Anand Mahindra: మహీంద్ర మనసు దోచిన కారు డిజైన్.. వాటి తయారీలో పెట్టుబడి పెట్టేందుకు రెడీ

Anand Mahindra: భారతీయ బిజినెస్ టైకూన్ ఆనంద్ మహీంద్ర.. సోషల్ మీడియాలో నిత్యం యాక్టివ్‌ గా ఉంటారు. ఆయన దృష్టికి వచ్చిన మానవతా దృక్పథంతో కూడిన, రోల్ మోడల్స్ వీడియోలు, కథనాలను తన X అకౌంట్‌ లో పోస్ట్ చేస్తూ యువతలో స్పూర్తి నింపుతుంటారు. ఇటీవల ఆయన చేసిన ఓ పోస్ట్ ఇప్పుడు వైరల్ గా మారింది.

పైన ప్రత్యేక కంపార్ట్‌మెంట్‌తో రూపొందించిన వినూత్నమైన కారును ఆనంద్ మహీంద్ర తన పోస్టులో పంచుకున్నారు. వీల్‌చైర్‌ ఉపయోగించే వ్యక్తులకు అనుగుణంగా ఈ వాహనం తయారుచేయబడింది. వారి అవసరాలకు సరిపడేలా స్మార్ట్ మరియు ఆచరణాత్మక పరిష్కారాన్ని ఇందులో పరిచయం చేశారు.

ఈ డిజైన్ పట్ల ఆయన ప్రశంసలు కురింపించారు. అటువంటి వాటిని ఉత్పత్తి చేయడంలో ఆటో పరిశ్రమ ఎదుర్కొంటున్న సవాళ్లను తాము గుర్తించినట్లు తెలిపారు. ప్రత్యేక అవసరాలు కలిగిన వ్యక్తుల కోసం కస్టమైజ్డ్ వాహనాలను తయారుచేసే స్టార్టప్‌లో పెట్టుబడి పెట్టడానికి సముఖత వ్యక్తం చేశారు.

'సూపర్ స్మార్ట్ & ఉపయోగకరమైన డిజైన్. మా వాహనాలు ఈ ఫిట్‌మెంట్‌లను అందించగలిగితే నేను గర్వంగా ఫీల్ అవుతాను. కానీ భారీ ఉత్పత్తిలో నిమగ్నమైన ఆటో OEMకి ఇది చాలా కష్టం. కానీ ఇదే పనిలో నిమగ్నమైన స్టార్టప్స్ అవసరం ఎంతైనా ఉంది. అలాంటి వాటిలో నేను ఇష్టపూర్వకంగా పెట్టుబడి పెడతాను' అని మహీంద్ర చెప్పుకొచ్చారు.