌మెంట్, 8 వేల మందికి ఉద్యోగాలు

స్వర్ణాంధ్ర విజన్ లో భాగంగా ఆంధ్రప్రదేశ్‌లో పెట్టుబడులు పెట్టేందుకు మరో రెండు కంపెనీలు ముందుకు వచ్చాయి. ముఖ్యమంత్రి నారా చంద్రబాబు నాయుడు సొంత నియోజకవర్గం కుప్పంలో శ్రీజ మహిళా పాల ఉత్పత్తి సంస్థ లిమిటెడ్ (MMPCL), మదర్ డెయిరీ తమ ప్రాసెసింగ్ యూనిట్లను ఏర్పాటు చేయడానికి సిద్ధంగా ఉన్నాయని సీఎం చంద్రబాబు తెలిపారు. సోమవారం చిత్తూరు జిల్లా కుప్పంలోని ముఖ్యమంత్రి కొత్త నివాసంలో రెండు కంపెనీల ప్రతినిధులు ముఖ్యమంత్రి చంద్రబాబు నాయుడును కలిసి, వారి విస్తరణ ప్రణాళికల గురించి వివరణాత్మక చర్చలు జరిపారు.

ఆంధ్రప్రదేశ్ ముఖ్యమంత్రి ఎన్ చంద్రబాబు నాయుడు సోమవారం మాట్లాడుతూ.. కుప్పంలో శ్రీజ పాల ఉత్పత్తిదారుల సంస్థ, మదర్ డెయిరీ ప్రతినిధులను కలిశాను. స్వర్ణాంధ్ర కోసం మా దార్శనికతకు అనుగుణంగా, సున్నా పేదరికాన్ని సాధించడానికి పెట్టుబడి ప్రణాళికల గురించి మేము చర్చించాము. ఈ దార్శనికతకు అనుగుణంగా, కంపెనీలకు కుప్పంలో వారి పారిశ్రామిక యూనిట్లను స్థాపించడానికి భూమిని కేటాయించామని తెలిపారు.

శ్రీజ పాల ఉత్పత్తిదారుల సంస్థ ఒక డెయిరీ, పశుగ్రాస ప్రాసెసింగ్ యూనిట్‌ను ఏర్పాటు చేస్తుంది. మదర్ డెయిరీ పండ్ల గుజ్జు ప్రాసెసింగ్ యూనిట్‌ను ఏర్పాటు చేస్తుంది. ఈ రెండు కంపెనీలు కలిసి 8,000 మందికి ఉపాధి కల్పిస్తాయి" అని ముఖ్యమంత్రి తన ఎక్స్ (గతంలో ట్విట్టర్) హ్యాండిల్‌లో పోస్ట్ చేశారు.ఈ కంపెనీలు రైతుల నుండి నేరుగా పాలు, ఉద్యానవన ఉత్పత్తులను సేకరించాలని యోచిస్తున్నందున ఈ కార్యక్రమాలు గ్రామీణ ఆర్థిక వ్యవస్థను బలోపేతం చేస్తాయని ఆయన విశ్వాసం వ్యక్తం చేశారు. పాల సేకరణ, హార్టీకల్చర్ ద్వారా గ్రామీణ రైతులు, మహిళల ఆర్థికాభివృద్ధికి తోడ్పడుతుందని సీఎం తెలిపారు.

శ్రీజ MMPCL మరియు మదర్ డెయిరీ రెండూ రాబోయే 18 నెలల్లో తమ ప్రాజెక్టులను ప్రారంభిస్తాయని నాయుడు తెలిపారు, ఈ పెట్టుబడులు ఈ ప్రాంతంలో సమ్మిళిత అభివృద్ధికి మద్దతు ఇవ్వడానికి గతంలో కుప్పం ప్రాంత అభివృద్ధి అథారిటీ (KADA)తో సంతకం చేసిన విస్తృత ఒప్పందంలో భాగమని ఆయన నొక్కి చెప్పారు.15 నుంచి 18 నెలల్లోపు తమ యూనిట్ల స్థాపనను పూర్తి చేయాలని నేను రెండు కంపెనీలను కోరినట్లు నాయుడు తెలిపారు.

ఇక రాష్ట్రానికి గ్రీన్ ఎనర్జీ రంగంలో రూ.10 లక్షల కోట్లు పెట్టుబడులు రానున్నాయని సీఎం చంద్రబాబు (CM Chandrababu) తెలిపారు. అనకాపల్లి జిల్లా (Anakapalli District) పూడిమడకలో గ్రీన్ హైడ్రోజన్ (Green Hydrozen) ఉత్పత్తి ద్వారా ఎరువులు, రసాయనాలు తయారవుతాయని సీఎం చంద్రబాబు తెలిపారు. అల్యూమినియం, ఉక్కు ఉత్పత్తికి హైడ్రోజన్ వాడితే వేడి బాగా తగ్గుతుందని అన్నారు హరిత ఇంధనం ద్వారా తయారయ్యే వాటికి విదేశాల్లో భారీ డిమాండ్ ఉంటుందని ఏపీ సీఎం చంద్రబాబు తెలిపారు

కాగా గ్రీన్ కో కంపెనీ కాకినాడలో నాగార్జున ఫెర్టిలైజర్స్ టేకోవర్ చేయనుంది. ఇక్కడ గ్రీన్ అమోనియా తయారు చేసి విదేశాలకు ఎగుమతి చేయనున్నారు. ఈ ప్లాంట్‌పై దాదాపు రూ.25 వేల కోట్లు పెట్టుబడులు పెడుతున్నారు. మరో కంపెనీ రిలయన్స్ బయో కంప్రెస్డ్ గ్యాస్ తయారీకి 500 కేంద్రాలు.. ఒక్కో కేంద్రానికి రూ.130 కోట్లు పెట్టుబడి పెడుతున్నారు. గడ్డి ద్వారా బయోగ్యాస్ తయారు చేయనుండగా.. ఈ గడ్డి పెంచడానికి ఎకరాకు రూ.30 వేలు చొప్పున కౌలు రైతులకు రిలయన్స్ చెల్లించనుంది.