వచ్చే ఏడాది వరకు ఎంఅండ్ఎం ఎగ్జిక్యూటివ్ చైర్మన్‌గా ఆనంద్ మహీంద్రా

మహీంద్రా అండ్ మహీంద్రా బోర్డ్ ఆఫ్ డైరెక్టర్ల విజ్ఞప్తి మేరకు వచ్చే ఏడాది నవంబర్ వరకు ఎగ్జిక్యూటివ్ చైర్మన్‌గా ఉండేందుకు ఆనంద్ మహీంద్రా అంగీకరించారని కంపెనీ తెలిపింది. ఆనంద్ మహీంద్రా ఎగ్జిక్యూటివ్ చైర్మన్‌గా మరో ఏడాది (2021 నవంబర్) వరకు ఉండాలని బోర్డ్ ఆఫ్ డైరెక్టర్లు ఏకగ్రీవంగా తీర్మానించారు. బోర్డ్ ఆఫ్ డైరెక్టర్ల ప్రతిపాదనకు షేర్ హోల్డర్లు అంగీకరించారని పేర్కొన్నది. దీంతో బీఎస్ఈ ఫైలింగ్ కూడా చేసినట్టు కంపెనీ శనివారం మీడియాకు వివరించింది.

వాస్తవానికి ఈ ఏడాది ఏప్రిల్ 1 వరకు ఆనంద్ మహీంద్రా ఎగ్జిక్యూటివ్ చైర్మన్‌గా ఉండే వెసులుబాటు ఉంది. సెక్యూరిటీ ఎక్స్చెంజ్ బోర్డ్ ఆఫ్ ఇండియా మార్గదర్శకాల మేరకు అప్పటి వరకే అనుమతి ఉంది. కానీ గవర్నెన్స్ నామినేషన్ అండ్ రెమ్యూనరేషన్ కమిటీ, బోర్డ్ అభీష్టం మేరకు తన పదవీ కాలం పొడిగింపునకు ఆనంద్ మహీంద్రా అంగీకరించడం ప్రాధాన్యం సంతరించుకుంది.

ఆనంద్ మహీంద్రా ఎగ్జిక్యూటివ్ చైర్మన్ గడువు పెంపునకు సంబంధించిన ప్రక్రియను పవన్ గొయెంకా, అనీష్ షా పరిశీలిస్తున్నారని ఆనంద్ మహీంద్రా కంపెనీ పేర్కొన్నది. కంపెనీ యాక్ట్ ప్రకారం 2022 ఏప్రిల్ 17 వరకు ఆనంద్ మహీంద్రా ఎగ్జిక్యూటివ్ చైర్మన్‌గా పనిచేసే అవకాశం ఉంది. దానిని కంపెనీ 2020 ఏప్రిల్ 1కి సవరించేందుకు అంగీకరించారు. కానీ ఇప్పుడు మరో ఏడాది పెంచుతున్నామని, ఇది బోర్డ్ ఆఫ్ డైరెక్టర్లు, షేర్ హోల్డర్ల అభీష్టం మేరకు మార్చుతున్నామని చెబుతోంది.